Matthieu 22 - La Sainte Bible en Langue Yipunu

Nongu jimulambu udiwela

¹ Jesus amamuelonsa batu na banongu. Amavosa rie:

² Durumu duNsambi duibagunu na kaga ajimalambila muana andi mulambu udiwela.

³ Amasindiga basalitsi bandi utsingula abamanengulu rie: Wagulanu, biotsu bimakunsama. Tumba basamawagula.

⁴ Amamuesindiga basalitsi basusu uvosa rie: Ka wagulanu! Biotsu bimakunsama, bibulu bivonga bimaboku kala. Tʼwendianu!

⁵ Tumba basamamuewagula; yika upansiga bamapansiganga: agugu o nungi andi, aguna o yisalu yiandi

⁶ na basusu bamadimba noboka basalitsi.

⁷ Kaga amanyoga na amasindiga bagora bandi uyeboka bikongu bienr nonyensa misiengi miogu.

⁸ Mbana amanengila basalitsi, jandi rie: Mulambu udiwela umakunsama tumba abamanengulu bagaabetsi bawelimina.

⁹ Kabogu nengilanu botsu aba dulaba mu mansila uyiji mulambu ami.

¹⁰ Basalitsi beni bamawenda na bamayegunga botsu aba bamalaba, ne babi ne baboti te na ndagu jimabasa.

¹¹ Kaga amawenda uyebagengila na amalaba mutu agusamaba na yiduaru yiwelimina.

¹² Kaga amamuwivula rie: Mbatsi ami, anyi atsigukotisa gunu na yiduaru yieni? Mutu eni amabusa uwagula.

¹³ Mbana kaga amavosa na basalitsi bandi rie: Mutungianu, mubuayianu o pisama! Aguna olilanga na onyonganga.

¹⁴ Mbana Jesus amabuela rie: Bapuela bamanengulu tumba yika pesu bamasoluga.

Bivu mu diambu diufuta lepu

¹⁵ BaJuif abamaba baPharisie bamaronda ulega Jesus kabogu bamawenda o fundu.

¹⁶ Bamasola bamosi va gari ogu na bambatsi baHerode; bamabasindiga ombu Jesus. Bamavosa nandi rie: Mulonsi, tuijabi yiri ama guivosi na ama guilonsi mavu mangensa. Tuijabi yiri gugegengili buneni bumutu nana mutu mutu eketasila.

¹⁷ Tumba guilonsi duganu aduvu na Nsambi ombu mutu uotsu. Letutsingulati divu diwelimina yiri jetu tufuta dumandu ombu kaga?

¹⁸ Jesus anojaba yiri diela besoyi amawaka rie: Baboti bamiunu mu mbari yi duimbangili?

¹⁹ Ndasianu dubongu dumosi. Bamamuvega dumosi

²⁰ na Jesus amabawivula rie: Yigolini yinyi na bisonu binyi bivu muna?

²¹ Bamamuwaka rie: Kaga. Mbana amabatsingula rie: Kabogu veganu abi kaga ombu kaga na abi Nsambi ombu Nsambi.

²² Kabusulu tsiandi tsimabakambisa kabogu bamayenawenda.

Bivu mu diambu dudurambugu duabafu

²³ Muna yilumbu yieni baJuif abamaba baSadducee bamawenda ombu Jesus. (La jogu abevosi yiri abamafu bagorambuga.)

²⁴ Bamavosa nandi rie: Mulonsi, Moise amatusila diruma diedidi rie: Pa mutu amafu nosila mugatsi agusakabura na kala muana nguji andi amuweli yiri baburili mutu agumafu baana.

²⁵ Vamaba yisambuali yibaana banguji. Agutega amawela na amafu tsiri ubura baana. Agumubeji amabialila mukuili.

²⁶ Dimaba munongu mosi te na yisambuali yiotsu.

²⁷ Mbana mugetu wandi amafu.

²⁸ Kabogu ava durambugu duabafu mugatsi nyi oba? Jandi asamaleba mugatsi uyisambuali yiotsu?

²⁹ Jesus amabagabusila rie: Jenu duna mbela mu mbari dugetsiyisi Bisonu na dusakajaba mangolu maNsambi.

³⁰ Mu mbari ava durambugu du-abafu, babaala bagomuewela bagatsi na bagetu bagomueba na balumi tumba boba nana biansa abitsani o julu.

³¹ Mu diambu dudurambusu duabafu jenu mbe dusakaranga mambu maNsambi amevosi rie:

³² Menu la Nsambi Abraham na Nsambi Isaac na Nsambi Jacob? Diwendi rie: Nsambi agaa Nsambi jibatu abamafu tumba jibatu abavu monyu.

³³ Batu banogulu malongi maJesus bamagaangu leli.

Diruma adiviolili motsu

³⁴ Ava baPharisie bamagululu yiri posulu tsiandi tsimaleliga baSadducee bamawenda ombu gandi.

³⁵ Bamasola mulonsi umigaga umulega kabogu amamuwivula rie:

³⁶ Mulonsi, va gari maruma motsu, diruma yi diviolili motsu?

³⁷ Jesus amamugabusila rie: Ronda Fumu Nsambi agu na murima agu uotsu na matasa magu motsu na mangolu magu motsu.

³⁸ Adidi la diruma adiviolila motsu.

³⁹ Adimubeji adidi rie: Ronda mutu nagu nana guikerondila.

⁴⁰ Migaga miotsu miMoise na malongi mababiyitsi bibandi na maruma meni mabeji.

Jesus na David

⁴¹ BaPharisie beni banogukama, Jesus amabawivula yivu yieyiyi rie:

⁴² Yika tsie duitasili Christ. Mutegula nyi avu? Bamamugabusila rie: Mutegula David.

⁴³ Jesus amabawivula rie: Kabogu dibandu yi David ava amagaangulu na mangolu maYinyunyi yiNsambi amavosa rie:

⁴⁴ Fumu amavosa na Fumu ami rie: Ndeʼ tsana va mabaala mami te na nyusunsa bavinitsi bagu o tsi dururnu duagu.

⁴⁵ Jandi beni emunengili Fumu kabogu tsie abila muana andi?

⁴⁶ Ubongila va yilumbu yieni botsu bamagaangu leli na basamamuemuwivula bivu.