Nehemie 9 - La Sainte Bible en Langue Yipunu

Yibenguna utubula masumu

¹ Yilumbu yimagumabeji na bina yitsungi eni baIsrael bamabenguna ubusa uji. Bamaduara basiela na bamagolana difufundu.

² BaIsrael bamakakana na benyi botsu, bamatubula masumu mogu na mabi mabataji bogu.

³ Banoretsama bamaranga mu dibuku dimigaga miFumu Nsambi ogu te na maweru marieru; maweru marieru masusu bamagudama va gusu Fumu Nsambi ogu umuvega kokolu.

⁴ Yechoua na Bani na Cadmiel na Chebania na Bounni na Cherebia na Bani na Kenani bamamata va yikadi yibisi Levi na bamagamuyila Fumu Nsambi ogu ubawaka kalala.

⁵ Mbana bisi Levi na Yechoua na Admiel na Bani na Hachabneya na Cherebia na Hodia na Chebania na Petahia bamagamuga rie: Retsamanu! Gabusilanganu Fumu Nsambi enu diboti, mugabusilinganu diboti temu tsiotsu. Fumu ka muna ubueji gu uvu na diina diagu adivu na bundumba adiviolili motsu!

Dusambu

⁶ Ndeʼ Fumu, ndeʼ pinsa! Gumavaga julu na bambuelili butamba na biotsu abivu muna; ndeʼ guiveyi biotsu monyu, biotsu bijulu bigukutimini.

⁷ Ndeʼ Fumu Nsambi, gumasola Abram. Gumamupalisa o Our o Babylonie, gumamuluga Abraham.

⁸ Gumamulaba asigama va gusu agu gumavangana pangini nandi, gumavangana uvega bulongu bubisi Canaan na bubaHitt na bubaAmor na bubaPerizie na bubaJebusie na bubaGuirgachie buvegu ombu bategula bandi utsananga. Gumakelisa pangini agu mu mbari guvu usungama.

⁹ Gumalaba munyongu ubataji betu o Egypte; gumagulu migamu miogu ava bamabila va disimu diMubu uBenga.

¹⁰ Na bimaga biagu bimunongu na munongu gumakilisa kaga jiEgypte na basalitsi bandi na bisi bulongu buandi, mu mbafi gumajaba dunangu dubisi Egypte adu bamalasa bataji betu. Gumalasa bundumba buagu nana builabinini te na namunyi.

¹¹ Gumapasa mubu va gusu baIsrael na bamavioga va mbura jikamuga; tumba gumabuaga abamabadukanga o mberigi nderi dimanyi adimabuagu o mamba madonga.

¹² Gumabawendisanga nyangu na dimungi na mukolu na dimungi dimuji adimabamonitsanga nsila.

¹³ Gumasunduga o julu uvosa nogu va mukongu uSinai: gumabavega maruma masungama na malongi mangensa, migaga na maruma madugu.

¹⁴ Gumabajabisa yilumbu yiagu yiuvuma yilumbu yiagu yiyingitsi gumabavega musalitsi agu Moise agumabalonsanga maruma magu masusu na migaga.

¹⁵ Ava bamagululu nsala gumababondusila biguji ava bamagululu puila gumabapalisila mamba mu dimanyi. Gumabaruma ubiahla bulongu abu gumalevila pesi ubavega.

¹⁶ Tumba bataji betu ubasa na dunangu bamaba mimbini na basamadedila maruma magu,

¹⁷ bamabusa ugudedila, bamalibana maneni magu ama gumabavayila; bamagalisa mirima miogu bamatabula diambu ugabuga o buviga buogu o Egypte. Tumba gusamabaliyila nsima, guvu Nsambi aguitandingi, Nsambi aguvu na maboti na yingeba, agugaa na yifutsu, aguvu na tindi durondu.

¹⁸ Bamavaga ngombi jibudilu bamagamuga rie: Labanu Nsambi etu agumatupalisa o Egypte!

¹⁹ Bamagulensa tindi ugulensa; na durondu duagu duneni gusamabasila pinsa o kumu; dimungi disamabasila nesi nyangu muna nsila ogu, nesi dimungi dumuji dimabamonitsanga nsila ogu mukolu.

²⁰ Na maboti magu gumabavega Yinyunyi yiagu ubakalusa bango diela. Gusamabawiminanga manna magu ubalisila gumabaveganga mamba ubavotsa puila.

²¹ Mu magumana mabilima gumababungulanga o kumu, basamagambu na yima. Biduaru biogu bisamatsatsuga, makulu mogu masamaranda.

²² Gumasunsa biotsu o tsi durumu duogu nesi malongu nesi bufumu buSihon kaga jiHechebon na buOg kaga jiBachan.

²³ Gumafumsa bategula bogu nderi bambuelili. Gumabakotisa o bulongu buCanaan abu gumatsingula bataji bogu rie: Wendanu yebubonga!

²⁴ Bamakota na bamadila bulongu. Gumasundusa bisi Canaan va gusu ogu, gumabawakisa ombu gogu. Batu bagu bamabavayila bakaga na malongu nana bamarondila.

²⁵ Bamapatula misiengi mikandu; butamba abumaba na digumba; bamabialila mandagu amamabasa busina na biduna bimamba na manungi mamirayisan na mioliva na miri amiburi milunda mipuela mipuela. Na maboti magu bamajanganga na bamagukurungu na bamatsananga na nsangu.

²⁶ Tumba bamaba biduka na bamakaluga mimbini bamaliyila migaga miagu nsima na bamaboka babiyitsi bagu abamabalubusa ugabuga ombu gagu na bamagulensa tindi ugulensa.

²⁷ Kabogu gumabawakisa ombu bavinitsi bogu abamabalasanga maguga. Bamagutatila mu temu munyongu, ndeʼ aguvu o julu gumabagulu na durondu duagu duneni gumabatindila batu abamabawaka kalala ombu bavinitsi bogu.

²⁸ Banodila yivumu bamamuebanda uvaga mabi va gusu agu bamamueguliyila nsima na bavinitsi bogu bamabatsoyisanga. Kabogu bamamuegutatila; ndeʼ aguvu o julu na durondu duagu duneni gumabagobula kumbu tsipuela.

²⁹ Gumabalubusa umuededila migaga miagu; tumba ubasa na dunangu basamagaru udedila maruma magu; bamalensa migaga miagu; amiveyi monyu ombu abemikipi. Bamasiela masambaka; bamagalisa mirima; bamabusa ugudedila.

³⁰ Gumabawarila mu bilima bipuela; diuleba Yinyunyi yiagu amaba na babiyitsi na bamalubusu, basamagaru. Kabogu gumabawakisa ombu bisi malongu mangana.

³¹ Tumba na durondu duagu duneni; gusamabagunga na gusamabaliyila nsima mu mbari ndeʼ guvu Nsambi aguvu na yingeba na maboti.

³² Aa Nsambi etu, guvu muneni, mungo mangolu, aguvu na diduma, guvu usigama ukelisa pangini netu. Guyagengila maguga ama tumalabanga nderi mavu diambu digeyi. Maguga meni amamalabu netu, nesi na bakaga betu na basefu betu nesi na bavagulitsi betu bapagu na babiyitsi betu nesi na bataji betu na batu bagu botsu ubandila va temu jibakaga baAssyrie te na namunyi.

³³ Mu motsu ama tumalabanga gumaba usungama na usigama ne pa tumavaganga mabi.

³⁴ Bakaga betu na basefu betu na bavagulitsi betu bapagu na bataji betu basamakelisa migaga miagu; bamabusa maruma magu nesi malubu magu.

³⁵ Na maboti magu mapuela bamatsana o bufumu buogu na maboti mapuela o bulongu buneni abumaba na diduma basamadunda bifu biogu bibi ugusalila.

³⁶ Namunyi tuvu baviga! Jetu tuvu o bulongu abu gumavega bataji betu, abamasangili na digumba dineni.

³⁷ Bulongu bueni buvu na digumba dineni ulisila bakaga abeturumi mu mbari tumavaga masumu. Besalisi nyuru tsietu nana berondili na besalisi biruitsi bietu wandi. Ka muna maguga ma tuilabingi!