Matthieu 4 - La Sainte Bible en Langue Yipunu

Dumangu duJesus

¹ Mbana Jesus amabegu na Yinyunyi yiNsambi o kumu uyemangu na diabu.

² Anomana magumana mabilumbu na magmana mamikolu tsiri uji, amagulu nsala.

³ Diabu amamurasuna na amavosa nandi rie: Pa guji Muana Nsambi, ruma yiri mamanyi memama mokituga biguji.

⁴ Jesus amamugabusila rie: Bisonu bisonugu rie: Mutu agedilili monyu na biguji buandi tumba egudilili na mambu ama Nsambi evosingi.

⁵ Kabogu diabu amamubega o Jerusalem, amamumatisa o julu muansa uNdagu Nsambi,

⁶ na amavosa nandi rie: Pa guji Muana Nsambi, kebuaga o tsi mu mbari Bisonu bisonugu rie: Nsambi oruma biansa biandi ugukeiisa, bogukelisanga yiri gugoduku ne dibaku.

⁷ Jesus amamugabusila rie: Bisonu bisonugu wandi rie: Guyamanga Fumu Nsambi agu.

⁸ Diabu amamubega o julu mukongu uneni. Anomulasa bulongu buotsu na maboti mabuonyi,

⁹ amavosa nandi rie: Nyuguvega biotsu bina pa gukutama nokitsa.

¹⁰ Jesus amamuwaka rie: Ndundi Satan! Disonugu rie: Yitsa yika Fumu Nsambi agu nomusalila buandi.

¹¹ Kabogu diabu amamusila; vana vana biansa bimamuvinga na bimasalila Jesus.

Jesus ubanda ebandi yisalu yiandi o Galilee

¹² Jesus anogulu yiri Jean amakotusu o tsugu amawenda o Galilee.

¹³ Asamaletsana o Nazareth tumba amawenda uyetsana o Capernaum, dimbu adimaba o mugula yiliba yiGalilee o yiari yiZabulon na Neftali.

¹⁴ Dimavagu udugusu adimavosu na Esaie mubiyitsi rie:

¹⁵ Bulongu buZabulon nesi bulongu buNeftali, abuvu o yiari yimubu na o disimu dina diJourdain, bulongu buGalitee abuvu na abagaa baJuif!

¹⁶ Batu abetsaningi o pisama bolaba yijalala yineni! Ombu jogu abavu o dilongu adivu pisamajidufu yijalala yiubamonutsu.

¹⁷ Ubongila va temu eni Jesus amabanda ubalonsa diambu diedidi rie: Kalulanu diela! Durumu duFumu Nsambi duka bebeli!

Jesus unengila enengili bavubitsi bana

¹⁸ Ava Jesus amavioyila va mugula yiliba yiGalilee amalaba baana banguji babeji abamaba bavubitsi. Simon (ajimanengulungu Pierre) na muana nguji andi Andre, uvuba bevubi na mbusa tsiogu.

¹⁹ Jesus amavosa nogu rie: Ndukianu na nyuduvaga abeduti batu tsiri bavubitsi buandi.

²⁰ Vana vana bamasila mbusa tsiogu na bamamuduka.

²¹ Anowenda mua vala o gusu amalaba baana banguji basusu babeji, Jacques na Jean baana baZebedee. Bamaba o bota, jogu botsu na taji ogu Zebedee uyenalondanga mbusa tsiogu. Jesus amabanengila,

²² vana vana bamasila bota na taji ogu na bamawenda na Jesus.

²³ Jesus amalinganga o biari biotsu biGalilee; amalonsanga o mandagu mabibenguna; amasamunanga Musamu Uboti uDurumu duNsambi na amabelusanga bibedu bimunongu na munongu nesi bibomfi.

²⁴ Diduma diandi dimanyavanga o Syrie jiotsu na batu bamamubeyila bibedu bimunongu na munongu: abimagaangu na binyunyi bibi, abimabelanga sira sira na abimaba bibomfi. Jesus amababelusa.

²⁵ Batu bapuela bamamuduka abamarugasana o biari biGalilee nesi o mbura ajinengulu Digumi Dimisiengi nesi o Jerusalem no Judee te no yiari ayina yiJourdain.