Nahoum 2 - La Sainte Bible en Langue Yipunu

¹ Bisi Juda guluatianu yilumbi ayitubuli duvotsu o julu tsimikongu! Vaganu bafeta benu, dugusuanu pangini atsi dumavangana na Nsambi. Mutu mubi agumadukuananga agomuedukuana, musuga andi umasuka.

² Mubungitsi otoga nagu Ninive. Bagora kelisanu yivaga! Kelisanu mansila! Warisanu mirima! Maninanu mangolu motsu.

³ Fumu omuekunsa bundumba bubategula baJacob nesi buneni bubaIsrael, bakinditsi bamabukinda na bamabubunga.

Ninive umabongu na umakindu

⁴ Ngubu tsibangogaga bandi tsivu tsibenga, batoyitsi badivita bamaduara yinyuru ayivu va gari ubenga na dumbulu. Muna yilumbu ayi bamasola utoga makalu mogu malabini vedi vedi, makongu uviunsu meviunsu.

⁵ Makalu mamarambuyila o milaku midivita, mevindimi mu mansila; megengulu nderi bitutu na mewendi mbangu nderi bakabi.

⁶ Kaga jiNinive amarangimina bagora bandi bamangolu tumba bamayenapepalananga mu muendu ogu; bamawenda mambanguo bivaga bimusiengi na bamayematisa bikadi.

⁷ Mieyi mimijamba mimasundila upubuga na ndagu kaga jimasiengumuga.

⁸ Yitumba yinsambi jimugetu yimagaangu. Basalitsi bandi babagetu ubima bebimi nderi mabembi na uduma bedumi tulu tsiogu.

⁹ Kala kala Ninive umaleba ditanga dibasa na mamba! Labatianu, urina berini! Sikamanu! Sikamanu! Ne muvinitsi mosi ayagabuga.

¹⁰ Kindanu lora jivema! Kindanu lora! Bilundulu bivu bipuela bipuela, bivu bibasa na bima bidufunu duneni.

¹¹ Biotsu bimakindu na bimabivusu na bimabungu! Mirima mimabakama, makotulu yika uregama, binsi yika ukuduga.

Ninive uvu nderi yimbungu ayimabetsu

¹² Diambu yi dimalabana na yisuemunu yibimbungu nesi mbura aji baana babimbungu bejangingi, aji yimbungu ha yibusi yiyimbungu na muana yimbungu bamasueminanga? Tsia mutu asamabakungisa?

¹³ Yimbungu yimavopula bibulu ulisila mugatsi nesi baana bandi. Yimabasa bisuegulu na abi yimaboka.

¹⁴ Fumu Mabadi amavosa rie: Gulu nyina kueru nagu Ninive; nyunyensa makalu magu, ne bafudu bagu boboku o divita. Nyutsiemusa bima biagu abimakindu, bagomuegulu mufi mabilumbi biagu.