Matthieu 8 - La Sainte Bible en Langue Yipunu

Jesus ubelusa ebelusi yibedu yinyambi

¹ Ava Jesus amasunduyila o julu mukongu, yinombu yineni yimamuduka.

² Yibedu yinyambi amamurasuna na anokutama va gusu andi amavosa rie: Fumu, pa guirondi gurungula umbelusa.

³ Jesus amasimbula gogu amamubemba na amavosa rie: Nyirondi, beluga. Vana vana nyambi andi jimabeluga.

⁴ Mbana Jesus amavosa nandi rie: Guyaditsingula mutu. Tumba yekelasa bavagulitsi bapagu nana gumabeluyila. Vagula pagu aji Moise amaguruma yiri batu botsu bolaba gumabeluga.

Jesus ubelusa ebelusi musalitsi uyivunda yibagora

⁵ Ava Jesus amakotila o Capernaum, yivunda yibagora anomulaba amamulenda rie:

⁶ Kokolu Mulonsi, musalitsi ami asilama o ndagu, akayimbanga; aka mu maguga.

⁷ Jesus amamuwagula rie: Oo, nyuwenda uyemubelusa.

⁸ Yivunda yibagora amamugabusila rie: Mulonsi, nyisaawelimina yiri nyugudila o ndagu ami. Ka vosa yika uvosa na musalitsi ami obeluga.

⁹ Menu wami nyivu o tsi durumu dubivunda na nyina bagora aba nyirumi. Nyirumi umosi rie: Wenda! Na ewendi; nyirumi ususu rie: Ruga! Na eruyi; nyirumi musalitsi ami rie: Vaga riana! Na edivayi.

¹⁰ Jesus amakambulu ava amagululu mambu memama, amageluga ombu batu abamamudukanga na amavosa rie: Nyiruyilanga nyisakalaba yitu yimunongu egugu, nesi o Israel.

¹¹ Jabanu rie: Ava Durumu duNsambi dujabununu bapuela boruga o tandu nobanda na boba va tavula na Abraham na Isaac na Jacob.

¹² Tumba jogu abamakonda ukota bobuagu o pisama ajivu o dulombili, aguna bolilanga nonyonganga.

¹³ Mbana Jesus amavosa na yivunda yibagora rie: Ka gabuganga, adi gutsitasa dimaguvagulu. Muna diweru dieni musalitsi andi amabeluga.

Jesus ubelusa ebelusi bapuela

¹⁴ Mbana Jesus amamuewenda o ndagu Pierre, amarasuna boji buPierre asilama mu mbari amaba na dibagu.

¹⁵ Jesus amabemba dikaka diandi na dibagu dimasaguga; mbana jandi amasimbuga ubalambila.

¹⁶ Wisi unotsima batu bamabega abamaba na binyunyi bibi ombu Jesus. Jesus yika uvosa amavosa na binyunyi bibi bimabadunda na bibedu biotsu bimabeluga.

¹⁷ Amadivaga udugusu adimavosu na Esaie mubiyitsi rie: Jandi amagusula bubomfi buetu nesi maali metu.

Batu mbe baronda uduka Jesus

¹⁸ Jesus anolaba puela batu bemutsiengili amaruma rie: Sabuganu o disimu dina diyiliba.

¹⁹ Mulonsi umigaga amaruga ombu Jesus amavosa rie: Mulonsi, nyirondi uwenda nagu mbura tsiotsu atsi guwendanga.

²⁰ Jesus amamugabusila rie: Bandetsi bana bapuiti na batsoli bana muva tumba Muana Mutu agaa na mbura usilimina uyevuma.

²¹ Mutu ususu agumaba mudukitsi andi amavosa rie: Mulonsi, nsingisi uyetsiga mfumbi ami.

²² Tumba Jesus amamugabusila rie: Nduki, dunda abafu! Jogu botsiga mfumbi tsiogu.

Jesus uvotsa evotsi mungudi

²³ Jesus amanangama o bota na badukitsi bandi.

²⁴ Mungudi uneni umasundila ugumba te na bota jimabubasa mamba. Jesus amaba yilu.

²⁵ Badukitsi bamawenda ombu Jesus bamamurambusa novosa ne: Fumu, tugobuli! Yika ufu tukafuanu!

²⁶ Jesus amabawagula rie: Dibandu yi duna goma? Ka yitu ugeyi yi! Jesus anosimbuga amasiemba punga na mingiba bimavola sui; duvotsu dumaba duneni.

²⁷ Botsu bamakambulu puela, bamavosa joʼ beni na joʼ beni rie: Munongu mutu yi avu? Labatianu nesi punga na mingiba bimudedili!

Jesus ubelusa ebelusi babaala babeji abamaba na binyunyi bibi

²⁸ Jesus amatola o bulongu buGadarenie o disimu dimosi diyiliba na amabenguna na babaala babeji abamaruyila o mambina. Babaala beni bamaba na binyunyi bibi na bamaba na bukanyi te na batu basamamuevioganga muna nsila eni.

²⁹ Vana vana bamagamuganga rie: Muana Nsambi, diambu yi divu va gari jetu nagu? Gutsiruga uyitukilisa? Tsia diweru disakatola?

³⁰ Vana mbura eni bamaba mugamba bangulu agumarombanga biguji.

³¹ Binyunyi bibi bimavosa na Jesus rie: Tusingisi utsana ombu bangulu.

³² Jesus amabatsingula rie: Wendanu! Bimabapalila na bimakota ombu bangulu. Bangulu botsu bamasundila uvindama mukongu, bamakebuaga o yiliba na bamafu muna.

³³ Babaala abamakelisanga bangulu banodilaba bamawenda mambangu o musiengi na bamayenanyavisa musamu.

³⁴ Mbana bisi musiengi botsu bamayebengusana Jesus, banomurasuna bamamulenda rie: Kokolu gusuga!