Nehemie 6 - La Sainte Bible en Langue Yipunu

Batu bamamueweliga usikiga bisalu

¹ Mbe nyikanamiga biabutsu Saneballat na Tobia na Guechem muArab na batu basusu abamatuvina bamagulu yiri nyimarungulila yivaga na yisaa na maluta.

² Mbana Saneballat na Guechem bamatindila yilumbi ayimansingula rie: Ruga, tuyibenguna o Kefirim o yibususu yiOno. Kabogu bamatabula diambu undasa maguga.

³ Nyimabatindili bulumbi rie: Yisalu yineni nyisali, kabogu ngorungula uruga: yisalu mbe yiugabuga mansinsima!

⁴ Bamandengila kumbu jina, kumbu tsiotsu nyimabagabusilanga kabusulu jimosi.

⁵ Saneballat amamuetindila yilumbi yieni kumbu ajimuranu na muganda agumafurugu.

⁶ Umasonugu rie: Nduku unyava jinyavi ombu abagaa baJuif nesi Guechem esingisili yiri jenu na baJuif duirondi uba mimbini mikaga la dibandu guirungisili yivaga yieyiyi.

⁷ Bevosi ndeʼ guba kaga ogu, gumasola nesi babiyitsi abotubula o Jerusalem yiri guvu kaga jiJuda. Kaga agotamba ujaba mambu meni, kabogu leruga tukayimoga va mosi.

⁸ Nyimawagula Saneballat rie: Adi guivosi vana digaa dingensa! Ufura guifuri!

⁹ Batu beni botsu bamaweliga utulasa goma; bamaronda yiri tudeda na yisalu yiusuka. Aa Nsambi, peyi mangolu usala yisalu yiami!

¹⁰ Yilumbu yimosi nyimawenda ombu Chemaya muana dibaala uDelaya mutegula uMetabeel. Amaba o gari ndagu andi na amansingula rie: Tʼwendi va mosi o Ndagu Nsambi, tukakedibiga o Mbura Nsambi mu mbari batu abeguvini uruga beruyi mukolu uyiguboka.

¹¹ Nyimawaka rie: Mutu nana menu nyurina? Dibaala nana menu nyukedibiga o Mbura Nsambi nodila monyu? Ngowenda!

¹² Nyimajaba yiri asamasindugu na Nsambi tumba na Saneballat na Tobia; bamamufuta badoli yiri oposila nana.

¹³ Nyimajaba ditasa diogu. Bamaronda undasa goma yiri nyuduka diambu diogu adiutombisa uvaga disumu; mbe bobivisa diina diami nondasa yisonyi.

¹⁴ Aa Nsambi ami, rangimina bisalu biTobia na Saneballat! Rangimina bisalu biNoadia wandi aguvu mubiyitsi umugetu na babiyitsi basusu aberondi undasa goma!

¹⁵ Yivaga yimasuka mu yilumbu yimagumabeji na biranu yitsungi Eloul, yimarungu mu magumaranu na bilumbu bibeji.

¹⁶ Ava batu botsu abetuvini na bisi malongu abamaba yiari na yiari bamadigululu bamagaangu na goma. Mbana bamajaba yiri yisalu yieni yimasalu na mangolu maNsambi.

¹⁷ Va temu eni bamaba baneni baJuda abamasoninanga Tobia muganda na Tobia wandi amabasoninanga.

¹⁸ Bisi Juda bapuela bamafubana nandi na bamavangana pangini mu mbari amaba boji buChekania muana dibaala uAra na muana andi Yohanan amawela muana uMechoullam muana dibaala uBerekia.

¹⁹ Bamamukakisanga va misu mami na bamayemutsingulanga posulu tsiami. Tobia amatindanga miganda undasa goma.