Migaga Mimatubula 32 - La Sainte Bible en Langue Yipunu

¹ Julu liga matuji mbana nyuvosa; butamba gulu ama nyivosi.

² Malongi mami madekingi nana maberi mamfuia mambu mami magolumuyi nana disala, nderi manogu mu bisinga na nderi maberi mamamba mu magaji!

³ Nyutubula buneni budiina diFumu. Jenu baIsrael dumisanu buneni buNsambi etu!

⁴ Fumu avu dimanyi, bisalu biandi bivu bidugu; mambu mandi motsu mavu mawelimina. Avu Nsambi asigama na avu asungama na agaa na dupasu.

⁵ BaIsrael bamakebivisa, Fumu agaa na mbela; dusaa baana bandi duvu batu babi na mimbini.

⁶ Je anana duigabusilili Fumu diboti, jenu biduka na abagaa na diela? Agaa taji enu? Agaa musunditsi enu? Tsiri jandi agumadusunda na agumaduvega mangolu?

⁷ Rangiminanu temu tsikala, rangiminanu bilima abimavioga te na kula tsiotsu, wivulanu bataji benu jogu bodulonsa na bivunda bienu jogu bodutsingula.

⁸ Ava Nsambi Aguvu Uneni, amaveyila disiala ombu bisi bulongu amakakasana batu na amabatabulila mandilu dedi mosi na dutalu dubaIsrael.

⁹ Dikabu dibaIsrael divu batu bandi, Bategula baJacob bavu bisolu biandi.

¹⁰ Fumu amarasuna baIsrael o tsi jigumuga, o mbura jibupinsa agumagumbanga nduku tsikulini. Amabagaga na amababamba, amabakelisa nana yikokosi yiandi

¹¹ Avu nderi mbira ajibandimini; jipurumuyi va julu baana bandi jisilisi mapapi mandi na jibabongi; jibalinsi va julu mapapi mandi.

¹² Munongu mosi Fumu amawendisa batu bandi, vasamaba bansambi basusu ne jimosi.

¹³ Amamatisa baIsrael o julu tsimikongu aguna bamaji milunda mimanungi; amabafifisa buji bumamanyi nesi matsi mamabapalila va yilala yimamanyi.

¹⁴ Bangombi na bindombu bamabavega dile, amabalisila nyama tsibaana babindombu na tsibalumi babindombu na tsibabinsabi, bamaji fufu jible, bamanu mamba mamirayisan.

¹⁵ Jenu baIsrael dumavonga na dumatopulu uji; dumavonga tindi uvonga, dumarandana te na dumaputa! Va julu vana dumaliyila Nsambi agumadusunda nsima; dumalensa dimanyi didugobutsu duenu.

¹⁶ Jenu baIsrael dumarangisa diwavi diandi na bansambi bangana dumamunyoyisa na nsoruru tsienu.

¹⁷ Jenu baIsrael dumavagulila bakosi abagaa Nsambi pagu, ombu bansambi aba dusamalejabanga, ababanoruga yika namapapa aba bataji benu basamadumanga.

¹⁸ Jenu baIsrael dumaliyila dimanyi adimadubura nsima, dumalibana Nsambi agumadubura!

¹⁹ Fumu amadilaba na amanyoga tindi unyoga baana bandi bababaala na babagetu.

²⁰ Amavosa rie: Ngomuebagengila mbana nyulaba disukusulu diogu nana diubila! Bavu mimbini na baana abagaa na dululu.

²¹ Bamarangisa diwavi diami na bansambi bangana abagaa tindi Nsambi: bamanyoyisa na bakosi bogu bakulini. Meʼ wami nyubawavisa na batu abagaa tindi batu, nyubanyoyisa na dilongu adivu yika biduka na biduka.

²² Nyiina, nyunyoga tindi munyongu ukambusa butamba na biandi biotsu umanyensa nesi mabandu mamikongu.

²³ Nyubafunisila mabi motsu; nyubatindila mbansa tsiami tsiotsu.

²⁴ Dungosu dunsala dubabokisa, dibagu diubagudisa na yivunga yineni wandi. Nyutsagumusa bibulu bibukanyi ubamborumuna nesi miangala mibanyoga.

²⁵ O gusu kana boboku na majenga na o gari tsimandagu boboku na bivunga bineni: dufu dugaanga batu botsu nesi mufudu nesi numba nesi muana aguvu va tulu nesi yinunu.

²⁶ Nyimaba na ditasa ubaboka notsiemusa durangumunu duogu,

²⁷ Tumba nyimatasa bavinitsi bogu bokematisa novosa rie: Jetu tumababelisa, tsiri Fumu agumabavayila mambu meni.

²⁸ BaIsrael bavu dilongu adimatsiemusa dujabu duogu bagaa na diela.

²⁹ Mbe bavu na diela mbe bamagulu adidi, mbe bamarangimina adi bolaba o gusu.

³⁰ Tsie mutu mosi obingisila tosini batu? Babeji borungula ubingisa tosini beji tsibatu? Nyiina, pa Dimanyi diogu disamabasumbisa na pa Fumu asamabadunda!

³¹ Bansambi bogu bagaa dedi na Dimanyi dietu nesi bavinitsi betu bedijabi.

³² Mfuga tsiogu tsiruyili o nungi jiSodome no bulongu buGomorrhe; mirayisan miogu migeligu bisaga biogu bivu nduli;

³³ Malamu mogu mavu nderi miangala, mavu tindi ndombu ajiboki.

³⁴ Motsu mana magaa masuegu bebeli nami? Magaa mu bisuegulu biami?

³⁵ Kabusulu pila ajiami na kabusulu wandi ava botsimbulu! Bilumbu bimaguga mogu bigotamba nolabana.

³⁶ Fumu otabulila batu bandi bunsonsi; olasa abandi yingeba ava elabila yiri mangolu mogu mamabasuka; nesi abavu baviga nesi abagaa baviga.

³⁷ Obawivula rie: Bansambi bangana baka? Dimanyi adimaba yisuemunu yienu dika?

³⁸ Bansambi beni abamajanganga nyama tsibibulu biogu na bamanuanganga malamu mapagu tsiogu tsiunu baka? Barelimi bakaduwamusa na kuamusulu tsiogu!

³⁹ Kabogu jabanu rie: Menu aguvu Nsambi, vagaa bansambi basusu abebagunu nami; Nyiveyi monyu na nyibokisi; nyinemisi na nyibelusi. Mutu orungula upatula yima ayivu nami?

⁴⁰ Nyisambi dikaka o julu, Nyilevi pesi rie: Nyiji monyu umutubu!

⁴¹ Pa nyisibi dijenga diami, pa nyitabuli bunsonsi, nyugabusila bavinitsi bami pila na nyukilisa jogu abepini.

⁴² Dijenga diami diubasasa, mbansa tsiami tsiunyansula malungu mogu, malungu ma-abamanemusu na mabakoli na mabivunda bibavinitsi.

⁴³ Jenu bisi malongu, dodisanu batu baFumu! Fumu ugabusila egabusili pila jimalungu mabasalitsi bandi. Ukilisa ekilisi bavinitsi bandi etsindulili bulongu buandi dibumi na batu bandi wandi.

⁴⁴ Moise amawenda na amavosa mambu motsu maduimbu dueni va gusu batu botsu; Josue muana dibaala uNoun amaba nandi.

⁴⁵ Ava Moise amamanina uvosa mambu meni motsu va gusu baIsrael botsu

⁴⁶ amabaruma rie: Namunyi kelisanu tindi ukelisa mambu meni motsu ama nyidurumi ulonsanga bategula benu yiri bokelisanga nokipanga mambu meni mamigaga miemimi.

⁴⁷ Migaga miemimi mivu tsongu enu; miuduvega monyu na miudurombisa utsinganga o bulongu abu Nsambi enu oduvega abuba abuenu o disimu dina diJourdain.

Dufu duMoise dumatubulu

⁴⁸ Muna yilumbu yieni Fumu amaruma Moise rie:

⁴⁹ Mata o julu mikongu miAbarim o julu mukongu uNebo o bulongu buMoab va nsungisini na Jericho; labilila bulongu buCanaan abu nyuvega baIsrael.

⁵⁰ Ndeʼ gufuila o julu mukongu agu gumata, gufu dedi mosi nana muana nguji agu Aaron amafuila o julu mukongu uHor.

⁵¹ Jenu na Aaron dumapayila dibi va misu mabaIsrael va mamba maMeriba va Cades o kumu jiTsin; dusamalasa bunsambi buami ombu baIsrael.

⁵² Gulabilila bulongu; tumba gugotola o bulongu abu nyuvega baIsrael.