Migaga Mimatubula 10 - La Sainte Bible en Langue Yipunu

Muana ngombi ulora: Nsambi utanda etandi baIsrael

¹ Vana temu eni Fumu amatumina rie: Paka mamanyi mabeji nana amatega, tasunu o julu mukongu; gurunga yigara yipangini wandi.

² Nyumuesona migaga amimaba va mamanyi matega ama ndeʼ gumabula, gukamapodula muna yigara yipangini.

³ Nyimarunga yigara yipangini na tsimbi tsiakasia, nyimapaka mamanyi mabeji nana matega na nyimawenda o julu mukongu na mamanyi meni.

⁴ Fumu amamuesona amimasonugu va mamanyi matega, diwendi rie: yigumi yimigaga amimavosu nenu o julu mukongu agumalula muna yilumbu ayi jenu dumaba vana mbana Fumu amamakwakisa.

⁵ Nyimasunduga mukongu, nyimapodula mamanyi o gari yigara yipangini ayi nyimarunga na mamaba muna nana Fumu amatumina.

⁶ BaIsrael bamarambuyila va Bene-Yacan uwenda o Mossera. Avana Aaron amafuila na amatsigu; muana andi Elazar amamuvinga mu yisalu yibuvagulitsi bupagu.

⁷ Bamarambuyila vana uwenda o Goudgoda, na bamarambuyila vana Goudgoda uwenda o Yotbata, bulongu abuvu na bivela bipuela.

⁸ Vana temu eni Fumu amakakisinina yifumba yiLevi na amabavega musuga uyenabeganga yigara yipangini yiFumu noba va gusu Fumu umusalila nogabila batu miula midiina diandi: abana besalingi te na namunyi.

⁹ La dibandu bisi Levi bagaa na dikabu nesi disiala va mosi na baana bataji bogu: Fumu avu dikabu diogu nana Fumu Nsambi enu amabatsingulila.

¹⁰ Nyimamuetsana o julu mukongu magumana mabilumbu na magumana mamikolu nana va kala. Fumu amamuekulu va temu eni na asamamueduboka.

¹¹ Fumu amatuma rie: Wenda o gusu batu bebaba. Bayedila bulongu abu nyimavanganga uvega ombu bataji bogu.

Mugaga udurondu na udululu

¹² BaIsrael, yi Fumu Nsambi enu erondi viri? Erondi yiri dudumanga nodedilanga duganu duandi nomurondanga nomusalilanga na mirima mienu miotsu na matasa menu motsu.

¹³ Erondi yiri dukipanga maruma mandi na migaga miandi abi nyiduveyi namunyi yiri dulabanga nsangu!

¹⁴ Julu jivu jiFumu Nsambi enu na tindi julu na butamba na biotsu abivu muna.

¹⁵ Fumu amaronda tindi uronda bataji benu, va julu vana amaronda jenu bategula bogu, dumasolu va gari malongu motsu nana duilabili namunyi.

¹⁶ Kabogu kesunsanu va gusu Fumu duyamueba mimbini.

¹⁷ Fumu Nsambi enu eviolili bansambi botsu na avu Fumu bafumu, avu Nsambi jineni aguvu na mangolu na aguvu uranga, agegengili buneni bumutu na agesingi milendu udibiga mabi.

¹⁸ Ewamusi bisiana na bakuili, erondi benyi na ebaveyi biguji na biduaru.

¹⁹ Jenu wenu rondanu benyi duyalibana dumaleba benyi o Egypte.

²⁰ Dudumanga Fumu Nsambi enu, dumusalilanga na dukevega ombu gandi na dulevanga pesi yika na diina diandi.

²¹ Jandi avu bundumba buenu, jandi avu Nsambi enu! Jandi amavaga mambu maneni na maranga ama jenu beni dumalabanga.

²² Bataji benu abamawenda o Egypte bamaba magumidusambuali mabatu; namunyi Fumu Nsambi enu amaduvaga yinombu ayivu yifuna dedi na bambuelili.