Matthieu 3 - La Sainte Bible en Langue Yipunu

Malongi maJean Baptiste

¹ Mu temu eni Jean Baptiste amalabana, amalonsa o kumu jiJudee.

² Jandi amavosa rie: Kalulanu diela mu mbari Durumu duNsambi duka bebeli.

³ Jean la jandi agu Esaie mubiyitsi amaranguna ava amavosila rie: Adidi la diufi dimutu oyigamuyi o kumu rie: Solanu nsila Fumu, futsanu mansila mandi!

⁴ Jean amaduaranga bikutu abimavagu na mionyi mitsungu na amabiwarisanga na munsiyi umukata. Amajanganga makokoku na buji.

⁵ Batu bapuela bamawenda uyegulu mambu mandi. Diwendi rie: bisi Jerusalem na bisi Judee na bisi bulongu buotsu abuvu mu mugula Jourdain.

⁶ Banotubula masumu mogu va gusu batu Jean amababatisa o Jourdain.

⁷ Va gari batu abamaruga uyebatusu vamaba baJuif abamaba baPharisie na baSadducee wandi. Ava Jean amabalabila amagamuga rie: Bijolu bijenu! Anyi amadulubusa urina kabu jiNsambi?

⁸ Salanu bisalu biwelimina abiulasa yiri dumakalula diela!

⁹ Duyakematisa novosa rie: Tuji baana baAbraham! Dingensa nyidutsinguli rie: Ne na mamanyi memama Nsambi orungula ukitusila Abraham baana!

¹⁰ Diumbi dimakesingugulu vangansi tsimuiri. Kabogu muiri uotsu agugeburi milunda miboti uwangu nobuagu o muji.

¹¹ Nyidubatisi na mamba ulasa yiri dumakalula diela; tumba jandi oyiruyi o nsima ami odubatisa na Yinyunyi yiNsambi na muji. Jandi epiolili mangolu, nyisaawelimina umuvula bapondu bandi.

¹² Jandi aji akunsama na yisagulu yiandi usaga uresi. Osuega uresi o yisuegulu yiandi tumba onyensa bipupu o muji agugetsimi.

Batema jiJesus

¹³ Mbana Jesus amarambuyila o Galilee uwenda o Jourdain ombu Jean uyebatusu nandi.

¹⁴ Tumba Jean mbe abusa amavosa rie: Menu anyivu na nsala ubatusu nagu, dibandu yi guiruyili ombu gami?

¹⁵ Tumba Jesus amawagula rie: Dileba nana yiri tudugusu adivu diwelimina na Nsambi. Kabogu Jean asamamuedikikula.

¹⁶ Jesus anobatusu amasabuga mu mamba. Julu jimadibuga na amalaba Yinyunyi yiNsambi yisunduyi nana dibembi adimamubetama.

¹⁷ Mbana diufi dijulu dimagulunu rie: Agugu la muana ami udurondu. Nyilabi nsangu jineninandi.