Matthieu 6 - La Sainte Bible en Langue Yipunu

Malongi mu diambu diugabila bijaga

¹ Kebananu yiri dugokematisa va gusu batu mu diambu dibifu bimuyitsa enu. Pa duivayi nana dumakesakulu na Taji enu ajivu o julu agomuedubuesa yisusu.

² Disusu, ava guigabili bijaga guyawansa muansu nana baboti bamiunu bevayili o Mandagu maYibenguna vo ava belingili. Bedivayi yiri bogobusu na batu. Jabanu rie: Bamakesakulu.

³ Tumba ava guigabili bijaga divayi o musuega yiri ne mbatsi agu agodijaba;

⁴ diboti diagu divagu o musuega. Taji agu oyilabi adi guivayi o musuega ogusaka.

Malongi mu diambu didusambu

⁵ Ava duisambili duyaba nana baboti bamiunu. Berondi uretsama nokelasa ava besambilili o Mandagu maYibenguna nesi mu mansila. Jabanu rie: bamakesakulu.

⁶ Tumba ndeʼ pa guna nsala usambila, kota o ndagu, dibiga diguyi na sambila Taji agu ajivu nagu guna. Taji agu oyilabi adi guivayi o musuega ogusaka.

⁷ Avaduisambilili duyavosa popopu nana abageduki Nsambi. Betasi yiri bogulunu na Nsambi mu diambu diposulu tsiogu.

⁸ Duyabagukulila mu mbari Nsambi aji Taji enu na ejabi nsala tsienu ne mbe dusakamuwivula.

⁹ Guluanu nana dusambililanga rie: Tata etu ajivu o julu, diina diagu dibi yingitsi;

¹⁰ Durumu duagu duruyi; durondu duagu duvagu mu tsi nana duivagulu o julu.

¹¹ Tuveyi namunyi biguji biyilumbu yieyiyi;

¹² tutandi masumu metu nana jetu wetu tuitandili abetuvayili mabi;

¹³ tuveyi mangolu urina mbangulu yiri diabu agotuviolila. (Mu mbari ombu gagu uvu durumu na mangolu na bundumba mutubu na mutubu. Amen.)

¹⁴ Pa jenu duitandili batu basusu mabi mogu, Taji enu ajivu o julu odutandila wandi.

¹⁵ Tumba pa dugetandili batu basusu mabi mogu Taji enu agodutandila masumu menu.

Malongi mu diambu diubusa uji

¹⁶ Ava duibusili uji duyatunga tsisi nana baboti bamiunu abelingingi fietiti ulasa adi bevayi. Jabanu rie: bamakesakulu.

¹⁷ Tumba pa ndeʼ guibusi uji, buila nogolila matsi yiri batu bagojaba adi guivayi.

¹⁸ Yika Taji agu ojivu nagu ojaba, oyigulabi o musuega ogusaka.

Busina bujulu

¹⁹ Duyaromba usuega busina bubutamba buebubu abu batsielili na maali bibungi vo abu badayitsi bedayi.

²⁰ Tumba rombanu busina bujulu; abugobembu na batsielili nesi maali nesi badayitsi.

²¹ Mu mbari muna mbura aji busina buvu avana murima uvu wandi.

Yijalala yidunyuru

²² Misu la yijalala yidunyuru. Pa misu magu magaa na dumungi guilabi yijalala tumba yiotsu ayi misu mavu na birieri guilabi yika pisama.

²³ Kabogu yijalala yiyatsima vo guba o tsi pisama tindi pisama!

Nsambi na busina

²⁴ Mutu agorungula usalila fumu beji: ovina umosi noronda ususu; vo oyitsa umosi nolensa ususu. Munongu mosi nenu, dugorungula usalila Nsambi na busina va mosi.

Murima usunduga

²⁵ La dibandu nyidutsingulili rie: Duyaketsoyisa na nsanunu tsienu: nesi mu diambu dibiguji nesi mu diambu dibinuigu nesi mu diambu dibiduaru. Muvumu uiviolili biguji na dunyuru duiviolili biduaru.

²⁶ Labatianu batsoli: bagevari vo utsonsiga na bagaa na bitala vo bisuegulu ne nana Taji enu ajivu o julu ebabunguli. Tsia jenu duiviolili batsoli buneni?

²⁷ Anyi va gari enu orungula ubuesa bilima mu nsanunu tsiandi mu mbari amaketsoyisa?

²⁸ Dibandu yi duiketsoyisila mu diambu dibiduaru? Gengilatianu nana bafelera bebendili: bagesali vo ubuanga.

²⁹ Tumba nyidutsinguli yiri Salomon mu busina buandi asamarungula uduara nana bonyi.

³⁰ Kabogu pa Nsambi ekipi mambu mabafelera abavu na kembu yilumbu yimosi na yilumbu yisusu bamagumuga, agorungula ukipa diambu dibiduaru biagu? Ka muna yiduka yi!

³¹ Kabogu duyatata novosa rie: Yi tuji? Vo rie: Yi tunu? Vo rie: Yi tuduara?

³² Tsiri abageduki Nsambi abebirombingi? Taji enu ajivu o julu ejabi nsala tsienu.

³³ Leveganu mirima mienu ombu Fumu na jabanu dusungugu duandi mbana Nsambi oduvega motsu mana.

³⁴ Kabogu duyatata mu diambu dimambu amoba mugesa; mu mbari mugesa la mugesa. Yilumbu yiotsu yiwelimina na mambu mayionyi.