Migaga Mimatubula 14 - La Sainte Bible en Langue Yipunu

Bifu bibukuili bimagandusu

¹ Duvu baana baFumu Nsambi enu. Duyakenemisa na duyakefuga mavenda mu mbari dumabokisa abenu.

² Duvu aba Fumu Nsambi enu; na Fumu Nsambi enu amadusola yiri duba bulongu abuba tindi abuandi va gari malongu motsu.

Migaga mibibulu bilioma na bimuinsi

³ Guyaji ne yima yiotsu ayivu nsoruru.

⁴ Bibulu abi dujanganga abibi: ngombi na yindombu na yinsabi;

⁵ na kabi na tsiesi na mbudi; na buketa na severayi na tsagama na sirafa.

⁶ Dujanganga bibulu biotsu abivu na birodi na abivu na mungunga-taba.

⁷ Tumba duyaji abivu na mungunga-taba buandi vo abivu na birodi buandi. Kabogu duyaji samo na dimbi na dama bavu na mingunga-taba tumba bagaa na birodi: dukabikipa muinsi.

⁸ Duyaji ngulu, avu na birodi tumba agaa na mungunga-taba: dujikipa muinsi. Duyaji nyama tsiogu na duyabemba bibindi biogu.

⁹ Guluanu banyama bamamba aba durungula uji: dujanganga botsu abavu na binyansa na magagala.

¹⁰ Duyaji ne jimosi ajigaa na binyansa: dubakipa muinsi.

¹¹ Dujanganga batsoli botsu balioma.

¹² Aba duji ababa: mbira na orfera na mbira jimubu

¹³ na miletsi mitsuyi na minongu miogu miotsu

¹⁴ na kavanga na minongu miogu miotsu

¹⁵ na mubamba na yibidu na yibura-kama na muletsi na batsoli botsu bamunongu eni

¹⁶ na kukutu na sueta na sinya

¹⁷ na yivuyisa-vengama na ngongu na yigula

¹⁸ na sigonya na nsongi-dianga na batsoli botsu bamunongu eni na upa na yipungangembu.

¹⁹ Bilandila biotsu nesi abipurumuyi nesi abiwendi na makulu, duyabiji.

²⁰ Dujanganga batsoli botsu balioma.

²¹ Duyaji ne yibulu yimosi ayimafu yipingu: dukayivega ombu benyi abetsani nenu yiri boyiji vo dukayisumbisa benyi; mu mbari duvu aba Fumu Nsambi enu. Duyalamba muana yinsabi mu dile dunguji andi.

Migaga mi yimosi mu digumi

²² Dukagusula yimosi mu digumi yibiotsu abi dugumbuyili o manungi menu yilima na yilima.

²³ Dukabiji va gusu Fumu Nsambi enu va mbura aji osola ukelasa ombu genu: yimosi mu digumi yitsangu tsible na malamu menu na matsi menu na tsomi tsibangombi benu na tsibindombu bienu na tsibinsabi bienu yiri duwiji uduma Fumu Nsambi enu temu tsiotsu.

²⁴ Diurungula uba yiri Fumu Nsambi enu odugabila miula na mbura aji Fumu Nsambi enu amasola ukelasa ombu genu jiuba vala, kabogu dulaba uvura usuvanga yimosi mu digumi

²⁵ la dibandu durungula usumbisa yimosi yienu mu digumi nokelisa mbongu te na dutola va mbura aji Fumu Nsambi enu amasola.

²⁶ Avana durungula usumba biotsu abi duronda, nesi bangombi nesi binsabi nesi malamu maminongu na minongu, diwendi rie: biotsu abiudulasa ubueji, dubijanganga va gusu Fumu Nsambi enu: jenu na mikuta mienu dulabanga ubueji.

²⁷ Duyalibana bisi Levi abetsani nenu mu mbari bagaa na dikabu nesi disiala nenu.

²⁸ Yilima ayimurieru dukasuega va mbura ajimasolu yimosi mu digumi yidigumba dienu.

²⁹ Bisi Levi abagaa na dikabu vo disiala va mosi nenu nesi benyi nesi bisiana nesi bakuili abotsananga nenu boyibijanganga te na bogukuru mbana Fumu Nsambi enu odugabila miula mu bisalu bienu biotsu.