Nyimbu 102 - La Sainte Bible en Langue Yipunu

DUIMBU Munyongu na yitu

¹ Dusambu dumutu agumakambulu te na amadeda; elasi Fumu amandimotsu.

² Aa Fumu, gulu dusambu duami, mugamu ami ugulunu nagu,

³ guyandiyila nsima ava nyilabili munyongu. Ndiyili matuji ava nyigamuyili. Yilumbu ayi nyigunengili ukwamusa, lensa nokulu.

⁴ Bilumbu biami bitsiemuyi ndedi nsumbili; bivisi biami uganyi biganyi.

⁵ Murima ami umadeda nderi biriri abimatufuga; nyilibini nesi uji.

⁶ Mu diambu dimunyongu ami nyimagasa tindi ugasa.

⁷ Nyibagunu na yivuyisa vengama ayitsani o kumu, nyivu nderi yibidu oyitsani mu midudu.

⁸ Ngemuewenda yilu na nyivu nderi tsoli ajitsani pinsa va julu muansa.

⁹ Yilumbu na yilumbu batu bemfuengilili, benyoyili na bedesingi diina diami.

¹⁰ Nyiji difufundu tsiri biguji, 487 nyisobini matsanga na ayi nyinu.

¹¹ Na kabu agu nesi fuiri agu; gumandangula nombuaga vala.

¹² Bilumbu biami bivioyingi dedi mosi nana yidumbitsi; nyidedi nderi biriri abimadekama.

¹³ Tumba ndeʼ Fumu guvu kaga mutubu, guvu Nsambi te na kula tsiotsu.

¹⁴ Ndeʼ gumarambuga nolasa Sion yingeba; temu jimatola uguvaga maboti, nyiina, temu jimatola.

¹⁵ Jetu basalitsi bagu tuirondi mamanyi memama nesi difufundu.

¹⁶ Bisi malongu badumi Fumu, bakaga botsu balabi bundumba buagu.

¹⁷ Ava Fumu omuerungisila Sion, alasingi buneni buandi.

¹⁸ Abi limba ugulu dusambu du-agumakambulu, ayalensa ndembu tsiogu.

¹⁹ Dionyi disonugulu dukula aduburu yiri batu aboba o gusu bayitsi Fumu!

²⁰ Ava Fumu avu o julu edokimini va tsi. Va Mbura andi elabi bisi butamba,

²¹ egulu mitatu mibaviga na ewaki bango mbela kalala.

²² Bosamuna diina diFumu o Sion, nesi duyitsu duandi o Jerusalem,

²³ ava batu botsu bobengunina na bufumu buotsu busambila Fumu.

²⁴ Nsambi amapatula mangolu va gari nsila na amagufisa bilumbu biami.

²⁵ Nyimagamuga rie; Aa Nsambi ami, guyakusula va gari nsila, ndeʼ aguitsingi mutubu!

²⁶ Kala kala gumasunda butamba, julu jivu yisalu yiagu.

²⁷ Biotsu bina biubungana tumba ndeʼ gubanganga mutubu. Julu na butamba biusiegalana nderi biduaru bigulu ndeʼ gubivinsa nderi biduaru bigona. Nyiina, biotsu bina biutsiemuga,

²⁸ tumba ndeʼ guvu munongu mosi; bilima biagu bigesuki.

²⁹ Baana bababaala babasalitsi bagu botsananga o bulongu buogu bategula bogu botsananga va gusu agu.