Matthieu 9 - La Sainte Bible en Langue Yipunu

Jesus ubelusa ebelusi yibomfi

¹ Jesus amanangama o bota; amamuesabuga yiliba uwenda o dimbu diandi.

² Batu bamosi bamamubeyila yibomfi ayimaba yisilama va tangi. Jesus amalaba yitu yiogu na amavosa na yibomfi rie: Sunsa murima muana ami, masumu magu mamagutandu.

³ Milonsi mimigaga bamavosa joʼ beni na joʼ beni rie: Ka muna dilensa di!

⁴ Jesus anojaba matasa mogu amabawivula rie: Dibandu yi duitasili matasa mabi nana?

⁵ Diambu yi diwelimina uvosa: masumu magu mamagutandu vo relama na wendanga?

⁶ Nyudulasa yiri Muana Mutu ana musuga uyitanda batu masumu. Kabogu amavosa na yibomfi rie: Relama, bonga tangi agu nogabuga o ndagu agu.

⁷ Dibaala amasimbuga na amawenda o ndagu andi.

⁸ Batu banodilaba bamagaangu na goma na bamayitsa Nsambi mu mbari amagabila batu mangolu mamunongu eni.

Jesus unengila enengili Matthieu

⁹ Mbana Jesus amagusuga vana, amarasuna mubongitsi lepu, diina diandi Matthieu, atsana va mbura aji babongilanga lepu. Jesus amamunengila rie: Matthieu, nduki! Amarelama na amamuduka.

¹⁰ Babongitsi balepu na bango bikumbu bamatsana va tavula va mosi na Jesus na badukitsi bandi.

¹¹ BaJuif abamaba baPharisie banodilaba bamawivula badukitsi bandi rie: Dibandu yi mulonsi enu eji na babongitsi balepu na bango bikumbu?

¹² Jesus anodigulu amawagula rie: Batu abavu polu bagaa na nsala nganga yika bibedu.

¹³ Lewijianu Bisonu abisonugu rie: Ngerondi yiri dupagulila bibulu tumba adi nyirondi yiri duba na yingeba. Nyisamaruga ombu batu baboti tumba nyimaruga yiri bango bikumbu bokalula diela.

Bivu mu diambu diubusa uji

¹⁴ Mbana badukitsi baJean Baptiste bamaruga ombu Jesus umuwivula rie: Dibandu yi jetu na baJuif abavu baPharisie tuibusilingi uji temu na temu tumba badukitsi bagu bagedivayi ne pesu?

¹⁵ Jesus amabagabusila rie: Bambatsi bayiwela-mugetu borungula ubusa uji ava yiwela-mugetu akivu nogu? Tsatsabi! Diweru diuruga adi yiwela-mugetu obapatulu mbana bobusa uji.

¹⁶ Mutu agelondi disiengi diyikutu na yirendi yigona mu mbari yirendi yigona yigesoyini na disiengi diyikutu.

¹⁷ Na mutu agewitili malamu mamienga mu mambuta mamikata magulu. Pa evayi nana mbe mopansa mambuta mamikata na malamu mopumuga. Tumba owitila malamu mamienga mu mambuta mamikata magona yiri malamu na mambuta magobungana.

Muana uyivunda yibaJuif na mugetu agumabemba yikutu yiJesus

¹⁸ Jesus uvosa mbe akivosa mambu memama na yivunda yibaJuif amaruga uyigudama va gusu andi na amavosa rie: Muana ami amatabuga tumba ruga uyimusakiga miogu na omuevuma.

¹⁹ Kabogu Jesus na badukitsi bandi bamamuduka.

²⁰ Va gari ogu vamaba mugetu agumaba na muvuva malungu yigumi na bilima bibeji, amavioga o nsima Jesus na amabemba difubu diyikutu yiandi.

²¹ Amadivaga mu mbari amaletasa rie: Pa nyurungula ubemba nesi yikutu yiandi nyubeluga.

²² Jesus anogeluga amamulaba na amavosa rie: Sunsa murima muana ami, yitu yiagu yimagubelusa. Vana vana amabeluga.

²³ Ava Jesus amatolila o ndagu yivunda amarasuna basiyitsi bamambika na mugungi uneni,

²⁴ amavosa rie: Palanu, jenu botsu! Muana asakafu tumba amalengula mua yilu. Mu dionyi bamamudesa.

²⁵ Yiotsu ayi batu bamapalila Jesus amakota o yibuku yimuana, amamugaanga na dikaka na muana amarelama.

²⁶ Musamu eni umanyavanga biari biotsu.

Jesus ubelusa ebelusi bidunga bibeji

²⁷ Jesus anogusuga vana bidunga bibeji bimamuduka. Bimagamuganga rie: Muana David, tulasi yingeba!

²⁸ Jesus anokota o ndagu, bidunga bimamurasuna na jandi amabawivula rie: Duna yitu yiri nyurungula uduvayila dionyi! Jogu bamamuwagula rie: Nyiina, Mulonsi.

²⁹ Mbana Jesus amabemba misu mogu na amavosa rie: Diduvagulu nana dutsivayila yitu.

³⁰ Jogu bamatiemuna. Jesus amabalubusa rie: Duyaditsingula mutu.

³¹ Tumba banopala bamanyavisa diduma diJesus yiari na yiari.

Jesus ubelusa ebelusi dibaba

³² Ava batu bamosi bamaganina Jesus batu basusu bamamubeyila mutu agumaba na yinyunyi yibi ayimamurombisa uba dibaba.

³³ Yinyunyi yibi yinopalusu dibaba dimavosa. Batu bamakambulu na bamavosa rie: Na kala tusakalaba diambu nana mu Israel jiotsu!

³⁴ Tumba baJuif abamaba baPharisie bamavosa rie: Na mangolu mayivunda yibinyunyi bibi epalisili binyunyi bibi.

Jesus egaangu na yingeba

³⁵ Jesus amalinganga o misiengi miotsu no mimbu; amalonsanga o Mandagu maYibenguna; amasamunanga Musamu Uboti uDurumu duNsambi na amabelusanga bibedu bimunongu na munongu.

³⁶ Anogengila yinombu amagaangu na yingeba mu mbari amabalaba nderi bindombu abigaa na mubungulitsi.

³⁷ Mbana amavosa na badukitsi bandi rie: Digumba divu dineni tumba basalitsi bagatsi udigumbiyila.

³⁸ Kabogu wivulanu basalitsi basusu ombu Fumu agudila digumba dieni.