Matthieu 7 - La Sainte Bible en Langue Yipunu

Duyatabulila basusu bunsonsi

¹ Duyatabulila basusu bunsonsi na Nsambi agodutabulila bunsonsi.

² Mu mbari Nsambi odutabulila bunsonsi nana dumatabulila basusu na odufundisa na maruma ama dumafundisila basusu.

³ Mu mbari yi guilabili yiriri ayivu o disu dimuana taji agu na gugelabi dupaju aduvu o disu diagu?

⁴ Tsie guvosila na muana taji agu rie: Kokolu tugusuli yiriri ayivu o disu diagu? Gugelabi dupaju aduvu nagu?

⁵ Ka muna penda ji! Legusula dupaju aduvu o disu diagu mbana gulaba nana gugusulila yiriri ayivu o disu dimuana taji agu.

⁶ Duyagabila bamondi abivu biboti, boduvayila bukanyi; duyabuayila bangulu musanga aguvu na baperala, bogutsiarila.

Vondanganu, rombanganu na dukisanganu

⁷ Vondanganu, duvegungu; rombanganu, dulabanga; dukisanganu na dudibululungu.

⁸ Mu mbari uotsu oyivondingi edilingi, jandi oyirombingi elabingi na bedibulilingi oyidukisingi.

⁹ Anyi va gari enu ovega muana dimanyi pa emuvondi dipa?

¹⁰ Gumuvega ngongula pa evondi nyama tsimamba?

¹¹ Lesa jenu babi duijabi uvayila baana benu maboti tambusa na Taji ajivu o julu! Agovega maboti ombu jogu abemuvondi?

¹² Motsu ama duirondi yiri batu baduvayili, bavayilianu munongu mosi. Migaga miMoise na malongi mababiyitsi bimalonsa mambu meni.

Munu ndagu ubandana

¹³ Kotanu va munu ndagu ubandana mu mbari munu ndagu ujega uisupuyi te no nsila ajivu vumbila ajisupuyi o bulungi bumuji; bapuela bevioyili muna nsila eni.

¹⁴ Tumba munu ndagu ubandana uisupuyi te no nsila ajiviosi mutu o monyu; tsiri bapuela abejivioyili.

Muiri na milunda

¹⁵ Lubuganu, babiyitsi bamfurulu uruga beruyi! Belabini nderi bavu bindombu kabogu bavu baminsi.

¹⁶ Dubajaba mu diambu dibifu biogu. Bagedokuli dilanga difubu mu mingengatogu vo mimanga mu yifundi, mbeyianu?

¹⁷ Muiri mubusi uiburi milunda miboti tumba muiri yinguma ugeburi milunda.

¹⁸ Yinguma ugorungula ubura milunda vo mubusi ugorungula ubura milunda mibi.

¹⁹ Miri miotsu amigeburi milunda miboti miuwangu nobuagu o muji.

²⁰ Kabogu munongu mosi dujaba babiyitsi bamfurulu na bifu biogu.

Viaga, ngedujabi

²¹ Ava Durumu duNsambi dujabununu tsiri jogu botsu abevosi rie: Fumu, Fumu bodujaba tumba yika jogu abevayi durondu duTaji ami ajivu o julu.

²² Bapuela bokwivula mu yilumbu yieni rie: Fumu, Fumu, jetu tusamabiga mu diina diagu? Tusamapalisa binyunyi bibi mu diina diagu? Na tusamavaga bimaga bipuela mu diina diagu?

²³ Mbana nyubawagula rie: Viaga! Ngedujabi; kakananu nami, jenu aduivayingi masumu.

Tungitsi beji

²⁴ La dibandu uotsu oyigulu mambu ama nyibanovosa na emadedili ebagunu na mutu diela agumarunga ndagu andi va julu dugunga.

²⁵ Mfula jimanoga, nyidu jimabasa, mungudi umagumba na biotsu bimasingama ndagu eni tumba jisamarakuga mu mbari jimarungu va julu dugunga.

²⁶ Tumba uotsu oyigulu mambu ama nyibanovosa na agemadedili ebagunu na yiduka ayimarunga ndagu va yisieyi.

²⁷ Mfula jimanoga, nyidu jimabasa, mungudi umagumba na biotsu bimasingama ndagu eni. Jimarakuga na mudunsu ujionyi umaba uneni.

Musuga uJesus

²⁸ Ava Jesus amamanina na malongi meni batu bamakambulu na ndonsulu andi

²⁹ mu mbari amalonsa na mangolu tsiri nana milonsi mimigaga mimalonsilanga.