Nehemie 11 - La Sainte Bible en Langue Yipunu

Miina mabaJuif abamagabuga o Jerusalem

¹ Basefu bamayetsana o Jerusalem. Batu basusu bamabuaga mbanda ugaanga umosi mu digumi uyetsana o Jerusalem musiengi uNsambi na yifu yisusu boyetsana o biari biogu.

² Bamagabusila diboti ombu jogu botsu abamakesola uyetsana o Jerusalem.

³ Ababa la basefu abamayetsana o yiari yiJerusalem o misiengi miJuda, mutu mutu amatsana vambura andi muna musiengi andi, nesi baIsrael nesi bavagulitsi bapagu nesi bisi Levi nesi basalitsi baNdagu Nsambi nesi bategula baSalomon.

⁴ Baana baJuda na baBenjamin bamayetsana o Jerusalem. Va gari baJuda ababa: Ataya muana dibaala uOuzia muana dibaala uZacharie muana dibaala uAmaria muana dibaala uChefatia

⁵ muana dibaala uMalaleel baana bababaala baPeres na Maasseya muana dibaala uBarouk muana dibaala uKol-Hoze.

⁶ Dutalu dubaana bababaala baPeres abamayetsana o Jerusalem dumaba kama jina na maguma siamunu na yinana yibabaala bamangolu.

⁷ Va gari baBenjamin ababa: Sallou muana dibaala uYechaya mutegula ultiel na Maasseya na Colaya na Pedaya na Yoed na Mechoullam

⁸ na Gabbai na Sallai: bamaba yifu yikama na magumabeji na yinana.

⁹ Joel muana dibaala uZikri amaba sefu ogu; Yehouda muana dibaala uHassenoua amaba sefu jimubeji jimusiengi.

¹⁰ Va gari bavagulitsi bapagu: Yedaya muana dibaala uYoyarib na Yakin

¹¹ na Seraya muana dibaala uAhitoub yivunda yibavagulitsi bapagu muana dibaala uMerayot na Sadoc na Mechoullam na Hilquia

¹² na baana bataji abamakipanga bisalu biNdagu Nsambi bamaba yinana yikama na magumabeji na babeji: Adaya mutegula uMalkia muana dibaala uPachehour na Zacharie na Amsi na Pelatia na Yeroam:

¹³ abamaba basefu bamandagu mabataji bamaba kama beji na magumana na babeji: na Amachesai mutegula ulmmer agumabura Mechillemot na Azai na Azarel

¹⁴ na baana bataji bogu abamaba babaala bamangolu bamaba kama na magumabeji na yinana. Zabdiel muana dibaala uHaguedolim amaba sefu ogu.

¹⁵ Va gari bisi Levi: Chemaya mutegula uBounni muana dibaala uAzricam na Hachoub

¹⁶ na Chabbetai na Yozabad bamakipanga mambu maNdagu Nsambi na bamaba mu dutalu dubasefu babisi Levi:

¹⁷ Mattania mutegula uAssaf muana dibaala uZabdi na Mika agumatubanga duimbu duduyitsu va diweru didusambu: Bacbouquia amaba agumubeji va gari baana bataji bandi: Abda mutegula uYedoutoun muana dibaala uGalal na Chammoua.

¹⁸ Dutalu dubisi Levi o musiengi uNsambi dumaba kama beji na magumidunana na bana.

¹⁹ Va gari bakelisi bamakotulu: Accoub na Talmon na baana bataji bogu bamabakama na magumidusambuali na babeji.

²⁰ BaIsrael basusu na bavagulitsibapagu na bisi Levi, diwendi rie: botsu basusu ba matsananga o misiengi miotsu miJuda, mutu mutu o ndagu andi.

²¹ Basalitsi baNdagu Nsambi bamayetsana o yiari yiOTel o Jerusalem; Siha na Guichepa bamaba basefu bogu.

²² Agumaba sefu jibisi Levi o Jerusalem: Ouzi mutegula uMika muana dibaala uMattania muana dibaala uHachabia muana dibaala uBani agumaba muana Assaf, diwendi rie: bawimbitsi abamawimbisanga o Ndagu Nsambi.

²³ Vamaba diruma dikaga mu diambu dibawimbitsi na bisalu biogu biyilumbu na yilumbu.

²⁴ Petahia muana dibaala uMechezabel mu yifumba yiZera muana dibaala uJuda amaba munu ubaIsrael va gusu kaga jiPerse.

BaJuif abamatsananga yiari na yiari biJerusalem

²⁵ O misiengi nesi o mimbu amamabambana mionyi basusu bamatsaninanga: baJuda o Quiriat-Arba na mimbu amamabambana nesi o Dibon no mimbu amamabambana nesi o Yecabseel na mimbu amamabambana

²⁶ nesi o Yechoua no Molada no Bet-Pelet

²⁷ nesi o Hassar-Choual na mimbu amamabambana nesi o Bercheba na mimbu amamabambana

²⁸ nesi o Siclag no Mekona na mimbu amamabambana

²⁹ nesi o En-Rimmon no Sora no Yarmout

³⁰ no Zanoa no Adoullam na mimbu amamabambana no Lakich na mimbu amamabambana nesi o Azeca na mimbu amamabambana. Bamatsananga ubandila o Bercheba o tandu te no yibususu yiHiimom o banda.

³¹ BaBenjamin bamatsananga o Gueba nesi o Mikmas no Aya no Bethel na mimbu amamabambana.

³² Nesi o Anatot no Nob no Anania

³³ no Hassor no Rama nouittaim

³⁴ no Hadid no Seboim no Naballat

³⁵ no Lod no Ono nesi o yibususu yibasalitsi.

³⁶ Bisi Levi abamatsananga o Juda bamafubana na baBenjamin.