Michee 4 - La Sainte Bible en Langue Yipunu

Jerusalem musiengi uneni uduvotsu

¹ Wilumbu yimosi diulabana yiri mukongu uNdagu Nsambi usundu va julu tsimikongu nesi va julu tsibikundubuga.

² Mbana batu bapuela bokotanga guna na bovosanga rie: Tʼwendianu, tumatisanu o mukongu uFumu no Ndagu Nsambi jiJacob yiri tulonsu mambu mandi na tuvioyilanga mu mansila mandi. Migaga miuypalila o Sion na MbembuFumu jiupalila o Jerusalem.

³ Oba nsonsi jibatu bapuela na otabulila malongu bunsonsi. Majenga mogu mokaluga mikuati, na makongu mogu mokaluga bakonduku: malongu na malongu magomuetoga divita.

⁴ Mutu mutu otsananga sui na mfuga tsiandi tsirayisan nesi va gari mifiga miandi. Vagoba mutu umupupisa. Fumu Mabadi oyidivosi.

⁵ Batu basusu bamaduka bansambi bogu tumba jetu tuiduki Fumu Nsambi etu.

Fumu avu kaga jiJerusalem

⁶ Fumu amavosa rie: Mu yilumbu yieni nyugukiga bitsondu na nyugukiga jogu abamabingu, nesi jogu aba nyimakilisa.

⁷ Na mangolu mami bitsondu biukaluga bansialutsu, abamabingu bokaluga dilongu adivu na mangolu. Menu Fumu nyubarumanga o mukongu uSion, ubanda va temu eni te na mutubu.

⁸ Aa Jerusalem, ndeʼ uvu va julu mukongu uvu nderi ndagu watsi; bukaga buagu na mangolu magu biumuebanganga nana na kala.

Duwetsugu na dujegusu duJerusalem

⁹ Dibandu yi duigamuyili namunyi? Dibandu yi duigamuyili nderi mugetu agumagaangu na misongu? Je mu mbari duisaa na kaga na milonsi mienu mimafu?

¹⁰ Tsoganu na bimanganu nderi mugetu agumagaangu na misongu! Mu mbari namapapa dupala o musiengi na duwenda te no Baby lone; aguna duwakulu kalala. Aguna Fumu odugobula ombu batu abeduvini.

¹¹ Temu ejiji malongu mapuela mamagukama utoga nenu na bevosi rie: Jerusalem na batu bandi bolaba yisonyi na jetu tusangila ulaba dubungu duogu.

¹² Tumba bagejabi matasa maFumu na bagegulu kanu tsiandi, bagelupi yiri amabagukiga nderi bibutu va yisagulu.

¹³ Retsamanu na batsiarilianu! Nyuduvayila disiyi dibudilu na nyala tsikunga na dunyiga malongu mapuela. Duwakisa bima abimakindu ombu Fumu nesi busina buogu ombu Fumu butamba buotsu.

¹⁴ Jenu bisi Jerusalem ukanda bedukandi. Jenu aduigukiyi mabadi menu, dukaduara basiela. Udimba bedimbi basefu baIsrael mukasa va dibanga.