Matthieu 26 - La Sainte Bible en Langue Yipunu

Fundu aji bamatungila Jesus

¹ Jesus anomana uvosa mambu memama amatsingula badukitsi bandi rie:

² Vesiali yika bilumbu bibeji te na feta Paque na Muana Mutu ofundu nogomunu va kurusu.

³ Mbana bivunda bivagulitsi bapagu na bivunda bisusu bamawenda fundu va dulombili duCaiphe agumaba yivunda yibavagulitsi bapagu.

⁴ Bamaromba diela uboka Jesus o musuega.

⁵ Bamavosa rie: Tuyadivaga mu temu feta mu mbari batu bakevaga nguba.

Mugetu uwitila ewitili muru Jesus muyombu

⁶ Ava Jesus amabila o Bethanie o ndagu Simon agumaba yibedu yinyambi,

⁷ mugetu amabarasuna ava betsanini va tavula. Amabega muyombu udufunu duneni; amadibula yirura na amawitila muyombu va julu muru Jesus.

⁸ Badukitsi banodilaba, bamavosa na kabu rie: Dibandu yi muyombu uibungulu nana?

⁹ Mbe umasumbusu mbe tumadila mbongu tsipuela uvega ombu bijaga.

¹⁰ Jesus anodigulu amavosa rie: Mudundianu! Dibandu yi duimulasili maguga? Jandi atsipayila diambu diboti.

¹¹ Bijaga bigowenda mbura tumba menu yika uweʼ nyiwendi.

¹² Jandi atsikotsa muyombu ukunsa dunyuiu duami te na dutsigu.

¹³ Ngensa nyidutsinguli rie: Mbura tsiotsu atsi Musamu Uboti usamunu te na malongu motsu, adi mugetu egugu atsipayila diurangumunungu.

Judas ukunsa ekunsi kwakusulu Jesus

¹⁴ Judas Iscariote, umosi va gari digumi na babeji amawenda ombu bivunda bibavagulitsi bapagu

¹⁵ na amabawivula rie: Yi dupega pa nyuduwakisa Jesus? Kabogu bamamufuta magumarieru mambongu tsilora jivema.

¹⁶ Ubongila mu temu eni Judas amaketanga Jesus umuwakisa ombu gogu.

Jesus uji eji feta Paque na badukitsi bandi

¹⁷ Badukitsi baJesus banolaba yiri yilumbu yitega yifeta jimapa magambu na dufunusu yimatola, bamawivula Jesus rie: Agunyi guirondi tuyegulambila feta Paque?

¹⁸ Jesus amagabusila rie: Wendanu o musiengi ombu simbi, dukamutsingula rie: Fumu jandi rie: Temu ami jimatola; nyirondi uji feta Paque o ndagu agu na badukitsi bami.

¹⁹ Badukitsi bamavaga nana Jesus amabalonsila na bamalamba biguji biPaque.

²⁰ Mukolu eni Jesus na digumi na badukitsi bandi babeji bamatsana va mosi va tavula.

²¹ Uji beji na Jesus amavosa rie: Dingensa nyidutsinguli rie: Umosi va gari enu omfunda.

²² Badukitsi bamalaba munyongu na bamamuwivula umoʼ umosi rie: Je menu Fumu?

²³ Jesus amabawaka rie: Jandi oyibotiyi dipa nami mu yipela omfunda.

²⁴ Muana Mutu ofu nana Bisonu bisonugulu tumba ka muna maguga ma dibaala adifundi Muana Mutu olaba! Mbe diwelimina yiri dibaala dieni asamaburu.

²⁵ Judas omamufunda amawivula rie: Tsiri menu mbe Mulonsi? Jesus amamugabusila rie: Ndejua!

Tavula Fumu

²⁶ Uji beji na Jesus amabonga dipa; anomana ugabusila Nsambi diboti amadibukula na amagabila badukitsi bandi novosa rie: Bonganu na jianu adudu la dunyuru duami.

²⁷ Mbana amabonga kopa na anomana ugabusila Nsambi diboti amabavega jionyi novosa rie: Nuanu jenu botsu.

²⁸ Amama la malungu mami amamawitulu mu diambu dibapuela; malungu mami amedugusu pangini Nsambi.

²⁹ Ngensa nyidutsinguli rie: Ngomuenu mamba meni mamilunda te na nyumanu ava Durumu duNsambi dujabununu.

³⁰ Banomana uwimbila nyimbu tsifeta, bamawenda o julu mukongu umiOlive.

Jesus ubiga ebiyi yiri Pierre omugala

³¹ Jesus amatsingula badukitsi bandi rie: Na mukolu egugu jenu botsu dutina mu mbari Bisonu bisonugu rie: Nyuboka mubungulitsi bindombu na bindombu biupansiga yiari na yiari.

³² Tumba ava nyurambuyila o dufu nyudureyila o Galilee.

³³ Pierre amamutsingula rie: Menu ngogurina, via, ne pa botsu basusu bodivaga.

³⁴ Jesus amamuwaka rie: Kebana Pierre! Ne koku akavosa mukolu egugu, gukala temu yirieru rie: Ngemujabi.

³⁵ Tumba Pierre amamuewaka rie: Tsatsabi! Ngogugala ne pa vengu nyufu nagu! Badukitsi botsu bamavosa munongu mosi.

Jesus usambila esambili o Gethsemane

³⁶ Mbana Jesus na badukitsi bandi bamatola o mbura ajinengulu Gethsemane na Jesus amabatsingula rie: Tsananu vava, nyiwendi o gusu uyesambila.

³⁷ Abamawenda nandi yika Pierre na baana baZebedee babeji. Amalaba keri na goma.

³⁸ Amabalonsa rie: Nyigulu tindi munyongu. Sialanu vava, duyawenda bilu.

³⁹ Mbana amakakana nogu nana vava na vana na amagudama va tsi na amasambila rie: Tata ami pa diwelimina ombu gagu kakisini kopa ejiji jimaguga! Tsiri duganu duami aduvagu tumba aduagu duvagu.

⁴⁰ Mbana amagabuga ombu badukitsi beni barieru na anobarasuna bilu amavosa na Pierre rie: Simon, yilu guitimbi? Gugaarungula umoga ne diweru dimosi?

⁴¹ Duyawenda bilu, sambilanu yiri dumangu dugoduviolila. Mirima mienu misingi tumba nyuru tsienu tsivu tsideda.

⁴² Amamuekakana nogu adimubeji na amasambila rie: Tata pa guirondi yiri nyunu kopa ejiji, duganu duagu duvagu!

⁴³ Mbana anogabuga ombu badukitsi amabarasuna bilu; misu yika timbila.

⁴⁴ Jesus amakakana nogu kumbu ajimurieru na amasambila munongu mosi.

⁴⁵ Mbana amagabuga ombu badukitsi na amavosa nogu rie: Sie wendanu bilu na vumanu! Diweru dimatola. Labanu Muana Mutu amavegu ombu bavayitsi bamasumu.

⁴⁶ Relamanu, tʼwendianu! Labanu oyimufundisi amaruga.

Ugaanga begaangi Jesus

⁴⁷ Jesus yika uvosa evosi na Judas, umosi va gari digumi na badukitsi babeji, na batu bapuela abamaba na majenga na banguangu bamaruga. Bamasindugu na bivunda bibavagulitsi bapagu na bivunda bisusu.

⁴⁸ Judas amabavega yilimba kala rie: Agu nyubumba la jandi, mugaangianu!

⁴⁹ Yika Judas etoli ombu Jesus amavosa rie: Mulonsi! Na amamubumba.

⁵⁰ Jesus amamutsingula rie: Mbatsi ami, lensa novaga adi gumavangana. Kabogu batu beni bamagaanga Jesus.

⁵¹ Umosi agumaba vana amasomuna dijenga na amatabula musalitsi uyivunda yibavagulitsi bapagu dituji.

⁵² Mbana Jesus amavosa nandi rie: Gabusa dijenga diagu mu yisupu. Oyitoyi na dijenga oboku na dijenga.

⁵³ Dugejabi yiri nyurungula uwivula Taji ami utindila digumi na binombu bibeji bibiansa?

⁵⁴ Tumba pa nyudivaga Bisonu bigodugusu abimasonugu rie: Anana diubila.

⁵⁵ Mbana Jesus amabawivula rie: Kabogu dutsiruga na majenga na banguangu nana ombu yikongu? Bilumbu biotsu nyibetsi nenu o Ndagu Nsambi uyelonsa na dusamakaanga.

⁵⁶ Mbukua, vagaa diambu, vengu mambu mababiytsi amamasonu mu madugusu. Mbana badukitsi botsu bamamurina.

Jesus va gusu bivunda bineni

⁵⁷ Bamatolisa Jesus o ndagu yivunda yibavagulitsi bapagu (diina diandi Caiphe) aguna bamarasuna bivunda bibavagulitsi bapagu na bivunda bisusu na milonsi mimigaga.

⁵⁸ Pierre amayenadukanga Jesus va gegeyi te na amakota va dulombili duyivunda yibavagulitsi bapagu. Amayetsana na bagora te na diambu diuvosu.

⁵⁹ Bivunda bibavagulitsi bapagu na bivunda biotsu bisusu bamaronda ufunda Jesus tumba basamadila ne diambu dimosi umuvega mbela dufu.

⁶⁰ Diuleba bambeji bapuela bamamana miunu miogu, misamaba kingu mosi. Mbana babeji bamaretsama;

⁶¹ bamafunda Jesus rie: Jetu tumagulu ava amavosila rie: Nyupansa Ndagu Nsambi ajiji ajimarunga na batu. Yiotsu ayi bilumbu birieru biusuka nyukemanina jisusu.

⁶² Mbana yivunda yibavagulitsi bapagu amarelama na amawivula Jesus rie: Gugewaguli? Gugegulu begufuengilili?

⁶³ Jesus amavola sui! Yivunda yibavagulitsi bapagu amavosa nandi rie: Leva na diina diNsambi ajivu monyu yeri guji Christ Muana Nsambi.

⁶⁴ Jesus amamuwaka rie: Gumadivosa! Jabanu rie: O gusu dulaba Muana Mutu otsana va mabaala maNsambi mangolu na osunduyila o julu va gari mamungi.

⁶⁵ Mbana yivunda yibavagulitsi bapagu amapasa bidiiaru biandi na amagamuga rie: Ka muna dilensa di! Tugomueromba bambeji basusu! Jenu dutsimugulu nana elensili Nsambi.

⁶⁶ Bunsonsi yi dumutabulila? Botsu bamavosa kingu mosi rie: Ana mbela, afuangingi!

⁶⁷ Bamosi bamamufuta mateji; bamamukubiga yinsi na banomudimba

⁶⁸ bamamuwivula rie: Jabati! Anyi atsigudimba?

Pierre ugala egali Jesus

⁶⁹ Pierre aki atsana va dulombili na mugetu agumaba musalitsi uyivunda yibavagulitsi bapagu amavosa nandi rie: Ndeʼ wagu gubetsi na Jesus jimuisi Galilee, mbe?

⁷⁰ Tumba va gusu batu botsu amagala rie: Ngemujabi! Ngegulu adi guivosi.

⁷¹ Mbana Pierre amapala va piasu na musalitsi ususu amamulabilila na amavosa na jogu abamaba vana rie: Jandi guna abetsi na Jesus jimuisi Nazareth.

⁷² Pierre amagala adimubeji rie: Dingensa, ngejabi mutu eni.

⁷³ Mua pesu temu abamaba vana bamamuevosa na Pierre rie: Guyagala, guji mutu ogu mu mbari posulu tsiagu tsigujabisi.

⁷⁴ Mbana Pierre amabanda uvosa kulini noleva pesi rie: Nsambi jaʼ beni ejabi! Ngemujabi. Vana vana koku jimavosa.

⁷⁵ Mbana Pierre amarangimina adi Jesus amamutsingula rie: Nesi koku akavosa, gukala kumbu yirieru. Anodirangimina amalila ria munyongu.