Matthieu 25 - La Sainte Bible en Langue Yipunu

Nongu jidugumi ditsiemi

¹ Durumu duNsambi duibagunu na digumi ditsiemi adimawenda na balambi bogu uyebengusana yiwela-mugetu.

² Va gari ogu vamaba baranu abamaba biduka na baranu abamaba na diela.

³ Biduka bamawenda yika na balambi na balambi

⁴ tumba abamaba na diela bamawenda na mbuta tsimatsi na balambi bogu wandi.

⁵ Yiwela-mugetu amatsinga kabogu botsu bamanyingila na bamawenda bilu.

⁶ Ava gari mukolu mugamu umagulunu rie: Yiwela-mugetu amaruga! Wendanu umubengusana.

⁷ Mbana digumi diotsu bamarambuga na bamasusa balambi bogu.

⁸ Biduka bamavonda badiela rie: Tuveyianu mua matsi, balambi betu yika utsima bakatsima.

⁹ Abadiela bamabawaka rie: Magatsi, magodugu jetu nenu. Wendanu noyesumba amenu.

¹⁰ Yika uwenda bewendi uyesumba matsi na yiwela-mugetu amaruga. Abamaba bakunsama bamakota va mosi nandi uyeji mulambu; kabogu bamadibiga diguyi.

¹¹ Mua pesu temu biduka bamaruga na bamagamuga rie: Kokolu tsiagu tudibulili.

¹² Tumba jandi amabagabusila rie: Nesi, ngedujabi.

¹³ Mbana Jesus amasitisa rie: Lubuganu, yilumbu vo diweru bigejabunu.

Nongu jibasalitsi barieru

¹⁴ Durumu duNsambi duibagunu na mutu agumawenda o ulinga: amawakisa bisalu biotsu ombu basalitsi bandi.

¹⁵ Amavega mutu mutu atsivu tsiwelimina na mangolu mandi: ombu umosi kama yiranu tsimbongu tsilora, ombu ususu kama beji tsimbongu tsilora nombu agumurieru kama mbongu tsilora. Mbana amabaganina.

¹⁶ Vana vana omadila kama yiranu amatsisalisa na amadila kama yiranu tsisusu.

¹⁷ Omadila kama beji amavaga munongu mosi na amadila kama beji tsisusu.

¹⁸ Omadila kama amatima yiduna na amayesuega mbongu tsilora tsifumu andi.

¹⁹ Fumu anotsinga o ulinga amaruga na amawivula mutu mutu ulasa nana amafunisila tsiandi.

²⁰ Omadila kama yiranu tsimbongu tsilora amaruga na amawakisa kama yiranu tsisusu ombu fumu.

²¹ Fumu amamudodisa rie: Ka muna ubueji gu! Musalitsi uboti, gutsisigama na bisalu bigeyi kabogu nyuguvega abineni. Kota na laba nsangu nami.

²² Omadila kama beji tsimbongu tsilora amaruga na amavosa rie: Fumu gumapega kama beji; laba, tsimafuna kama beji tsisusu.

²³ Fumu andi amamudodisa rie: Ka muna ubueji gu! Musalitsi uboti, gutsisigama na bisalu bigeyi kabogu nyuguvega abineni. Kota na laba nsangu nami.

²⁴ Omadila kama mbongu tsilora buandi amaruga wandi na amavosa rie: Fiynu nyijabi yiri guji mutu uranga: guitsonsiyi abi gusamavara na guigukiyi abi gusamakuka.

²⁵ Nyimagulaba goma kabogu nyimatima yiduna uyesuega kama tsimbongu tsilora tsiagu. Laba, mbongu tsiagu aratsi!

²⁶ Fumu andi amamusiemba rie: Guji musalitsi ubi na mutsoritsi! Gusamajaba yiri nyitsonsiyi abi nyisamalesala na nyigukiyi abi nyisamalekuka?

²⁷ Kabogu dibandu yi gusamaveyila mbongu tsiami ombu jogu abejabi ukelisa mbongu? Mbe nana mbe nyimadila mua mbika.

²⁸ Mupatulianu kama mbongu tsilora tsieni na tsiveyianu ombu jandi ojivu na kama yiranu.

²⁹ Mu mbari jandi ona yima obuesu tumba jandi ogaa na yima opatulu ne ayi etasi ayivu nandi.

³⁰ Mu diambu dimusalitsi agugu, mubuayianu o pisama; aguna olilanga na onyonganga.

Bunsonsi abusita

³¹ Ava Muana Mutu oruyila nana kaga na biansa biandi, jandi otsana va yitsiga yibufumu na malongu motsu obenguna va gusu andi.

³² Jandi ogaba batu nana mubungulitsi ekakisini bindombu na binsabi:

³³ oviosa bindombu va mabaala mandi na binsabi va magetu mandi.

³⁴ Mbana kaga ovosa na batu abavu va mabaala mandi rie: Jenu aba Tata amagabila miula, ruganu! Dilanu bufumu abumadukunsulu ubanda vana dusundulu dubulongu.

³⁵ Nyimagulu nsala na dumapega biguji; nyimagulu puila na dumapega mamba; nyimaba muenyi na dumandila;

³⁶ nyimaba penyi na dumapega tsanda; nyimabelanga na dumandingulanga; nyimaba o tsugu na dumandingulanga.

³⁷ Abasungama bomuwivula rie: Fumu temu yi tumagulabila na nsala na tumaguvega biguji vo na puila na tumaguvega mamba?

³⁸ Temu yi tumagulabila muenyi na tumagudila vo penyi na tumaguvega tsanda?

³⁹ Temu yi tumagulabila nobela vo o tsugu na tumagulingula?

⁴⁰ Kaga obagabusila rie: Temu tsiotsu atsi dumawamusa baana baTaji bami dumakwamusa.

⁴¹ Kaga ovosa na batu abavu va magetu mandi rie: Kakananu nami jenu adumalogu na Nsambi! Dilanu bulungi bumuji abumakunsulu diabu na biansa biandi.

⁴² Nyimagulu nsala na dusamapega biguji; nyimagulu puila na dusamapega mamba;

⁴³ nyimaba muenyi na dusamandila; nyimaba penyi na dusamapega tsanda; nyimabela na nyimaba o tsugu na dusamandingula.

⁴⁴ Bowivula wandi rie: Fumu, temu yi tumagulabila na nsala vo puila vo penyi vo ubela vo o tsugu na tusamaguwamusa?

⁴⁵ Obagabusila rie: Jabanu rie: Temu tsiotsu atsi dusamawamusa baana baTaji bami dusamakwamusa.

⁴⁶ Kabogu jogu bovioga o diguga dimutubu tumba abasungama bovioga o monyu umutubu.