Matthieu 2 - La Sainte Bible en Langue Yipunu

Batu badiela bamarugasana o yiari ayi wisi epalili uyelaba Jesus

¹ Jesus amaburulu o Bethleem o bulongu buJudee ava Herode amabila kaga. Jesus anoburu vamaruga batu badiela, diwendi rie: batu abamawijingi bambuelili. Bamarugasana o yiari ayi wisi epalili na bamatola o Jerusalem.

² Bamawivula rie: Muana agubanoburu aguba kaga baJuif aka? Jetu tumalaba mbuelili andi ava jimalabinina o yiari ayi wisi epalili, aguna tumarugasana uyimuyitsa.

³ Kaga Herode anodigulu amakambulu nabisi Jerusalem botsu wandi.

⁴ Jandi amagukiga bivunda biotsu bibavagulitsi bapagu na milonsi mimigaga na amabawivula rie: Agunyi Christ eni oburulu?

⁵ Bamamuwagula rie: O dimbu diBethleem o bulongu buJudee. Babiyitsi bamabiga rie:

⁶ Kabogu ndeʼ Bethleem o bulongu buJudee, gugaa uviolila ugeyi va gari misiengi miotsu miJudee, mu mbari ombu gagu agupalila yivunda ayiuwendisanga batu bami baIsrael.

⁷ Kabogu Herode amabega batu beni badiela abamarugasana o yiari ayi wisi epalili o fundu na amayetsiyisa temu aji mbuelili jimalabinina.

⁸ Mbana amabasindiga o Bethleem na amabaruma rie: Wendanu uyeromba muana na pa dumamulaba dukayinsingula yiri menu wami nyuyemuyitsa.

⁹ Banoganina kaga bamayenawenda. Mbuelili eni jimamuelabana: jimawendanga o gusu ogu te na jimasikama va mbura aji muana umaba.

¹⁰ Banomuelaba mbuelili eni bamalaba nsangu jineni.

¹¹ Bamakota o ndagu na bamalaba muana na nguji andi Marie. Bamakutama na bamayitsa muana mbana bamadibula bigara biogu na bamamuvega miensili: lora, bima bimbunga jiboti na mira.

¹² Mbana Nsambi amabalubusa na ndosi yiri bayamuegabuga ombu Henode kabogu bamagabuga o bulongu buogu yika na nsila jisusu.

Tinunu o Egypte

¹³ Batu badiela banowenda yiansa yiFumu yimalabana o ndosi na Joseph na yimavosa rie: Rambuga, bonga muana kali na nguji andi; rina te no Egypte? Tsana guna te na nyugutsingula rie: Gabuga. Herode oba na nsala uboka muana.

¹⁴ Joseph amarambuga na vana mukolu eni amabonga muana na nguji andi Marie na bamarina te no Egypte.

¹⁵ Aguna bamatsana te na dufu duHerode. Dimavagu udugusu adi mubiyitsi amavosila Fumu rie: Nyimapalisa muana ami o Egypte.

Baana bababaala bamaboku

¹⁶ Herode anolaba yiri batu badiela beni abamarugasana o yiari ayi wisi epalili bamamudunsa, amanyoga kabu jineni. Amaruma rie: O Bethleem na o migula mi-uonyi miotsu, baana bababaala baboku; baana bakali te na abakavu na bilima bibeji. Amaduka adimamutsingulu na batu badiela mu diambu ditemu aji mbuelili eni jimalabinina.

¹⁷ Kabogu mbigulu jiJeremie jimadugusu ava amabiyila rie:

¹⁸ Nduku jimagulunu o Rama, migamu na milingi, Rachel ulila elili baana bandi, agorungula ubembugu mu mbari abandi bamaboku.

Bepaiili o Egypte

¹⁹ Herode anofu yiansa yiFumu yimalabana o ndosi na Joseph ava akivu o Egypte.

²⁰ Yimavosa nandi rie: Rambuga, bonga muana na nguji andi, gabuga o bulongu buIsrael mu mbari jogu aba mbe baboka muana bamafu.

²¹ Joseph amarambuga, amabonga muana na nguji andi Marie na jogu botsu bamagabuga o bulongu buIsrael.

²² Anogulu bamavihsa Archelaus kaga o Judee, diwendi rie: Archelaus amavinga va yitsiga yitaji andi Herode, amalaba keri uyetsana guna. Amamuelubusu na ndosi rie: Wenda o bulongu buGalilee,

²³ uyetsana o dimbu adinengulu Nazareth. Dimavagu udugusu adimabigu na babiyitsi rie: Jandi onengulungu muisi Nazareth.