Migaga Mimatubula 34 - La Sainte Bible en Langue Yipunu

Dufu duMoise

¹ Moise amawenda o kumu tsiMoab o julu mukongu uNebo, diwendi rie: o julu mukongu uPisga va nsungisi na Jericho. Fumu amamulasa bulongu buotsu:

² ubandila o Galaad te no Dan no Neftali jiotsu ajivu bulongu buEfraim na buManasse no bulongu buotsu buJuda te no mubu aguvu o yiari ayi wisi ewendisini,

³ rio tandu no biari biotsu biJourdain no yibususu yiJericho no misiengi mimambari nesi te no Soar.

⁴ Fumu amamutsingula rie: Abuna la bulongu abu nyimavangana uvega ombu Abraham na Isaac na Jacob ava nyimavosila rie: Nyubuvega ombu bategula benu.

⁵ Moise musalitsi uFumu amafuila vana o bulongu buMoab nana Fumu amamutsingulila.

⁶ Nsambi amamutsiga o yibususu o bulongu buMoab va nsungisini na Bet-Peor. Ne mutu mosi agejabi ngila andi te na namunyi.

⁷ Ava Moise amafuila amaba na kama na magumaibeji mabilima; ne nana misu mandi masamaba na bidumbitsi na mangolu mandi masamasuka.

⁸ BaIsrael bamalilanga Moise te na magumarieru mabilumbu bibukuili o kumu tsiMoab.

⁹ Josue muana dibaala uNoun amabasu na Yinyunyi yidiela mu mbari Moise amamusakiga miogu. BaIsrael bairiamudedila na bamadukanga maruma ama Fumu amavega Moise.

¹⁰ Vasamamuelabana mubiyitsi o Israel agumaba dedi na Moise. Fumu amakelasa kiakiaki ombu gandi;

¹¹ amamusindiga uvaga bilimba biotsu na bimaga o bulongu buEgypte ombu Pharaon nombu basalitsi bandi nombu bisi bulongu buandi botsu.

¹² Bimaga bieni biotsu abi Moise amadugusu na mangolu maNsambi bimavagu va misu mabaIsrael botsu wandi.