Migaga Mimatubula 1 - La Sainte Bible en Langue Yipunu

MALONGI MATEGA MAMOISE

¹ Guluanu mambu ama Moise amatsingula baIsrael botsu o disimu dina diJourdain ava bamatsanina o yibususu yiAraba o kumu tsiMoab ayimaba va nsungisini na Souf agumaba va gari Paran na Tofel na Laban na Hasserot na Di-Zahab.

² (Vamaba dilala diyigumi na yilumbu yimosi urambuyila va Horeb uvioyila mu nsila jimukongu uSeir te na Cades-Bamea.)

³ Mu yilima yimagumana na yilumbu yitega yitsungi jiyigumi na mosi, Moise amatsingula baIsrael motsu ama Fumu amamuruma.

⁴ Dimalabana yiotsu ayi amabelisa Sihon kaga jibaAmor agumatsaninanga o Hechebon na Og, kaga jiBasan agumatsaninanga o Achetarot na o Edrei.

⁵ O disimu dina diJourdain o bulongu buMoab Moise amabanda uvindiga migaga miemimi:

Nsambi uruma erumi baIsrael usogama

⁶ Fumu Nsambi etu amavosa netu o Horeb rie: Jenu dumatsinga va mukongu egugu.

⁷ Relamanu, yenawendanganu! Wendanu o mikongu ami baAmor betsanini no yiari na yiari abibambana nesi o kumu nesi o mikongu nesi o yibususu nesi o tandu nesi o mugula umubu o bulongu bubisi Canaan nesi o mikongu miLiban te no mujamba uneni aguinengulungu Euphrate.

⁸ Labanu, nyimaduvega bulongu: wendanu yedilanu bulongu abu menu Fumu nyimavangana uvega ombu bataji benu: Abraham na Isaac na Jacob, nesi bategula bogu.

Moise usola esoli bansonsi

⁹ Va temu eni nyimadutsingula rie: Ngorungula uduwendisa, meʼ beni!

¹⁰ Fumu Nsambi enu amadufunisa; dumafuna tindi ufuna ne uviolila bambuelili.

¹¹ Fumu Nsambi bataji benu adufunisi tosini tsikumbu na adugabili miula nana amavanginina!

¹² Tsie meʼ beni nyurungulila uduwarila noduwendisa na paga tsienu?

¹³ Solanu batu abavu na diela na dujabu mu yifumba yifumba abejabunu na nyubavega yisalu uduwendisa.

¹⁴ Mbana dumakwagula rie: Adi guivosi divu diwelimina.

¹⁵ Kabogu nyimasola basefu babifumba bienu, babaala abavu na diela na abejabunu, nyimabagabila musuga; diwendi rie: basefu babatosini na basefu babakama na basefu bamagumaramaranu na basefu bayigumi yigumi, mutu mutu na musuga uyifumba yiandi.

¹⁶ Va temu eni nyimalonsa bansonsi benu rie: Tsiyisanu mambu mabaana bataji benu na tabulanu misosi mibaana bataji benu nesi mibenyi na dusungugu.

¹⁷ Ava dutabulila bunsonsi dukipanga mambu mabatu bageyi dedi mosi na mambu mabatu baneni. Duyaduma ne mutu mosi mu mbari bunsonsi buNsambi. Pa diambu divu diranga dukadibega ombu gami yiri nyudigulu.

¹⁸ Vana temu eni nyimaduruma motsu ama vengu duvaganga.

Yigumi na baleyitsi babeji bamasindugu o Canaan

¹⁹ Tumarambuyila o Horeb na tumananga kumu eni jiotsu jineni aji dumalaba: tumavioyila mu nsila jimikongu ami baAmor betsanini na Fumu Nsambi etu amaturumina na tumatola o Cades-Bamea.

²⁰ Nyimadutsingula rie: Dumatola o mikongu ami baAmor betsanini ami Fumu Nsambi etu otuvega.

²¹ Labanu, Fumu Nsambi enu oduvega bulongu bueni. Wendanu yibudilila nana Fumu Nsambi bataji benu amadutsingulila. Duyalaba keri na duyaregama!

²² Mbana jenu botsu dumabambana nami na dumavosa rie: Tusindiyianu babaala o gusu etu uyetusieengila bulongu. Botutsingula nana nsila aji vengu tuvioyila jivu na nana misiengi ami tuiwendili mivu.

²³ Ditasa dieni dimandasa ubueji; kabogu nyimasola yigumi na babaala babeji: yifumba yifumba dibaala dimosi.

²⁴ Bamayenawenda, bamamata mikongu na bamatola te no yibususu yiEchekol ayi bamayesieenga.

²⁵ Bamadokula milunda o bulongu bueni ami bamatubeyila; bamatutsingula misamu rie: Bulongu abu Fumu Nsambi etu otuvega buvu buboti.

²⁶ Tumba dumabusa udedila diruma diFumu Nsambi enu u wenda guna.

²⁷ Ava dumabila o mandagu menu mamatsanda dumatatanga rie: Fumu etuvini la dibandu amatupalisila o bulongu buEgypte uyituwakisa ombu baAmor notugudisa botsu.

²⁸ Agunyi tuwendasana? Tuna mirima o julu, baana bataji betu bamatututsa ava bamavosila rie: Aguna uvu batu baneni na basakama uviolila jetu: misiengi mivu mineni na mikandu tindi ukandu; tutsilaba mikwimbi, bategula baAnac.

²⁹ Nyimadutsingula rie: Duyaregama na duyabalaba goma!

³⁰ Fumu Nsambi enu oyiwendingi va gusu enu, jaʼ beni odutoyila mavita nana amavayila ava dumabila o Egypte,

³¹ nesi o kumu dumalaba yiri Fumu Nsambi enu amadulela nana mutu elelili muana andi; mu muendu uotsu agu dumavaga te na dumatola o mbura ejiji.

³² Ne nana dusamavayila Fumu Nsambi enu yitu.

³³ Diuleba amawendanga va gusu enu; mukolu amaba dimungi dimuji adimadumonitsa nsila aji dumavioyila: nyangu amaba dimungi adimadurombila mbura uvayila milaku.

³⁴ Fumu amagulu mitatu mienu. Amanyoga na amagana kaka rie:

³⁵ Ne dibaala dimosi didukula duedudu dubi agolaba bulongu buboti abu nyimavangana uvega ombu bataji bogu;

³⁶ yika Caleb muana dibaala uYefounne, jandi obulaba, nyuvega bulongu abu amatsiarila mu mbari amadukanga nsila jiFumu na murima umosi.

³⁷ Fumu amandioyila mu diambu dienu na amavosa rie: Ndeʼ wagu gugokota o bulongu bupangini.

³⁸ Tumba Josue muana dibaala uNoun musalitsi agu okota guna; muwarisi mu mbari jandi odilisa baIsrael bulongu bueni.

³⁹ Baana benu aba dumavosila rie: Bolasu maguga, jogu abasakajaba nesi diboti nesi dibi bokota guna; nyubavega bulongu abuba tindi bulongu buogu.

⁴⁰ Tumba jenu wendanu o kumu o yiari yiMubu uBenga.

⁴¹ Dumakwagula rie: Dingensa tuna mbela va gusu Fumu. Kabogu yika uweʼ tuiwendi uyetoga divita nana Fumu Nsambi etu amaleturumina. Mutu mutu amaduara bitogulu biandi na dumatasa rie: Digaa diranga umata mikongu.

⁴² Tumba Fumu amansingula rie: Bagandisi rie: Duyawenda na duyayetoga mu mbari ngaa va gari enu. Duyaromba ubetsu na bavinitsi benu.

⁴³ Nyimadulubusa tumba dusamagaru; dusamadedila maruma maFumu te na dumamata na bukidi buenu o julu mikongu.

⁴⁴ Mbana baAmor abetsani o mikongu mieni bamapala uyedubengusana te na bamadubingisa nderi banyosi; bamadubelisa o Seir te no Horma.

⁴⁵ Ava dumagabuyila dumatatila Fumu; tumba Fumu asamagulu mitatu mienu na asamaduliyila matuji.

⁴⁶ Kabogu dumatsana o Cades-Bamea na dumatsinga tindi utsinga guna.