Migaga Mimatubula 7 - La Sainte Bible en Langue Yipunu

BaIsrael batu baNsambi

¹ Fumu Nsambi enu odudilisa bulongu abuba abuenu na va misu menu obingisa malongu mapuela: baHitt na baGuirgachie na baAmor na bisi Canaan na baPerizie na baHivie na baJebusie, diwendi rie: Yisambuali yimalongu mafuna tindi ufuna na amavu na tindi mangolu uviolila jenu.

² Ava Fumu Nsambi enu oduwakisila monyi dukababetsa na dukabapansa na duyavangana pangini nogu na duyabagabila maboti.

³ Duyakunsa mawela nogu, duyawetsa baana benu babagetu na baana bogu bababaala na duyawelila baana benu bababaala baana bogu babagetu.

⁴ Pa duivayi nana borombisa baana benu bababaala uliyila Fumu nsima usalila bansambi bangana mbana kabu Fumu jiuba va julu miuru mienu na agotamba udubokisa.

⁵ Tumba guluanu nana dubavayila: dukapansa binyensulu biogu bipagu na dukabula bitumba biogu na dukapansa bakosi bogu na dukanyensa bibagunu biogu abimavalu.

⁶ Jenu duvu batu abamawakusu ombu Fumu Nsambi enu. Fumu Nsambi enu amadusola yiri duba dilongu adiuba tindi adiandi va gari malongu motsu amavu va butamba.

Usigama uFumu ukelisa pangini andi

⁷ Pa Fumu amaduronda tindi uronda na amadusola, asamadivaga mu mbari dumaviolila malongu masusu ufuna, duvu dilongu digeyi uviolila malongu motsu.

⁸ Tumba Fumu amaduronda na amakelisa pangini aji amavangana na bataji benu, na mangolu mandi Fumu amadupalisa o buviga buPharaon kaga jiEgypte.

⁹ Kabogu jabanu Fumu Nsambi enu avu Nsambi mosi buandi. Nsambi eni aguvu usigama ukelisa pangini andi na yingeba yiandi te na tosini jikula ombu jogu abemurondi na abekelisi migaga miandi.

¹⁰ Tumba jaʼ beni ekilisi jogu abemuvini na ebabokisi: agotamba nokilisa botsu abemuvini.

¹¹ Kabogu kelisanu maruma na migaga na malongi abi nyidurumi namunyi na bikipinganu.

¹² Pa duigulu maruma memama na pa duimakelisingi na pa duimakipingi Fumu Nsambi enu okelisila pangini andi na odulasa yingeba nana amavanginina na bataji benu.

¹³ Jandi odurondanga na odugabilanga miula na odufunisanga; ogabila baana benu miula nofunisa digumba dible na malamu menu na matsi menu na bangombi benu na bindombu bienu na binsabi bienu o bulongu abu amavangana na bataji benu uduvega.

¹⁴ Jenu dugabulu miula uviolila batu botsu: o mandagu menu dugoba na yinguma: ne dibaala ne mugetu ne yibulu yimosi va gari migamba mienu.

¹⁵ Fumu okakasana maali motsu nenu; agodutindila nesi buali bumosi va gari maali meni maEgypte ama dumajabanga, tumba omawakusu jogu botsu abeduvini.

¹⁶ Dubunga batu botsu aba Fumu Nsambi enu oduwakisa. Dugobalasa yingeba na duyayitsa bansambi bogu; mu mbari adina diudurombisa ukota o muyitsa ubakosi.

Fumu mukelisi ubatu bandi

¹⁷ Tanguji dukewivula rie: Batu beni bagetuviolili ufuna? Tsie turungulila ubabinga? Duyabaduma.

¹⁸ Rangiminanu adi Fumu Nsambi enu amavayila Pharaon na bisi Egypte botsu;

¹⁹ na mambu maneni ama dumalaba na misu menu na bimaga na bilimba abimalasa mangolu maFumu Nsambi enu agumadupalisa: anana Fumu Nsambi enu ovayila batu botsu abedulasi goma.

²⁰ Fumu Nsambi enu otindila nesi banyosi ubarambusa o mbura atsi bedusuemi yiri dubaboka.

²¹ Mu diambu diogu duyalaba keri mu mbari Fumu Nsambi enu aji nenu, Nsambi aguvu uneni na uranga.

²² Fumu Nsambi enu obinga malongu meni vala nenu pesu pesu; pa dusundila ubabokisa vana vana, bulongu bubasa de na bibulu na bibulu.

²³ Mbana Fumu Nsambi enu omawakisa ombu genu; na omapansa tindi upansa yiari na yiari te na mobungu.

²⁴ Owakisa bakaga bogu ombu genu na dutsiemusa miina mogu va butamba ne jimosi jigogagana nenu te na botsu bobungu.

²⁵ Dunyensa bitumba bibansambi bogu bapaku. Duyanyungila lora jivema vo lora na duyatsibonga mu mbari tsivu nsoruru ombu Fumu Nsambi enu.

²⁶ Duyakotisa yima yinsoruru o mandagu menu yiri dugoba dedi na yima yieni ayimavegu na mugeli. Vengu dubibunga tindi ubunga, dukabigengila bibi; bivu nsoruru mu mbari bimavegu na mugeli.