Michee 3 - La Sainte Bible en Langue Yipunu

Malubu ulubusa milonsi

¹ Nyivosi na jenu milonsi mibategula baJacob na jenu bansonsi baIsrael rie: Tsiri diambu dienu ujaba dusungugu?

² Jenu duivini maboti na duirondi mabi; jenu duirali batu bami na duibasasi, duibasili yika bivisi na bivisi.

³ Bejangingi batu bami, bebaralingi na bebuli bivisi biogu; bebatabuli mu bibuku nana abi belambi mu mbiji.

⁴ Mbana botatila Fumu tumba agobawagula; va temu eni obasuega yinsi yiandi mu mbari bamaviosulila ukebivisa. Malubu ulubusa abedunsi baIsrael

⁵ Anana Fumu evosili mu diambu dibabiyitsi abedunsi batu bami rie: Pa bebafuti betubuli duvotsu pa bebusi ubafuta betubuli divita.

⁶ La dibandu mukolu dugomuelaba biriariamu! Vagomueba mambu maNsambi, yika pisama! Wisi udutsimina, jenu babiyitsi. Dulaba nyangu yika pisama ria pisama.

⁷ Abebiyi mambu amoba o gusu bolaba yisonyi na bokambulu, botsu bosutusu mu mbari Nsambi agobawagula.

⁸ Tumba menu nyina tindi mangolu na nyina Yinyunyi yiFumu, nyina tindi dusungugu na bukidi ujabisa baIsrael dibi diogu nojabisa bategula baJacob disumu diogu.

Michee ubiga ebiyi dubungu duJerusalem

⁹ Nyivosi nenu na jenu milonsi mibategula baJacob na jenu bansonsi jenu adumalaba dusungugu nsoniru, adumavinsa kingu jimotsu amavu masungama.

¹⁰ Jenu aduirungisi Jerusalem na malungu mabatu na musiengi uNsambi na dikasi.

¹¹ Bansonsi betabuli bunsonsi udila milendu; bavagulitsi bapagu belonsi yiri bofutu; babiyitsi bebiyi udila lora jivema. Mbana bana bukidi unengila Fumu na bewivuli rie: Fumu agaa netu? Dibi digotudala?

¹² La dibandu Sion ofutsulu nderi nungi, Jerusalem ukaluga nderi diguki dimamanyi na mukongu uNdagu Nsambi ukaluga musiru.