Mitatu 4 - La Sainte Bible en Langue Yipunu

Nsoruru tsiJerusalem

¹ Ka muna diambu di! Lora jimafuba! Tindi lora jisaa tindi lora! Mamanyi maMbura Nsambi mamapansiga mu migula mimansila motsu!

² Baana babaala baSion abavu baneni abamalegengulu nderi tindi lora, ka yia begengulu nderi bisanga bidiga!

³ Ne makoju menuisi baana bogu mabenyi tumba muana mugetu ubatu bami agekipi, avu nderi otarisa abetsani o mbura ajigaa na mamba.

⁴ Dulimi dumuana kali dunama o yilansi mu mbari egulu puila; baana bageyi bevondi biguji na mutu agebaveyi bionyi.

⁵ Jogu abamajanganga biguji biboti ufu befu mu mansila; jogu abamabanganga na maboti yika dibufu begolini.

⁶ Mbela jimuana mugetu ubatu bami jivu jineni ne jiviolila jiSodome agumasundila ubungana.

⁷ Baana bandi babakaga abamaleba mindumba nyuru tsiogu tsimaba na mangoiu na buvinyi.

⁸ Binsi biogu bimakuduga, bagemuejabunu o mansila; mikata miogu mimanama bivisi, mimagumuga nderi mikansu.

⁹ Jogu abeboku na dijenga belabi ubueji uviolila ogu abefu na dungosu dunsala mu mbari befu vagegeyi; biguji bigaa biwelimina o manungi.

¹⁰ Diuleba bagetu bamaronda baana bogu tindi ubaronda, nsala jimabarombisa ubalamba nobajanganga mu temu dubungu dumuana mugetu ubatu bami.

¹¹ Fumu amadugusu fuiri andi, amawitila kabu andi jineni. Amabangisa muji o Sion agumasielasana bibuga bi andi.

¹² Bakaga babutamba ne bisi bulongu basamaletasa yiri muvinitsi na mukuanitsi bokota o Jerusalem.

¹³ Ayina la yisaku yimasumu mababiyitsi bandi nesi yimabi mabavagulitsi bandi bapagu abamayewitila malungu mabatu basungama.

¹⁴ Bamayenalinganga na budunga mu mansila, bamayenabembatananga na bilinga abivu na malungu; ne mutu mosi agogaru ubibemba.

¹⁵ Jogu bamabagamuyila rie: Kakananu, bavu bango muinsi! Kakananu, kakananu duyabibemba! Bamarina tsiri ujaba agu bewendi. O malongu bamavosanga rie: Bagotsana netu.

¹⁶ Fumu amabapansa na kabu andi, agomuebagengila ne ugengila mu mbari basamayitsa buvagulitsi buogu bupagu na basamayitsa bivunda.

¹⁷ Misu mamatoga: tumaviosulila uviva duwamusu adusamaruga; tumaviva dilongu adisamarungula utuwaka kalala.

¹⁸ Bamatutsiarila mu bisonginyi te na tugorungula ugabuga o mbura tsietu nesi mu mansila metu; disukusulu dimalabana bilumbu bietu bimasuka disukusulu dietu dimalabana!

¹⁹ Bakuanitsi betu bamaba na tindi mambangu ne uviolila bambira; bamatubingisa o mikongu, bamaturambila mirambu o mbura atsigaa na mamba.

²⁰ Yibiatsi yiFumu agumatuvumisanga amabonduga o biduna biogu, jandi agu tumavosila rie: Tutsana o tsi yidumbitsi yiandi va gari malongu.

²¹ Muana mugetu uEdom, sangila nolabanga ubueji; ndeʼ aguitsani o Ous! Gunuisu dimoyi na gulanga te na gukevula tsanda.

²² Muana mugetu uSion, mukilu agu umadugusu; bagomuegutinda bakoli. Tumba ndeʼ muana mugetu uEdom, jandi ogukilisa mu diambu dimabi magu, opalisa masumu magu va yijalala.