Nehemie 2 - La Sainte Bible en Langue Yipunu

Nehemie amavegu musuga ugabuga o Jerusalem

¹ Mu yilima yimagumabeji bidurumu dukaga Artaxerxes, yilumbu yimosi mu tsungi Nisan kaga utsana etsani va tavula na nyimamuwakisa malamu mandi. Nyisamamulasa na kala ava nyimabila na murima utsira.

² Kabogu amakwivula rie: Dibandu yi guvu nyangirini? Gubela guibeli? Dibandu yi gunyonyili? Nyimagaangu na goma jineni.

³ Nyimawaka kaga rie: Kaga abi monyu mutubu! Dibandu yi ngobila nyangirini? Musiengi uma ngila mabataji bami umapansu na biabutsu bi-uonyi bimanyenga!

⁴ Kaga amakwivula rie: Yi guirondi? Nyimasundila usambila Nsambi aguvu o julu,

⁵ mbana nyimawaka kaga rie: Pa kaga elabi divu diwelimina ansindiyi o Juda o musiengi umangila mabataji bami uyegurungulila.

⁶ Kaga jimugetu amaba atsana va mugula kaga na amamuekwivula rie: Guyatsinga? Temu yi gugabuyila? Kabogu kaga amansingisa uwenda; nyimamutsingula temu aji nyugabuyila.

⁷ Mbana nyimabuela rie: Pa kaga elabi divu diwelimina apeyi miganda ulasa ombu barumitsi badisimu dina dimujamba Euphrate yiri bonsingisa uvioga nokota o Juda.

⁸ Bapeyi muganda ususu ulasa ombu Assaf aguvu gora jimusiru ukaga yiri otombila tsimbi tsibiabutsu bimusiengi ukandu na tsibivaga bimusiengi. Kaga amapega miganda mieni mu mbari Nsambi ami amakwamusa.

⁹ Nyimawenda ombu barumitsi abavu o disimu dina diEuphrate na nyimabavega miganda mikaga. Kaga amaruma bivunda bibagora na babeyitsi babakabala uwenda nami.

¹⁰ Saneballat muisi Horon na Tobia musalitsi agumaba muisi Ammon basamalaba ubueji ugulu mutu amaruga uyiwamusa baIsrael.

Nehemie uweʼ eweʼ uyenagengila bivaga biJerusalem

¹¹ Nyimatola o Jerusalem na nyimaletsana bilumbu birieru guna.

¹² Nyisamatsingula mutu adi Nsambi amatuma umuvayila o Jerusalem; va julu vana nyimaretsama mukolu na babaala bamosi. Meʼ nyimawenda va julu buru ami, basusu basamaba na baburu.

¹³ Nyimapala mukolu va yiabutsu ayinengulu Yibususu na nyimawenda o yiari yiyileka yiMukuimbi Nyoga no yiari yiyiabutsu ayinengulu Mibondu; nyimalaba yiri bivaga biJerusalem bimapansiga na biabutsu bimusiengi bimanyenga.

¹⁴ Nyimavioga bebeli na yiabutsu ayinengulu Yileka no yiari yiDianga dikaga te na vasamaba mbura uviosa buru ajimambeganga.

¹⁵ Nyimavioga mukolu na mukolu, nyimamuevioyila va yibususu yiCedron uyenagengila bivaga; mbana nyimayenagabusila na nyimakotila va yiabutsu ayinengulu Yibususu.

¹⁶ Bivovi basamajaba agu nyimaba na adi nyimavaga. Yiotsu yina mbe nyisakatsingula nesi baJuif nesi bavagulitsi bapagu nesi bivunda nesi bivovi nesi jogu abamakipanga mambu adi mbe nyuvaga.

¹⁷ Nyimabatsingula rie: Ka muna maguga ma tuilabi! Jerusalem umapansu na biabutsu bi-uonyi bimanyenga! Ruganu turungulilianu bivagp biJerusalem, mbana yisonyi yiutusukila.

¹⁸ Nyimabatsingula misamu nana Nsambi ami amakwamusila na mambu ama kaga amansingula. Kabogu bamavosa rie: Tʼwendianu o urunga! Bamakevega usala yisalu yieni.

¹⁹ Saneballat agumaba muisi Horon na Tobia musalitsi agumaba muisi Ammon na Guechem agumaba muArab, banotsingulu dionyi, bamatudesa na bamatulensa. Bamatuwivula rie: Yi duivayi vana? Jenu duvu mimbini mikaga!

²⁰ Nyimabawaka rie: Nsambi aguvu o julu jaʼ beni otulasa ubueji! Jetu atuvu basalitsi bandi tumuerungulila musiengi. Mbe ka jenu dugaa na dikabu nesi musuga nesi yirangumunu o Jerusalem.