Nyimbu 103 - La Sainte Bible en Langue Yipunu

DUIMBU Nyirondi ugabusila Fumu diboti

¹ Duimbu duDavid. Nyirondi ugabusila Fumu diboti, na murima ami uotsu nyumugabusili diboti!

² Nyiina, nyirondi ugabusila Fumu diboti ngolibana ne diboti diandi dimosi!

³ Jandi etandi mabi mami motsu, ebelusi maali mami motsu,

⁴ etinisi ngila, endasingi maboti na yingeba.

⁵ Emfunisilingi maboti va bununu buami; nyivu nderi mbira ajipurumuyi.

⁶ Fumu etabuli bunsonsi ewamusi botsu abamakambusu.

⁷ Amalonsa Moise kanu tsiandi; amasingisa baIsrael ulaba kanu tsiandi tsineni.

⁸ Fumu avu na yingeba na maboti avu na pugu na abasa na durondu.

⁹ Agesiembingi, agekelsingi kabu andi mutubu.

¹⁰ Agetuvayili dedi mosi na masumu metu agetukilisingi dedi mosi na mabi metu.

¹¹ Maboti mandi ombu basigama mavu tindi maboti nana julu jivu tindi o julu.

¹² Dedi mosi nana yiari ayi wisi epalili yivu vala, na yiari ayi wisi ewendisini anana ekakisinini nsimbulu tsietu netu.

¹³ Nana taji elasili baana yingeba anana Fumu elasili basigama bandi yingeba.

¹⁴ Ejabi na yi tumasundulu, erangimini yiri tuvu yika difufundu.

¹⁵ Mutu uotsu avu nderi yiriri; bundumba buandi buotsu buvu nderi kembujibiriri.

¹⁶ Yiotsu ayi punga jiyipupisili yitsiemuyi, yigomuelabana via!

¹⁷ Durondu duFumu duitsingi mutubu ombu basigama bandi, na maboti mandi metsingi nesi te na bategula bandi,

¹⁸ pa bekelisi pangini andi norangiminanga maruma mandi.

¹⁹ Fumu amavaga yitsiga yiandi yibufumu o julu. Erumingi biotsu abivu.

²⁰ Gabusilanu Fumu diboti, jenu biansa biandi abivu na mangolu aduidugusu maruma mandi nodedila mambu mandi!

²¹ Gabusilanu Fumu diboti, jenu bagora bandi botsu jenu aduvu basalitsi bandi abedugusu duganu duandi.

²² Gabusilanu Fumu diboti, bisundu biandi biotsu mu mbura tsiotsu atsi erumingi! Meʼ wami nyigabusili Fumu diboti!