Matthieu 19 - La Sainte Bible en Langue Yipunu

Malongi maJesus mu diambu diuboka diwela

¹ Aya Jesus amamanina uvosa mambu meni amagusuga o Galilee na amawenda o yiari yiJudee na amasabuga Jourdain.

² Yinombu yineni yimamuduka na amabelusa bibedu biogu.

³ BaJuif bamosi abamaba baPharisie bamaruga ombu gandi umuweliga. Bamamuwivula rie: Mugaga etu uiveyi dibaala musuga ugusula mugatsi andi mu mbari amavaga diambu digeyi nesi dineni?

⁴ Jesus amabagabusila rie: Dusakaranga Bisonu? Va dibandu musunditsi amasunda dibaala na mugetu

⁵ na amavosa rie: Dibaala osila taji andi na nguji nofubana na mugatsi andi na jogu babeji boba umosi.

⁶ Bagaa babeji bavu yika umosi. Kabogu mutu ayakakasana aba Nsambi amafubana.

⁷ BaPharisie beni bamamuwivula rie: Kabogu dibandu yi Moise amasonina yiri dibaala ana musuga usona muganda uboka diwela nogusula mugatsi andi?

⁸ Jesus amavosa nogu rie: Moise amaduvega diruma dieni mu mbari dumaba na mirima mibi. Va dibandu ava Nsambi amasundila biotsu disamaba nana.

⁹ Jabanu rie: Pa dibaala egusuli mugatsi andi mu mbari aji yimbembu na ewelini na ususu jandi wandi aji yimbembu.

¹⁰ Kabogu badukitsi bandi bamavosa nandi rie: Pa divu nana dibaala ayawela.

¹¹ Jandi amabawaka rie: Botsu bagomngula usinga dilongi dieni yika aba Nsambi amadirungusa.

¹² Vavu mambu mamosi amogandisa babaala uwela: bamosi bamaburu bafu; basusu bamavangulu; basusu bebusi mu diambu diDurumu duNsambi. Jandi oyirondi udiduka aduki.

Jesus usakiga esakiyi baana bageyi miogu

¹³ Batu bamosi bamabega baana ombu Jesus yiri obasakiga miogu nobavega miula. Tumba badukitsi bamabasiemba.

¹⁴ Jesus amavosa rie: Baana baruyi ombu gami! Duyabagandisa mu mbari ombu munongu egugu Durumu duNsambi dumajabunu.

¹⁵ Jandi amabasakiga miogu mbana amagusuga vana.

Yisina

¹⁶ Dibaala amaruga ombu Jesus. Amavosa nandi rie: Mulonsi, maboti yi nyuvaga udila monyu umutubu?

¹⁷ Jandi amamuwivula rie: Dibandu yi guikwivulili maboti? Vagaa muboti yika Nsambi buandi. Pa guirondi udila monyu kelisa maruma.

¹⁸ Jandi amamuwivula rie: Maruma yi? Jesus amamugabusila rie: Guyaboka; guyavaga bumbembu; guyadaga; guyafura;

¹⁹ yitsa taji agu na nguji; ronda mutu nagu nana guikerondila.

²⁰ Mufudu eni amamutsingula rie: Nyimakelisa maruma memama motsu. Vaki disusu?

²¹ Jesus amamutsingula rie: Pa guirondi udugusu motsu, weʼ yesumbisa biotsu abivu nagu novega badoli beni ombu bijaga na guba na busina o julu. Mbana ruga, nduki.

²² Tumba mufudu eni anogulu nana amatunga dusisi na amayenawenda na munyongu mu mbari amaba yisina yineni.

²³ Jesus amatsingula badukitsi bandi rie: Jabanu rie: Divu divura ombu yisina ujaba Durumu duNsambi.

²⁴ Nyibuesi rie: Nyiina, divu divura yiri tsungu ovioga va digola ditsongi tumba divu diviolila uvura ombu yisina ujaba Durumu duNsambi.

²⁵ Badukitsi banodigulu bamakambulu viri na bamawivula rie: Kabogu anyi orungula ugobulu.

²⁶ Jesus amabagengila yisuisu na amavosa rie: Adivu divura ombu batu digaa divura ombu Nsambi mu mbari motsu morungulu ombu gandi.

²⁷ Mbana Pierre amavosa nandi rie: Jetu tumasila biotsu na tumaguduka. Yi tudila mu dionyi?

²⁸ Jesus amabagabusila rie: Jabanu rie: Ava Durumu duNsambi dujabununu na Muana Mutu otsana va yitsiga yibufumu buandi, jenu (digumi na badukitsi bami babeji) dutsana va bitsiga bibufumu wandi utabulila digumi na bifumba bibeji biIsrael bunsonsi.

²⁹ Uotsu ojivu na murima ubusa ndagu andi nesi baana banguji bandi nesi taji andi nesi nguji andi mu diambu diami okelusu ne uviolila. Diwendi rie: odila kama kama mu biotsu na odila monyu umutubu.

³⁰ Bapuela abavu baneni namunyi boba bageyi na bapuela abavu bageyi namunyi boba baneni o gusu.