Michee 2 - La Sainte Bible en Langue Yipunu

Abeviosulili musuga ogu

¹ Ka muna maguga ma ombu jogu abagewendi bilu mukolu abetasi dibi adi bovaga; aberambuyi kedi uvaga adi bamatasanga, kabogu bana bukidi udivaga.

² Na dikasi diogu benyungili manungi na bemapatuli nesi mandagu na bemabongi. Betsoyisi batu na mikuta miogu na bebapatuli biogu.

³ La dibandu Fumu evosili rie: Guluanu nyitasi uvayila batu bamunongu enu dibi. Dugokumba yiduma na dugomuewendanga tsamanga mu mbari temu atsiruyi tsiuba temu tsipurulu.

⁴ Mu yilumbu yieni bodudesanga bowimbilanga nyimbu tsimanyonyi, bowimbila rie: Tumababungu tindi ubungu, batu betu bamapatulu disiala diogu. Ka muna diambu di! Dibandu yi tuitsogusulu nana?

⁵ La dibandu dugobila na mutu o yibenguna yiFumu uduwetsiyila dikabu dienu didisiala. Abetumuni paga na mbigulu tsimubiyitsi

⁶ Bamavosa rie: Guyabiga! Guyamuetubiyila yisonyi, Nsambi agotulasa yisonyi.

⁷ Je batu baIsrael bavu balogu? Je Fumu ana manyonyoga? Je anana evayilingi? Mbe ka menu mambu mami mesoyini yika na jogu abewendi sungingi.

⁸ Fumu evosi nenu rie: Jenu dumakaluga bavinitsi babatu bami. Ava beruyili o divita na ditasa uvuma duipatuli bijungi biogu.

⁹ Duibingi bagatsi babatu bami o mandagu mogu maboti, duipatuli baana bogu duyitsu adu nyimabavega.

¹⁰ Retsamanu, wendanu! Mbura jiuvuma tsiri vava! Mu diambu dinsoruru Nsambi odubunga tindi ubunga.

¹¹ Pa mutu ana mavovosa na efuri rie: Dubanganga na malamu madisoga na mamangolu! Jandi aguna oba mubiyitsi enu. Nsambi ogukiga bansialutsu baIsrael

¹² Nyudugukiga, jenu botsu bategula baJacob nyugukiga bansialutsu baIsrael. Nyudugukiga nderi bindombu o yivanga yiogu nderi mugamba va mbura ajivu bisinga binyelili.

¹³ Jandi oyibali nsila orela va gusu enu; odupongumunina yiabutsu mbana dupala. Fumu aguvu kaga enu oyidubeyi.