Michee 5 - La Sainte Bible en Langue Yipunu

Bethleem agupalila Mugobutsi

¹ Fumu amavosa rie: Aa ndeʼ Bethleem Effata, uvu ugeyi va gari bifumba biJuda, ombu gagu upalila aguami agurumanga baIsrael; agumabanganga kala kala ne mbe vasakaba ne yima yiotsu.

² La dibandu Fumu obawakisila ombu batu abebavini te na vana jandi agubura oburila na bansialutsu babaana bandi bogabuga ombu baIsrael.

³ Jandi okelasa na oruma na mangolu maFumu na bundumba budiina diFumu Nsambi andi. Batu bandi botsana sui, ododusu te na masuka mabutamba.

⁴ Jandi ogabusa duvotsu. Pa bisi Assyrie boyibasa bulongu buetu nokota o mandagu mabakaga, tubatoyisa na basefu bapuela.

⁵ Basefu beni borumanga Assyrie na dijenga; bokota norumanga misiengi mibulongu buNemrod. Anana botuwakila kalala ombu muisi Assyrie ava boruyila o bulongu buetu nokota o yiari yietu.

Bansialutsu baIsrael o malongu

⁶ Bansialutsu baIsrael bolabana va gari batu bapuela bapuela nderi disala adiruyili ombu Fumu nesi nderi maberi mamamba amavu mu magaji. Bokipanga Nsambi tsiri batu.

⁷ Bansialutsu baIsrael bolabana va gari malongu nesi va gari batu bapuela bapuela nderi yimbungu va gari bindombu. Ava evioyili enyiyi na evopuli na mutu agebiwaki kalala.

⁸ Nyiina, tumuna bavinitsi bagu botsu abeguvini, babokusu!ʼ

Fumu otsiemusa bisiku biotsu bimfurulu

⁹ Fumu amavosa rie: Muna yilumbu yieni nyubokisa bakabala benu na nyubunga makalu menu.

¹⁰ Nyupansa misiengi mibulongu buenu na nyurakula bivaga bienu biotsu.

¹¹ Nyutsiemusa mavanda na dugomueba na bavinitsi.

¹² Nyutsiemusa bakosi benu na bitumba bienu na dugomuegudama va gusu yisalu ayi jenu beni dumasala.

¹³ Nyutsiemusa bakosi baAstarte abavu nenu na nyubunga misiengi mienu.

¹⁴ Nyudugusu pila ami nesi kabu ami o malongu amamabusa undedila.