Migaga Mimatubula 21 - La Sainte Bible en Langue Yipunu

Uboku agusamajabunu mubokitsi

¹ O bulongu abu Fumu Nsambi enu oduvega abuba abuenu pa borasuna mutu agumaboku o gari musiru tsiri ujaba agumamuboka,

² bivunda bienu na bansonsi benu boyeweliga bataka ubandila vana mfumbi te no misiengi amivu o yiari na yiari.

³ Banojaba musiengi aguvu bebeli na mfumbi, bivunda bimusiengi eni bobonga muvogulu ngombi agusakasalusu nesi yisalu yimosi.

⁴ Bovindiga muvogulu ngombi eni o mujamba agugekamuyi, diwendi rie: o yibususu ayisakasalu manungi; avana bogutabulila muru o mamba.

⁵ Mbana bisi Levi abavu bavagulitsi bapagu bobambana; mu mbari Fumu Nsambi enu amabasola umusalila nogabila miula mu diina diFumu; yika jogu bavu na musuga utabula mambu mamakuba nesi mamapura.

⁶ Bivunda biotsu bimusiengi eni, sinsa viri jogu abamabemba mfumbi bogolila mamba vana julu muvogulu ngombi agumatabulu muru.

⁷ Jogu bovosa rie: Tsiri jetu atumawitila malungu memama na tusamamulaba dibokulu.

⁸ Aa Fumu, tanda batu bagu baIsrael aba gumakobula; guyabavega mbela jimalungu ma-agugaa na diambu. Kabogu Nsambi obatanda.

⁹ Anana dukagusulila mbela jimalungu ma-agugaa na diambu ava duvayila amavu mawelimina na Fumu.

Diwela na Koli

¹⁰ Ava duwendila oyetoga divita na bavinitsi benu, pa Fumu obawakisa ombu genu yiri dubabonga bakoli,

¹¹ tanguji mutu olaba va gari bakoli beni mugetu aguvu muboti na oba na ditasa umuwela.

¹² Kabogu akamubega o ndagu andi. Mugetu akafuga notabula nyala tsiandi,

¹³ akavula biduaru biandi abi amaduara ava amabongulu, otsananga o ndagu andi nolilanga taji na nguji andi te na tsungi jimfuimbila. Va julu vana dibaala omukotisa na oba mugatsi andi.

¹⁴ Pa agemuemugulu nsala akamubinga akayenawenda agu oronda, agaa na musuga umusumbisa nesi umukelisa nderi muviga andi mu mbari amamutsotsa uba mugatsi andi.

Musuga ubuvunda

¹⁵ Diurungula uba yiri dibaala adivu na bagatsi babeji erondi umosi na evini ususu. Mugetu mugetu amamuburila muana dibaala, digada amarela ubura,

¹⁶ ava taji ogabila baana bandi bima biandi agorungula upatula buvunda ombu tsomi jidigada nobuvega ombu tsomi jidironda.

¹⁷ Vengu osinga tsomi avu muana udigada, nomuvega makabu matega mabiandi biotsu; muana eni avu muana utega umangolu mandi; buvunda buvu abuandi.

Muana dibaala aguvu mumbini

¹⁸ Diurungula uba dibaala ana muana udibaala aguvu mumbini agugededili diufi ditaji andi nesi dinguji andi, aguibusi ubagululu, diuleba bemukilisingi.

¹⁹ Taji na nguji bobonga muana ogu nomubega va gusu bivunda bimusiengi va dikotulu dimusiengi.

²⁰ Mbana botsingula bivunda bimusiengi rie: Labanu muana etu udibaala aguvu mimbini; agededili diufi dietu; edibulingi mulugu andi na elangingi.

²¹ Kabogu babaala bamusiengi bomutindila mamanyi te nofu. Adina diugusula dibi va gari enu. BaIsrael botsu bodigulu na diubalasa goma.

Mfumbi jilelugu

²² Diurungula uba yiri dibaala ovaga dibi adivu diwelimina umuvega mbela dufu; aboku mbana mfumbi jiulelugu va muiri.

²³ Mfumbi eni jiyasilama va muiri, dukatsiga mfumbi muna yilumbu yieni; mu mbari jionyi jiurombisa mulogu uNsambi. Kebananu yiri dugobivisa bulongu abu Fumu Nsambi enu oduvega disiala.