Migaga Mimatubula 20 - La Sainte Bible en Langue Yipunu

Migaga mibugora

¹ Ava duwendila o utoga divita na bavinitsi benu na dulaba bakabala na makalu na batu bapuela uviolila jenu, duyabaduma; mu mbari Fumu Nsambi enu agumadupalisa o Egypte aji nenu.

² Ava dubambinina o utoga, muvagulitsi upagu olekueka novosa na bagora.

³ Obatsingula rie: Bagora baIsrael guluanu! Namunyi dutoga na bavinitsi benu. Duyalaba goma, sunsanu mirima, duyaregama na duyakambulu va gusu ogu.

⁴ Fumu Nsambi enu owendanga nenu ava dutoyila na bavinitsi benu, jandi oduwaka kalala.

⁵ Bivunda bibagora bowivula bagora rie: Anyi amarunga ndagu jigona na asakajitsanina? Jandi aguna agabuyi o ndagu andi, pa oyefu o divita mutu ususu mbe obialila ndagu andi.

⁶ Pa mutu va gari enu amavara nungi jimirayisan na asakagumbiyila digumba dinungi eni, agabuyi o ndagu andi, pa oyefu o divita mutu ususu mbe odokula mirayisan miandi,

⁷ Pa dibaala amakuma mugetu tumba asakamuwela, agabuyi o ndagu andi, pa oyefu o divita dibaala disusu mbe owela mugetu eni.

⁸ Bivunda bibagora bomuevosanga na batu rie: Pa vavu dibaala adilabi goma na elabi yiri agaa na bukidi, agabuyi o ndagu andi mu mbari baana bataji bandi bodetsu nandi.

⁹ Yika bivunda bibagora bemani uvosa na bagora, boviosa bivunda bimabuli va gusu ogu.

¹⁰ Ava dubambinina na musiengi agu duvu na ditasa upatula, dukalevosa diambu na bisi musiengi eni.

¹¹ Pa beduveyi kabusulu ji welimina na bedusingisi ukota, kabogu botsu abavu muna boba baviga benu.

¹² Pa bagesingi ukunsa diambu nenu na berondi utoga divita nenu kabogu dukakanda musiengi ogu.

¹³ Fumu Nsambi enu anobawakisa ombu genu dukaboka babaala botsu;

¹⁴ tumba dukabonga bagetu na baana na biruitsi na biotsu abiuba o musiengi eni, diwendi rie: biotsu abimakindu, durungula ujanganga abimakindu bibavinitsi beni abi Fumu Nsambi enu oduwakisa.

¹⁵ Anana duvayila mu diambu dimisiengi miotsu amivu tindi vala nenu amigaa mibisi malongu ama dudila.

¹⁶ Tumba mu misiengi mibatu beni aba Fumu Nsambi enu oduvega disiala dukaboka batu botsu.

¹⁷ Dukaboka baHitt na baAmor na bisi Canaan na baPerizie na baHivie na baJebusie nana Fumu Nsambi enu amadurumina,

¹⁸ yiri jogu bagodulonsa nsoruru tsiotsu atsi bevayingi na bansambi bogu na yiri dugovayila Fumu Nsambi enu dibi.

¹⁹ Pa dutoyisa bisi musiengi yiri dubapatula uonyi nadivita diutsinga, duyawanga miri amiligu: durungula ujanganga milunda tumba duyamiwanga.

²⁰ Je muiri uvu mutu yiri dugutumuna? Dukawanga miri amigeligu: na mionyi durungisila bikadi ukotila o musiengi agu duitoyisi nodila bisi musiengi.