Migaga Mimatubula 16 - La Sainte Bible en Langue Yipunu

Feta Paque

¹ Rangiminanu tsungi nsumbi na janganga feta Paque uyitsila Fumu Nsambi enu; mu tsungi nsumbi Fumu Nsambi enu amadupalisila mukolu o Egypte.

² Dukavagulila Fumu Nsambi enu pagu jiPaque; diwendi rie: bindombu na binsabi na bangombi; dukabivagula va mbura aji Fumu osola ukelasa ombu genu.

³ Va temu feta duyaji mapa amavu na dufunusu tumba te na yisambuali yibilumbu dujanganga mapa amagaa na dufunusu, diwendi rie: mapa mamaguga, mu mbari dumabingusu ava dumapalila o Egypte: anana diubila yiri durangimina mitsanu mienu miotsu te na dufu duenu yilumbu ayi dumapalila o Egypte.

⁴ Bayarasuna dufunusu o mandagu menu nesi o bulongu buenu buotsu te na yisambuali yibilumbu; nesi nyama jiyibulu yipagu ayiuboku tsisiga jiyilumbu yitega, jiyasuegu te na kedi.

⁵ Dugorungula uvagula pagu jiPaque va mbura yika la mbura aji Fumu Nsambi enu oduvega jiutsanina;

⁶ tumba dujivagulila va mbura aji Fumu Nsambi enu osola ukelasa ombu genu, avana duvagulila pagu jiPaque ava tsisiga dedi na temu aji dumapalila o Egypte.

⁷ Dukalambisa yibulu, dukayiji va mbura aji Fumu Nsambi enu osola. Ava kedi durungula uyenagabuga o mandagu menu mamatsanda.

⁸ Mu bilumbu bisiamunu dujanganga mapa amagaa na dufunusu; yilumbu yimusambuali yiuba yiyibenguna yineni yiuyitsila Fumu Nsambi enu; duyasala ne yisalu yimosi.

Feta jibatsona

⁹ Dukatala yisambuali yitsona; yika bebandi dutsonsugu duble dukabanda utala yisambuali yibatsona.

¹⁰ Mbana dukavaga feta jibatsona na dukavagula pagu tsitondini nana Fumu Nsambi enu amadugabila miula.

¹¹ Duwenda na nsangu o mbura aji Fumu Nsambi enu osola ukelasa ombu genu, jenu na baana benu bababaala na babagetu na basalitsi benu bababaala nesi babagetu nesi muisi Levi nesi muenyi nesi bisiana nesi bakuili: botsu abotsananga nenu:

¹² Dukarangiminanga yiri dumaleba baviga o Egypte, dukakelisanga nokipanga migaga miemimi.

¹³ Dukavaga feta jimasamba te na yisambuali yibilumbu dunotsonsiga ble tsienu na dunogama mirayisan.

¹⁴ Dulaba nsangu va feta eni, jenu na baana benu bababaala nesi babagetu nesi basalitsi benu bababaala nesi babagetu nesi bisi Levi nesi benyi nesi bisiana nesi bakuili: botsu abotsananga nenu.

¹⁵ Dukavaga feta jiuyitsila Fumu Nsambi enu te na yisambuali yibilumbu va mbura aji Fumu enu odugabila miula mu magumba menu motsu na mu bisalu bienu biotsu na dulabanga tindi nsangu.

¹⁶ Kumbu yirieru yilima na yilima babaala botsu bokelasa va gusu Fumu Nsambi enu va mbura aji osola: diwendi rie: va feta jimapa amagaa na dufunusu na va feta jibatsona na va feta jimasamba. Bayalabana miogu na miogu va gusu Fumu.

¹⁷ Mutu mutu obega pagu nana Fumu Nsambi enu omugabila miuia.

Migaga mibunsonsi

¹⁸ Mu misiengi miotsu ami Fumu Nsambi enu oduvega dukasola bansonsi na bivovi muna bifumba bienu; jogu botabulilanga batu bunsonsi na dusungugu.

¹⁹ Bujaga bumutu buyaduruma utsiemusa dusungugu duandi, duyagengila binsi bibatu na duyasinga milendu mu mbari milendu miveyi buduka ombu jogu abavu na malubu na mibivisi mambu mabatu basungama.

²⁰ Kipanga yika dusungugu buandi yiri dutsana sui nodila bulongu abu Fumu Nsambi enu oduvega.

Miyitsa amimagandusu

²¹ Duyavaga ne kosi mosi va mugula uyinyensulu yipagu ayi durungila Fumu Nsambi enu.

²² Duyavala bakosi: abana bavu nsoruru va gusu Fumu Nsambi enu.