Migaga Mimatubula 2 - La Sainte Bible en Langue Yipunu

¹ Jetu tumayenagabuga na tumawenda o kumu mu nsila jiMubu uBenga nana Fumu amaturumina; yitsingu yineni tumatsiengila mikongu miSeir.

Uvioga tuivioyi malongu maEdom na Moab na Ammon

² Yilumbu yimosi Fumu amansingula rie:

³ Dumatsinga utsiengila yiari yieyiyi. Gabuganu o yiari yibanda.

⁴ Lonsa batu malongi memama rie: Duwenda o mandilu mabaana bataji benu, bategula baEsau abetsani o Seir. Jogu boduduma: tumba kebananu.

⁵ Duyabatumuna: ngodusingisa uwenda ne taka jimosi o bulongu buogu mu mbari nyimavega mikongu miSeir ombu bategula baEsau.

⁶ Biguji abi duji duyebisumbanga, nesi mamba monu.

⁷ Fumu Nsambi enu amadugabila miula na bisalu bienu biotsu na amajaba muendu enu o kumu jineni. Labanu magumana mabilima Fumu Nsambi enu avu nenu: dusamagambu na yima.

⁸ Tumagonga baana bataji betu, bategula baEsau abetsanini o Seir, tumabusa nsila jikumu na jiElath na jiEssion-Gueber: mbana tumayenagabusila uvioyila o yiari yikumu tsiMoab.

⁹ Fumu amakandisa rie: Guyatumuna bisi Moab na guyatoga divita nogu: ngoguvega ne yima yimosi o bulongu buogu mu mbari nyimavega bulongu buAr ombu bategula baLot

¹⁰ (BaEmim bamaletsaninanga o bulongu buAr: bamabanganga na mangolu na bamaba bapuela bapuela; batu basasakama nderi bategula baAnac.

¹¹ BaEmim na baAnac bamanengulungu baRefaim tumba bisi Moab bamabanengilanga baEmim.

¹² Va dibandu baHori bamatsaninanga o Seir: bategula baEsau bamababinga te na bamababunga na bamayetsana va mbura ogu. BaIsrael bamavaga munongu mosi o bulongu abu Fumu amabavega.)

¹³ Fumu amaruma rie: Tsie relimianu na sabuganu mujamba ugevi aguinengulungu Zered. Kabogu adina tumavaga.

¹⁴ Yitsingu vimuendu etu ubandila o Cades-Bamea te na tumasabuga mujamba ugevi aguinengulungu Zered yimaba magumarieru na yinana yibilima te na dukula duotsu dubatoyitsi bamavita bamafu nana Fumu amaganina kaka.

¹⁵ Fumu amababunga te na botsu bamafu.

¹⁶ Botsu bana banofu

¹⁷ Fumu amansingula rie:

¹⁸ Namunyi duvioga mandilu maMoab te no bulongu buAr na dutola o yiari ayi baAmmon betsanini.

¹⁹ Duyabatumuna na duyatoga nogu: mu mbari ngoduvega ne yima yimosi o bulongu buAmmon. Nyimavega bulongu bueni ombu bategula baLot.

²⁰ (Bulongu bueni bumakaluga bubaRefaim wandi: baRefaim bamalebutsaninanga na baAmmon bamabanengilanga Zamzummim.

²¹ Bamabanganga na mangolu na bamaba bapuela bapuela; batu basasakama nana bategula baAnac. Fumu amababunga va misu mabaAmmon abamababinga na jogu bamayetsana va mbura ogu.

²² Anana Fumu amavayila bategula baEsau abamatsananga o Seir ava amabungila baHori va misu mabaEdom abamababinga na jogu bamayetsana va mbura ogu avana bavu te na namunyi.

²³ BaAvie abamatsaninanga o mimbu te na Gaza bamabungu na batu abamaiambuyila o Kaftor abamayetsana va mbura ogu.)

²⁴ Mbana Fumu amamueruma rie: Relamanu yenawendanu na sabuganu mujamba ugeyi aguinengulungu Amon. Labanu nyimaduwakisa Sihon, kaga jiAmor agumatsananga o Hechebon na bulongu buandi. Bandanu ukinda na toganu divita nogu.

²⁵ Ubanda namunyi nyubanda unyavisa matamba menu ombu batu botsu te na bogaangu na keri na goma; ava bogululu diduma dienu boregama na bonyonganga.

Udila bedili bufumu buSihon

²⁶ Ava nyimabila o kumu ajinengulungu Quedemot nyimatinda bilumbi ombu Sihon kaga jiHechebon na bulumbi buduvotsu. Nyimaruma mutu umutsingula rie:

²⁷ Nsingisi uvioga o bulongu buagu; nyusungama mu nsila ajineni, ngopembuga nesi o mabaala nesi o magetu.

²⁸ Gukansumbisa biguji abi tuji na gukansumbisa mamba ama tunu; yika uvioga tuvioga.

²⁹ Adina bategula baEsau abamatsana o Seir bamansingisa na bisi Moab abamatsani-nanga o bulongu buAr wandi. Singisa dionyi dedi mosi yiri tusabuga Jourdain uwenda o bulongu abu Fumu Nsambi etu otuvega.

³⁰ Tumba Sihon, kaga jiHechebon asamaronda yiri tuvioyila va mbura andi; mu mbari Fumu Nsambi enu amagalisa tindi ugalisa murima andi yiri dudila bulongu buandi abuvu nenu te na namunyi.

³¹ Fumu amansingula rie: Labanu namunyi nyiduwakisi Sihon na bulongu buandi. Kabogu avana tumabanda utoga.

³² Sihon amayetubengusana na bagora bandi botsu uyetutoyisa o Yahas.

³³ Fumu Nsambi etu amatukagula, tumamubelisa; jandi na baana bandi bababaala na bagora bandi botsu.

³⁴ Kabogu tumabonga misiengi miandi miotsu na tumamibunga tindi ubunga nesi babaala nesi bagetu nesi baana bageyi, tsiri upatusa nesi umosi.

³⁵ Jetu tumakinda yika biruitsi na bisusu abi tumabola o misiengi.

³⁶ Ubandila o Aroer mu migula mimujamba ugeyi aguinengulungu Amon no musiengi aguvu o yibususu te no bulongu buGalaad vasamaba musiengi agusamabetsu. Fumu Nsambi etu amatuwakisa misiengi miotsu.

³⁷ Tumba tusamatola o yiari yibaAmmon nesi va migula miotsu mimujamba ugeyi aguinengulungu Yabboc nesi misiengi amivu o yiari yimikongu na mbura tsiotsu atsi Fumu Nsambi etu amatugandisa utumuna.