Matthieu 20 - La Sainte Bible en Langue Yipunu

Basalitsi o nungi

¹ Durumu duNsambi duibagunu na mutu agumawenda o dikasa kedi unengila basalitsi usala o nunga andi.

² Amavangana ubafuta yilumbu na amabasindiga o nungi andi.

³ Amamuewenda ava dimengi dimulumi na amalaba basusu abamaba nsumbi nsumbi mu dulombili.

⁴ Jandi amabaruma rie: Jenu wenu wendanu o nungi ami na nyudufuta wandi.

⁵ Kabogu bamawenda. Jandi amamuewenda midi na va murekumunu na amavaga munongu mosi.

⁶ Amamuewenda o dikasa ava tsisiga na amalaba basusu abamaba vana. Amabawivula rie: Dibandu yi dugesali?

⁷ Bamamugabusila rie: Mu mbari mutu agaatunengila. Jandi amabaruma rie: Jenu wenu wendanu o nungi ami!

⁸ Aya mukolu fumu nungi amanengila oyirumi basalitsi na amavosa nandi rie: Nengila basalitsi na bafuti yilumbu; ubanda na jogu ababanokota mbana jogu abamarela.

⁹ Abamabanda usala tsisiga bamaruga na mutu mutu amadila tsiwelimina na yilumbu yieni.

¹⁰ Mbana abamarela bamaruga, bamatasa yiri bodila uviolila; tumba jogu wogu bamadila mutu mutu yilumbu.

¹¹ Banolaba mbongu bamabanda utata rie:

¹² Fumu abatsisita batsisala yika diweru dimosi, gubafuta munongu mosi nana jetu? Gugejabi yiri jetu tutsiwanla nyangu yilumbu yimfuimbila?

¹³ Jandi amawaka umosi iie: Mbatsi ami ngaagudionga. Gugaavangana ufutu tsiwelimina na yilumbu?

¹⁴ Bonga mbongu tsiagu yenawendanga! Pa nyirondi ugufuta munongu mosi na jandi agumasita uruga, yika diambu diagu?

¹⁵ Ngaa na musuga ufuta nana nyirondili? Guna musuga uwavila diboti diami?

¹⁶ Bapuela abavu baneni namunyi boba bageyi na bapuela abavu bageyi namunyi boba baneni o gusu.

Jesus ubuesa ebuesi ulonsa nana obokulu na nana orambuyila

¹⁷ Jesus na badukitsi bandi bamasogama uwenda o Jerusalem. Muna nsila Jesus amababega (digumi na badukitsi babeji) o fundu na amabatsingula rie:

¹⁸ O Jerusalem tuiweʼ na Muana Mutu ovegu ombu bavagulitsi bapagu na milonsi mimigaga. Jogu bomuvega ombu bavagulitsi bapagu na milonsi mimigaga. Jogu bomuvega mbela dufu

¹⁹ mbana bomuvega ombu abageduki Nsambi. Bomudesa, bomudimba mikasa na bomugomina va kurusu na mu yilumbu ayimurieru orambuga.

Nguji Jacques na Jean ewivuli Jesus mua diambu

²⁰ Nguji baana baZebedee amawenda ombu Jesus na baana bandi uyemuvonda mua diambu.

²¹ Jandi amamuwivula rie: Yi guirondi? Mugetu eni amavosa rie: Singisa ababa utsana umosi va mabaala magu na ususu va magetu magu ava Durumu duNsambi dujabununu.

²² Jesus amabagabusila rie: Jenu dugejabi adi duiwivuli. Durungula unu kopa aji vengu nyunu, diwendi rie: maguga ama nyuwarila? Jogu bamawaka rie: Turungula.

²³ Jandi amabagabusila rie: Divu dingensa yiri dunu kopa aji nyunu. Tumba menu ngaa na musuga utsanisa mutu va mabaala vo va magetu mami. Nsambi ovega bitsiga bieni ombu aba amabikunsila.

²⁴ Badukitsi banodigulu bamanyoyila baana baZebedee.

²⁵ Jesus amabanengila na amabalonsa rie: Duijabi yiri barumitsi bana musuga uruma malongu na bedivayi na dikasi nesi ombu mindumba.

²⁶ Diyaba nana ombu genu. Tumba uotsu oyirondi uba muneni abi musalitsi

²⁷ na uotsu oyirondi uba yivunda abi muviga batu botsu.

²⁸ Mu mbari ne Muana Mutu asamaruga uyisalulu tumba usalila novega monyu andi yiri batu bapuela boliomusu.

Jesus ubelusa ebelusi bidunga bibeji

²⁹ Ava bamasoyimina o Jericho yinombu yineni yimaduka Jesus.

³⁰ Bidunga bibeji bimaba bitsana va mugula nsila. Banogulu yiri oyivioyi la Jesus bamagamuga rie: Fumu, Muana David tulasi yingeba!

³¹ Batu bamabasiemba novosa nogu rie: Volanu sui! Tumba bamabuela ugamuga na mangolu rie: Muana David tulasi yingeba!

³² Jesus anosikama amabanengila nobawivula rie: Yi duirondi yiri nyuduvayila?

³³ Jogu bamamugabusila rie: Fumu, tuirondi yiri gututiemusa.

³⁴ Jesus amabalasa yingeba na amabemba misu mogu; vana vana misu mogu mamatiemuna na bamamuduka.