Migaga Mimatubula 30 - La Sainte Bible en Langue Yipunu

BaIsrael bogabuga ombu Fumu

¹ Dulaba mambu meni motsu: Miula na milogu miami. Ava Fumu Nsambi enu odupansila malongu mangana dutasanga motsu;

² pa dumuegabuga ombu Fumu Nsambi enu na pa dumuededila diufi diandi na mirima mienu miotsu na matasa menu motsu, jenu na bategula benu nana nyidurumini namunyi,

³ mbana Fumu Nsambi enu odugabusa na odulasa yingeba na omuedubengusana va mbura aji Fumu Nsambi enu amadupansila.

⁴ Ne pa dubegu o masuka mabulongu Fumu Nsambi enu odubengusana oyedugukiga.

⁵ Fumu Nsambi enu odugabusa o bulongu abumaleba bubataji benu, buonyi buba abuenu; odu vaga maboti na odufunisa ne uviolila bataji benu.

⁶ Fumu Nsambi enu oliomisa mirima mienu na mibategula benu mbana durondanga Fumu Nsambi enu na mirima mienu miotsu na matasa menu motsu yiri dugofu.

⁷ Fumu Nsambi enu onamusa bavinitsi benu milogu mieni miotsu, diwendi rie: jogu aboduvinanga nodukuananga.

⁸ Jenu dugabuga ombu Fumu na dumuededilanga diufi diandi na dukipanga maruma mandi ama nyiduveyi namunyi.

⁹ Fumu Nsambi enu odufunisila maboti mu bisalu bienu biotsu nodubuesanga baana nesi migamba nesi digumba: Fumu omuelaba ubueji udufunisa nana amafunisila bataji benu

¹⁰ ava dudedilanga diufi diFumu Nsambi enu nokipanga migaga na maruma abimasonugu mu dibuku dimigaga ava dumuegabuyila ombu Fumu Nsambi enu na mirima mienu miotsu na matasa menu motsu.

Mambu maNsambi mavu nenu

¹¹ Diruma diedidi adi nyiduveyi namunyi digeduviolili mangolu na digaa diranga.

¹² Digaa o julu mu mbari dukewivula rie: Anyi otumatila o julu uyetubongila dionyi? Anyi otugulusu dionyi yiri tudikipanga?

¹³ Digaa o disimu dina dimubu yiri duwivula rie: Anyi otusabuyila o disimu dina dimubu uyetubongila dionyi? Anyi otugulusu dionyi yiri tudikipanga?

¹⁴ Adi nyiduveyi divu bebeli nenu, diwendi rie: Mu miunu mienu na mu mirima mienu yiri durungula udikipanga.

Solanu monyu

¹⁵ BaIsrael labanu, namunyi nyimasunsa monyu na maboti va gusu enu na dufu na mabi wandi.

¹⁶ Nyiduveyi migaga namunyi: Rondanganu Fumu Nsambi enu nodukanganu amandi na kelisanganu maruma mandi na migaga miandi na malongi mandi mbana dugofu na dufunanga na Fumu Nsambi enu odugabila miula o bulongu abu duwenda abuba abuenu.

¹⁷ Tumba pa mirima mienu miubiva na pa dugaa na dululu na pa dukevega o uyitsa bansambi bangana nobasalila

¹⁸ nyidutubulili namunyi yiri dubungana, dugotamba nofu o bulongu abu duwenda abuba abuenu o disimu dina diJourdain.

¹⁹ Dingensa te na julu na butamba biuvioga jabanu yiri namunyi nyimadusambula monyu na dufu na miula na milogu. Solanu monyu yiri dugofu, jenu na bategula benu.

²⁰ Durondanga Fumu Nsambi enu nodedilanga diufi diandi nofubana mirima nandi: adina diudurombisa monyu na dutsinga va butamba na dutsananga o bulongu abu Fumu amavangana uvega bataji benu: Abraham na Isaac na Jacob.