Nehemie 8 - La Sainte Bible en Langue Yipunu

¹ Batu botsu bamagukama va mosi va dulombili adumaba va gusu yiabutsu yiMamba. Bamawivula Esdras agumaba musonitsi ubega dibuku dimigaga miMoise adi Fumu amasonina baIsrael.

² Esdras muvagulitsi upagu amabega dibuku dimigaga va gusu dibuli diotsu: nesi babaala nesi bagetu, diwendi rie: botsu abamaba na diela umitsiyisa. Dionyi dimaba yilumbu yitega yitsungi jimusambuali.

³ Esdras amaba diteli va dulombili aduvu va gusu yiabutsu yiMamba kedi kedi te na midi uranga dibuku dimigaga va gusu babaala na bagetu diwendi rie: botsu abamaba na diela umitsiyisa. Batu botsu bamaba limba ava amarangila dibuku dimigaga.

⁴ Esdras amaba diteli va julu yikadi yitsimbi ayimagomununu yibenguna yieni. Mattitia na Chema na Anaya na Ouria na Hilquia na Maasseya bamaba va mabaala mandi; Pedaya na Michael na Malkia na Hachoum na Hachebadana na Zacharie na Mechoullam bamaba va magetu mandi.

⁵ Esdras amadibula dibuku va gusu batu botsu mu mbari amaba va julu yikadi va gusu batu botsu; anodidibula batu botsu bamarelama.

⁶ Esdras amagabusila diboti ombu Fumu Nsambi aguvu muneni na batu botsu bamawaka ava bamanangulila miogu o julu rie: Amen! Amen! Mbana bamagudama va gusu Fumu umuyitsa.

⁷ Mbana bamarelama na bisi Levi: Yechoua na Bani na Cherebia na Yamin na Accoub na Chabbetai na Hodia na Maasseya na Quelita na Azaria na Yozabad na Hanan na Pelaya; jogu bamabanda ubalonsa migaga.

⁸ Bamaranga dibuku dimigaga miNsambi na diufi o julu na bamabavindiyilanga utsiyisa ama bamaranga.

⁹ Batu botsu bamalilanga ava bamagululu migaga. La dibandu Nehemie agumaba musonitsi na bisi Levi abamalonsanga batu bamatsingulila batu botsu rie: Yilumbu yieyiyi yivu yingitsi yiFumu Nsambi enu; duyanyonga na duyalila.

¹⁰ Esdras amabuesa rie: Wendanu uyeji nyama tsivonga na yenuanu malamu madisoga na dukatindila jogu abagaa na abilambu dikabu mu mbari yilumbu yieyiyi yivu yingitsi yiFumu etu. Duyanyonga! Nsangu jiFumu jivu mangolu menu!

¹¹ Bisi Levi bamavotsanga batu botsu rie: Volanu! Yilumbu yieyiyi yivu yingitsi. Duyanyonga!

¹² Batu botsu bamayenawenda o uji nonu. Bamagabila abasamba na biguji na bamasangila tindi usangila. Bamagulu malongi.

Feta jimasamba

¹³ Yilumbu ayimubeji basefu bamikuta mibaIsrael na bavagulitsi bapagu na bisi Levi bamabenguna na Esdras agumaba musonitsi uyewiji migaga.

¹⁴ Bamalaba migaga amimasonugu mu migaga ami Fumu amavega kala ombu Moise rie: BaIsrael batsaningi o masamba yitsingu yiotsu yifeta jimasamba mu tsungi jimusambuali:

¹⁵ bayenajisamunanga o misiengi miogu miotsu nesi o Jerusalem; batu botsu bawendingi o mikongu uyeromba bitayi bimioliva na bimioliva mimbendila na bimirita na metu na bitayi abivu na bitsafmyi urungila masamba.

¹⁶ Mbana baIsrael bamayenarombanga bitayi urungila masamba; bamosi o julu tsimandagu mogu na basusu mu ndombili tsiogu na basusu va piasu jiNdagu Nsambi na basusu va dulombili aduvu va gusu yiabutsu yiMamba na basusu va gusu yiabutsu yiEfraim.

¹⁷ Dibuli diotsu dijogu abamaruyila o buviga bamarunga masamba na bamatsananga muna. Bamasangila tindi usangila mu mbari ubanda va temu Josue muana dibaala uNoun te na yilumbu yieni baIsrael basamamuevaga feta eni.

¹⁸ Yilumbu na yilumbu bamaranganga mu dibuku dimigaga miNsambi, ubanda na yilumbu yitega te na yiusita. Bamavaga feta te na yisambuali yibilumbu na mu yilumbu yimunana bamaba na yibenguna yineni nana yimarumunu.