Matthieu 23 - La Sainte Bible en Langue Yipunu

Malubu maJesus mu diambu dimilonsi mimigaga na baJuif abamaba baPharisie

¹ Mbana Jesus amalonsa batu na badukitsi bandi rie:

² Milonsi mimigaga na baJuif abavu baPharisie bana musuga uvindiga migaga miMoise.

³ Kabogu guluanu ama belonsi tumba duyaduka bifu biogu. Mu mbari bavu misotsi mibabongu.

⁴ Benangusi batu mifuna mitsira tumba bebusi ubamuna kata.

⁵ Besali biogu biotsu va gusu batu ukematisa. Betungi mumba mabibuku biMambu maNsambi va mbami tsiogu nesi va miogu na besakiyi matsatsa mu mafubu mabilinga biogu.

⁶ Berondi bitsiga bibatu baneni o milambu nesi o Mandagu maYibenguna.

⁷ Berondi uyitsungu na batu botsu na berondi unengulungu rie: Mulonsi.

⁸ Disawelimina yiri bodunengila milonsi mu mbari duji baana baTaji na duna Mulonsi umosi buandi.

⁹ Duyavaga mutu vava tsi Taji imi mbari duna Taji mosi buandi, jandi ojivu o julu.

¹⁰ Disawelimina yiri bodunengila Sefu mu mbari duna Sefu jimosi, la Christ.

¹¹ Aguvu muneni va gari enu abi musalitsi enu.

¹² Uotsu okematisa osundusu na uotsu okesundusa omatusu.

Jesus enengili milonsi mimigaga na baJuif abamaba baPharisie bijaku

¹³ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Jenu duigayi batu aberondi ukota o tsi Durumu duNsambi diuleba jenu beni dugerondi udukota, yika ugaga duigayi basusu. [

¹⁴ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Duidayili bakuili na duisambili popopu yiri batu bodugengila. Ka muna mukilu gu jenu dukilusu.]

¹⁵ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Duilingi yiari na yiari uyenakotisa batu o muyitsa enu, ava dubadil ili duibabivisi tindi ubivisa te na bodurela o bulungi bumuji.

¹⁶ Ka muna maguga ma jenu badunsitsi dulaba! Duivosi rie: Pa mutu oleva pesi jiNdagu Nsambi, agaa na diambu tumba oyilevi pesi jilora ajivu o Ndagu Nsambi, amagana kaka.

¹⁷ Jenu bijaku duvu! Tsiri Ndagu Nsambi ajivu jisiema? Tsia Ndagu Nsambi jilasi usiema ulora?

¹⁸ Duivosi rie: Pa mutu oleva pesu jiyinyensulu yipagu agaa na diambu tumba pa oleva pesi jipagu ajivu va yinyensulu yipagu, amagana kaka.

¹⁹ Jenu bijaku duvu! Tsiri yinyensulu yipagu ayivu yisiema? Tsia pagu jigovagulu va yinyensulu?

²⁰ Jandi oyilevi pesi jiyinyensulu yipagu elevi yionyi na biotsu abimavagulu;

²¹ jandi oyilevi pesi jiNdagu Nsambi elevi jionyi na Nsambi oyitsani muna

²² jandi oyilevi pesi jijulu elevi yitsiga yiNsambi na jandi oyitsani va yionyi.

²³ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Duiveyi yimosi mu digumi mu miguba na milingidi, amana mavu mawelimina tumba duibusi udedila Mambu mangensa mamigaga, diwendi rie: dusungugu, yingeba na businginyi.

²⁴ Badunsitsi! Guluanu nongu ejiji: Pa duilabi yifuru mu yilasi yimamba duipuyi tumba duimini yilela.

²⁵ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Nyiina, duisusi yijujulu yikopa na yipela tumba o gari ukivu muinsi, diwendi rie: duna dikasi na nyinga.

²⁶ Jenu bijaku duvu! Lesusanu o gari kopa mbana yijujulu yiulioma wandi.

²⁷ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Guibagunu na ngila atsimabumbu, atsilabini nderi tsiboti tumba o gari tsivu yika bivisi na mbunga na muinsi.

²⁸ Munongu mosi batu bedulabi nderi duvu batu baboti tumba duvu na penda na duivayi mabi.

Jesus ubiga ebiyi nana bokilusulu

²⁹ Ka muna maguga ma jenu milonsi mimigaga na jenu baPharisie dulaba! Jenu bijaku duvu! Duibumbi ngila tsibabiyitsi na duiminsi ngila tsibatu basungama.

³⁰ Duivosi rie: Jetu mbe tumaba mu temu bataji betu mbe tusamaboka babiyitsi.

³¹ Kabogu duisingi yiri duji bategula babatu abamaboka babiyitsi?

³² Tsie manisilianu yisalu yibataji benu!

³³ Bijolu! Baana babijolu! Tsie durinina mbela dufu?

³⁴ Jabanu rie: Nyudutindila babiyitsi na batu badiela na milonsi; bamosi dudimba mikasa o Mandagu maYibenguna na bamosi dubinga.

³⁵ Diwendi rie: dufu duabasungama duvu va julu miuru mienu ubongila na Abel te na Zacharie muana dibaala uBarachie agu dumaboka va gari Ndagu Nsambi na yinyensulu yipagu.

³⁶ Jabanu rie: Mbela jiotsu jiuba va julu miuru mibatu batemu ejiji.

Jesus na Jerusalem

³⁷ Jerusalem, Jerusalem! Duiboki babiyitsi na duitindili bilumbi biNsambi mamanyi! Ngorungula udutsingula kumbu kwe mbe nyironda udugukiga nana koku egukiyili baana bandi o tsi mapapi tumba dusamagaru!

³⁸ Kabogu Ndagu enu jiusiala mududu!

³⁹ Jabanu rie: Dugomuendaba te na temu aji duvosa rie: Nsambi agabili jandi oyiruyi mu diina diFumu miula!