Migaga Mimatubula 11 - La Sainte Bible en Langue Yipunu

Durangumunu duama Nsambi amavayila baIsrael

¹ Durondanga Fumu Nsambi enu dumusalilanga nokipanga malongi mandi na migaga miandi na maruma mandi temu tsiotsu.

² (Ngevosi na baana benu abagejabi malongi ama Fumu amadulonsa mu mbari basamaba bambeji) tumba jenu rangiminanu namunyi mikilu miFumu Nsambi enu na mangolu mandi,

³ na bimaga biandi na bisalu abi amasala va gari enu o Egypte ava amagayinina na Pharaon kaga Egypte na bisi bulongu botsu.

⁴ Rangiminanu adi amavayila dibadi diEgypte na bakabala bogu na makalu mogu; nana amabagudisila o Mubu uBenga ava jogu bamadudukila; amabatsiemusa mutubu;

⁵ adi amaduvayila o kumu te na dumatola o mbura ejiji

⁶ na adi amavayila Datan na Abiram baana bababaala baEliab muana dibaala uRuben nana butamba bumapasiyila nobatsudiga na mikuta miogu na mandagu mogu mamatsanda na biotsu abimaba nogu va misu mabaIsrael botsu.

⁷ Dumalaba biotsu bineni abi Fumu amavaganga.

⁸ Vengu dukipanga migaga miotsu ami nyiduveyi namunyi mbana duba na mangolu ukota o bulongu abu dudila,

⁹ yiri dutsinganga o bulongu abu Fumu amavangana uvega bataji benu na bategula bogu, diwendi rie: bulongu abuvu na tindi digumba.

Bulongu abu Fumu ekelisi

¹⁰ Bulongu abu dudila bugaa dedi na Egypte agu dumapalila avana dumavarilanga bivaru o manungi menu na dumatsatsanga na mamba ama dumateganga jenu beni na jenu beni.

¹¹ Bulongu abu dudila buvu na milengu na bibususu na buinogulungu mfula;

¹² buvu bulongu abu Fumu Nsambi enu ekelisingi abu egengilingi yisuisu mfula na mangala.

¹³ Pa duikelisingi migaga ami nyiduveyi namunyi, pa duirondingi Fumu Nsambi enu pa duimusalilingi na mirima mienu miotsu na matasa menu motsu,

¹⁴ onoyisa mfula o bulongu buenu mu temu tsiwelimina, nesi mfula jitega nesi jiusita na dugumbiyilanga ble nesi malamu nesi matsi.

¹⁵ Obendisila biruitsi bienu biriri o manungi menu na dujanganga nogukurungu.

¹⁶ Kebananu, duyakedunsa noliyila Nsambi enu nsima nosalila bansambi bangana nobakutimina.

¹⁷ Fumu odunyoyila tindi kabu; te na odibiga julu na mfula jigomuenoga na butamba bugomuebendisa bivaru na jenu dugotamba notsiemuga o bulongu buboti abu Fumu oduvega.

¹⁸ Tsiyisanu mambu ama nyidutsinguli nderi mavu mabaka va mirima mienu. Dukamatunga nderi yilimba va makaka menu nana birangumunu va mambami menu.

¹⁹ Dukamalonsanga baana benu, dukamavosanga ava dubilanga o mandagu menu nesi mu milingu nesi ava dusiliminanga na ava dusimbuyilanga wandi.

²⁰ Dukamasona mu makutu mamandagu menu na mu biabutsu bimandagu menu.

²¹ Bilumbu bienu na bibaana benu abi dutsananga o bulongu abu Fumu amavangana uvega bataji benu biuba bipuela; munongu mosi nana julu na butamba bigotsiemuga, bilumbu bienu bigosuka wandi.

²² Kipanganu migaga mieni miotsu ami nyiduveyi, rondanganu Fumu Nsambi enu; dedilanganu duganu duandi nokeveganu ombu gandi;

²³ mbana Fumu odubingila bisi malongu meni motsu na jenu durumanga bisi malongu abavu na tindi mangolu uviolila jenu.

²⁴ Mbura tsiotsu atsi dutsiarila tsiuba atsienu: mandilu menu nobandila o kumu te no mikongu miLiban na ubandila o mujamba uEuphrate te no mubu o yiari ayi wisi ewendisini.

²⁵ Mutu agorungula ugagana nenu. Fumu Nsambi enu onyavisa keri na goma enu o bulongu buotsu abu jenu dutola, dedi mosi nana amavanginina nenu.

²⁶ Guluanu namunyi nyidujabisi miula na milogu:

²⁷ miula pa dudedila migaga miFumu Nsambi enu ami nyiduveyi namunyi:

²⁸ milogu pa dugededila migaga miFumu Nsambi enu na pa duipembuyi nsila aji nyidulonsi namunyi nokota o muyitsa ubansambi bangana aba dugejabi.

²⁹ Ava Fumii Nsambi enu odudilisila bulongu buenu, dukagabila miula va julu mukongu uGarizim na milogu va julu mukongu uEbal.

³⁰ (Tsia mikongu mieni migaa o disimu dina diJourdain va mugula nsila ajivu o yiari ayi wisi ewendisini o bulongu bubisi Canaan abetsanini o kumu ajisungasana na Guilgal bebeli na miri miMore?)

³¹ Usabuga duisabuyi Jourdain uyedila bulongu abu Fumu Nsambi enu eduveyi: dubudila na dutsana muna.

³² Dukipanga migaga miotsu na maruma motsu abi nyiduveyi namunyi.