Matthieu 21 - La Sainte Bible en Langue YipunuJesus ukota ekoti o Jerusalem ( Marc 11.1-11 ; Luc 19.28-40 ; Jean 12.12-19 ) 1 Banobambana o Jerusalem mbe basakatola o Bethpage o yiari yimukongu umiOlive, Jesus amaruma badukitsi bandi babeji rie: 2 Wendanu o dimbu adivu o gusu. Yika duipali durasuna yibusi yiburu yitungu na muana andi; banyangulianu na bambeyilianu. 3 Pa mutu oduwivula rie: Yi duivayi? Mugabusilianu rie: Fumu ebarondi; vana vana odusingisa ubabega. 4 Dimalabana udugusu adimavosu na babiyitsi rie: 5 Tsingulanu bisi Sion rie: Kaga enu uruga eruyi, avu na buvolambombu; enangimi va julu buru diwendi rie: eruyi va julu muana buru. 6 Badukitsi bamawenda na bamavaga adi Jesus amabatsingula. 7 Banobega buru na muana andi bamamusakiga biduaru biogu mbana bamanangiga Jesus. 8 Yinombu yineni yimayenawalanga biduaru biogu na metu muna nsila. 9 Binombu abimawenda va gusu Jesus na abimamuduka bimayenagamuganga rie: Diboti ombu Muana David! Miula mibi ombu jandi oyiruyi mu diina diFumu! Diboti ombu Nsambi! 10 Ava bamatolila o Jerusalem batu botsu bamakambulu na bamawivasana rie: Agugu la nyi? 11 Bamosi bamawaka rie: La mubiyitsi, Jesus muisi Nazareth o Galilee. Jesus ukota ekoti o Ndagu Nsambi ( Marc 11.15-19 ; Luc 19.45-48 ; Jean 2.13-22 ) 12 Jesus amakota o Ndagu Nsambi na amasansa jogu abamasumbisanga na abamasumbanga muna. Amagudiga tavula tsibasansitsi bambongu na bivika bibasumbisitsi bamabembi. 13 Mbana amabatsingula rie: Ndagu ami jiunengulungu Ndagu Dusambu. Tumba jenu dumajivaga yisuemunu yibadayitsi. 14 Bidunga na bitsondu bamabambana na Jesus ava amabila o Ndagu Nsambi na amababelusa. 15 Bivunda bibavagulitsi bapagu na milonsi mimigaga bamalaba mambu maboti ama jandi amavaga na bamagulu bangebi ugamuga begamuyi o Ndagu Nsambi rie: Diboti ombu Muana David! 16 Kabogu jogu bamamuwivula rie: Gugegulu adi bevosi? Jesus amabagabusila rie: Nyigulu. Jenu mbe dusakaranga Bisonu abisonugu rie: Gumarombisa bangebi na baana uyenadodisanga. 17 Mbana Jesus amabasila uwenda o Bethanie; amasilimina guna. Jesus uloga eloyi mumanga ( Marc 11.12-14 , 20-24 ) 18 Kedi ava amagabuyilanga amagulu nsala; 19 anolabilila mumanga amawenda uyetsuna tumba amarasuna yika magaji na magaji. Kabogu amavosa na mumanga rie: Mutu agomueji mimanga miagu, via! Vana vana mumanga umagumuga. 20 Badukitsi bamadilaba na bamakambulu. Bamawivula Jesus rie: Dibandu yi mumanga umasundila ugumuga? 21 Jesus amabagabusila rie: Jabanu rie: Pa duna yitu na pa dugotumuna paga durungula uvaga munongu mosi nana nyimavayila mumanga ne uviolila. Durungula uvosa na mukongu egugu rie: Gusuga vana, vioga o mubu na uonyi ugusuga. 22 Pa duna yitu adi duwivula na dusambu, adina dudila. Musuga uJesus agunyi uiruyisini? ( Marc 11.27-33 ; Luc 20.1-8 ) 23 Jesus amawenda o Ndagu Nsambi. Ava amalonsila, bivunda bivagulitsi bapagu na bivunda bibaJuif bamaruga ombu gandi. Bamamuwivula rie: Agunyi guidilili musuga uvaga mambu meni? Anyi amaguvega musuga egugu? 24 Jesus amabagabusila rie: Menu wami nyuduwivula yivu pa dukwagula nyudutsingula agunyi musuga ami uiruyili. 25 Nsingulianu, anyi amasindiga Jean ubatisa? Nsambi vo batu? Tumba bamavosa joʼ beni na joʼ beni rie: Pa tuwagula rie: Nsambi amamusindiga, otuwivula rie: Dibandu yi dusamamuvayila yitu. 26 Pa tuwagula rie: Batu bamamusindiga, tuidumi batu, mu mbari betasi yiri Jean amaba mubiyitsi. 27 Kabogu bamawagula Jesus rie: Tugejabi. Amabawaka rie: Kabogu menu wami ngodutsingula agunyi nyidilili musuga uvaga mambu memama. Nongu jibabaala babeji 28 Jesus amabawivula rie: Yi duitasi mu diambu diedidi? Mutu amaba na baana babeji bababaala. Amavosa na yivunda rie: Wenda namunyi oyesala o nungi ami. 29 Muana amagabusila rie: Ngowenda. Tumba o gusu amakalula diela na amawenda. 30 Amavosa munongu mosi na ngebi. Ngebi amamuwagula rie: Oo! Uweʼ nyiwendi tumba asamamuewenda. 31 Va gari ogu anyi amavaga durondu dutaji andi? Bamamugabusila rie: Yivunda. Jesus amabatsingula rie: Jabanu rie: Babongitsi balepu na bimbembu boduviolila ava Durumu duNsambi dujabununu. 32 Jean amaruga ombu genu udusungiga nsila na dusamagaru; yika babongitsi balepu na bimbembu bamamuvayila yitu. Motsu mana dumalaba ne nana dusamakalula diela. Nongu jifumu nungi na basalitsi bandi ( Marc 12.1-12 ; Luc 20.9-19 ) 33 Jesus amamuebabuayila nongu rie: Dibaala amavara nungi. Amajitsiengisa yivaga; amakunsa yigamunu na amarunga mua yikumbulu yimfula. Amajisila ombu basalitsi na amawenda o ulinga. 34 Mu temu jidutsonsugu amasindiga basalitsi bandi ombu basalitsi beni uyebonga dikabu diandi. 35 Basalitsi bamagaanga abamaruga: bamadimba umosi bamaboka ususu na bamatinda agumurieru mamanyi. 36 Kabogu dibaala dieni amamuetinda basalitsi basusu bapuela ne uviolila temu ajitega; tumba basalitsi beni bamabavayila munongu mosi. 37 Mbana amasindiga muana andi novosa rie: Boyitsa muana ami. 38 Tumba ava basalitsi bamalabila muana, bamavosa joʼ beni na boʼ beni rie: Labanu mubongitsi disiala! Ruganu tumubokianu yiri disiala diuba adietu. 39 Kabogu bamagaanga muana na bamamuboka mbana bamasila mfumbi o pari. 40 Jesus amawivula rie: Ava fumu nungi oruyila tsie ovayila basalitsi beni? 41 Bamamugabusila rie: Jandi oruga noboka basalitsi beni novega nungi ombu basusu, diwendi rie: abomuvega dikabu diandi. 42 Mbana Jesus amabawivula rie: Dusakaranga Bisonu abimasonugu rie: Dimanyi adimabuagu na barungitsi divu tindi adiviolila ubueji! Adudu la duganu duFumu na duonyi duitulasi ubueji! 43 Jesus amabuela rie: La dibandu nyidutsinguli rie: Durumu duNsambi dugojabunu ombu genu tumba dujabunu ombu bisi bulongu abofunanga. [ 44 Uotsu oberuga va dimanyi dieni otsungugu na jandi o dimanyi dieni diubonduyila ogesumuga.] 45 Bivunda bibavagulitsi bapagu na baJuif abamaba baPharisie bamajaba yiri Jesus amabatsokila na nongu eni. 46 Mbe baronda umugaanga tumba bamaduma batu mu mbari bamalaba Jesus mubiyitsi avu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon