Migaga Mimatubula 29 - La Sainte Bible en Langue Yipunu

Ama Nsambi amavayila baIsrael

¹ Moise amanengila baIsrael botsu na amabatsingula rie: Dumalaba motsu ama Fumu amavaga va misu menu o bulongu buEgypte ombu Pharaon nombu basalitsi bandi botsu no bulongu buandi buotsu.

² Dumalaba purulu tsiogu na bimaga bieni na bilimba abi bamalaba;

³ te na namunyi Fumu asamaduvega mirima utsiyisa na misu ulaba na matuji ugulu amamalabana.

⁴ Nyimaduwendisa o kumu te na magumana mabilima; biduaru bienu bisamafu na bapondu benu wandi.

⁵ Diuleba dusamaji mapa na dusamanu nesi malamu maminongu na minongu dumajaba rie: Menu la Fumu Nsambi agumadukelisanga.

⁶ Dumatola va mbura eni; Sihon kaga jiHechebon na Og kaga jiBachan bamapala utubengusana uyitutoyisa tumba jetu tumababelisa.

⁷ Tumabapatula bulongu buogu na tumabuvega ombu baRuben na baGad nombu dikabu dimosi dibaManasse

⁸ Kabogu kelisanganu mambu mapangini ejiji na makipanganu yiri dugokambulu mu motsu ama duvaganga.

Usingisila pangini jiFumu Nsambi

⁹ Jenu baIsrael, namunyi duvu va gusu Nsambi enu, jenu botsu na bivunda bienu bibifumba na bivunda bienu na bivunda bienu bibagora: babaala botsu baIsrael

¹⁰ na baana benu na bagatsi benu na benyi abavu nenu ubanda na jandi oyiduriabili mikansu nesi te na muteyitsi mamba menu.

¹¹ Dumakelasa usingisila pangini jiFumu Nsambi enu muna pangini eni ajimavangunu na pesi ajina aji Fumu Nsambi enu emuevangana nenu namunyi,

¹² yiri omuejiwarisila batu bandi namunyi na jaʼ beni oba Nsambi enu nana amaledutsingulila na nana amavanginina na pesi na bataji benu: Abraham na Isaac na Jacob.

¹³ Tsiri nenu buandi nyivangini pangini ejiji, pangini ajimavangunu na pesi,

¹⁴ jivu na botsu abavu va gari etu namunyi va gusu Fumu Nsambi etu na bategula betu abasakaburu.

¹⁵ Duijabi nana tumatsanina o bulongu buEgypte na nana tumavioyila va gari malongu ama jenu dumananga.

¹⁶ Dumalaba nsoruru tsiogu na bakosi bogu nesi bamiri nesi bamamanyi nesi balora jivema nesi balora abavu o bulongu buogu.

¹⁷ Va gari enu vayaba nesi dibaala nesi mugetu nesi mukuta nesi yifumba aboliyila Fumu Nsambi enu nsima aboyekota o muyitsa ubansambi bangana. Va gari enu vayaba mutu agubagunu na dugundu, diwendi rie: mutu agubivisa mirima mibatu na posulu tsiandi.

¹⁸ Anomana ugulu mambu mapangini ajimavangunu na pesi ayakematisa novosa rie: Nyulaba duvotsu nesi pa nyugalisa murima ami nesi nyudibula mulugu ami.

¹⁹ Fumu agomutanda; obasa na diwavi na olasa mutu eni kabu na milogu miotsu amimasonugu mu dibuku diedidi; miumugaanga na Fumu otsiemusa diina diandi va butamba.

²⁰ Mu diambu didibi diandi Fumu omukakasana na bifumba biotsu biIsrael dedi mosi nana milogu mimasonugulu mu dibuku dimigaga ava pangini jimavangununu.

Fumu udugusu edugusu kaka tsiandi

²¹ Dukula aduruga, diwendi rie: baana benu na benyi aborambuyila o bulongu buvala ava bolabila bivunga na budunga biFumu: butamba buotsu yika fula na musayi

²² na dukanga dugobendisa nesi tsangu nesi yivaru nesi yiriri yiotsu nana ava Sodome na Gomorrhe mimapansiyila na Adma na Seboim ami Fumu amabunga na kabu andi jineni.

²³ Bisi malongu motsu bowivula rie: Dibandu yi amaroyisila kabu andi?

²⁴ Mbana bowaka rie: Mu mbari batu bebaba bamabunsa pangini aji Fumu jibataji bogu amavangana nogu ava amabapalisila o bulongu buEgypte.

²⁵ Bamayesalila bansambi bangana na bamabakutimina; bansambi aba basamalejabanga aba Fumu amabagandisa uyitsa.

²⁶ La dibandu Fumu amanyoyila bisi dilongu dieni kabu na amabanamusu milogu miotsu amimasonugu mu dibuku diedidi.

²⁷ Fumu amanyoga na amabagusula na kabu jineni o bulongu buogu na amabaviosa o bulongu bususu nana tuilabili namunyi.

²⁸ Mambu amamasuegu yika Fumu Nsambi etu emajabi. Tumba jetu tuijabingi amamatulasu, jetu na bategula betu, monyi la migaga miNsambi ami vengu tukipanga.