Migaga Mimatubula 13 - La Sainte Bible en Langue Yipunu

¹ Kebananu, kipanga migaga miotsu ami nyiduveyi: duyabuesa ne diambu dimosi na duyagusula diambu wandi.

Mukilu ubasambilitsi babansambi bangana

² Diurungula uba yilumbu yimosi volabana mubiyitsi vo mudoritsi umandosi aguvaga bimaga,

³ bimaga abi amavangana nenu biulabana na ovosa rie: Tʼwendianu o bansambi bangana, tukayebasalila noyitsa bansambi aba jenu dugejabi!

⁴ Guyagulu posulu tsimubiyitsi eni vo tsimudoritsi eni umandosi mu mbari Fumu Nsambi enu eduweliyi ujaba yeri duimurondi na mirima mienu miotsu na matasa menu motsu.

⁵ Dukadukanga Fumu Nsambi enu nomudumanga: dukakipanga migaga miandi nodedilanga diufi diandi, dukakeveganga ombu gandi.

⁶ Mubiyitsi eni vo mudoritsi eni umandosi aboku mu mbari amadulonsa ulensa Fumu Nsambi enu omadupalisa o Egypte nesi o buviga; aboku mu mbari amaronda udupembusa nsila aji Fumu Nsambi enu amaduruma uvioyilanga. Anana dugusulila dibi va gari enu.

⁷ Diurungula uba yilumbu yimosi muana taji agu nesi muana dibaala unguji agu nesi umuana agu udibaala vo umugetu nesi umugatsi agu nesi mbatsi agu aji guirondi nana guikerondila oweliga ugudunsa novosa o musuega rie: Tʼwendi, tuyekota muyitsa ubansambi bangana: bansambi aba nesi ndeju nesi bataji bagu basamalejaba,

⁸ vavu bansambi babatu abegutsiengili nesi abavu bebeli nagu vo abavu vala nagu kodu na kodu tsibutamba.

⁹ Guyamugarusu na guyamugulu; guyamulasa yingeba na guyamuwamusa; guyasuega dibi diandi.

¹⁰ Gumubokisa, ndeʼ beni, gurela umudimba yidimbu yitega umuboka mbana batu basusu bomudimba:

¹¹ gumutindila mamanyi te na ofu mu mbari amagurombisa upembuga nsila jiFumu Nsambi agumagupalisa o buviga buEgypte.

¹² Yiotsu ayi baIsrael bodigulu boduma na vagomueba dibi dimunongu eni va gari enu.

¹³ Diurungula uba yilumbu yimosi musiengi umosi va gari misiengi ami Fumu Nsambi enu amaduvega,

¹⁴ dugulu yiri batu babi bamalabana na bamadunsa bisi misiengi ava bamavosila rie: Tʼwendianu tuyekota o muyitsa ubansambi bangana, bansambi aba jenu dusamalejaba.

¹⁵ Dukakelula diambu noyenawivulanga na buranga. Pa diambu divu ngensa na pa dimavagu, diwendi rie: nsoruru tsieni tsimalevagu va gari enu,

¹⁶ mbana jenu beni dukaboka bisi musiengi eni na dijenga nobunga uonyi na batu aboba muna, dukaboka na biruitsi biotsu na dijenga.

¹⁷ Dukagukiga biotsu abimadilu bimusiengi va dulombili na dukanyensa musiengi uotsu na biotsu bina va gusu Fumu Nsambi enu: biuba pagu tsiunyensa atsiusielasana na muji: mbura jiuba yilimba yidubungu na musiengi ugomuerungulu via.

¹⁸ Duyakelisa ne yima yimosi va gari biotsu abimavegu na mugeli yiri Fumu agomuelasa kabu andi, tumba odulasa yingeba tindi yingeba na odufunisa nana amavanginina na bataji benu.

¹⁹ Dukadedila diufi diFumu Nsambi enu nokipanga migaga miandi miotsu ami nyiduveyi namunyi novaga amavu masungama va gusu Fumu Nsambi enu.