Matthieu 18 - La Sainte Bible en Langue Yipunu

Anyi avu muneni?

¹ Badukitsi bamawenda ombu Jesus na bamamuwivula rie: Ava Durumu duNsambi dujabununu anyi oba muneni?

² Jesus amanengila muana ugeyi na amamusunsa va gari ogu

³ na amavosa rie: Jabanu rie: Pa dugokaluga nana muana ugeyi dugojaba Durumu duNsambi.

⁴ La dibandu mutu uotsu oyikesunsa nana muana ugeyi oba muneni ava Durumu duNsambi dujabununu.

⁵ Uotsu oyidili muana nana gugu ugeyi mu diina diami endili wandi.

Masumu na mbangulu

⁶ Pa mutu etsimbusu muana umosi va gari baana bebaba yiri otsiemusa yitu, diviolila ubueji yiri bomutunga dimanyi dineni va kingu andi nomubuaga o mubu.

⁷ Mbangulu tsivu; tumba ka muna maguga ma jandi olaba oyimangingi batu!

⁸ Pa dikaka diagu nesi dikulu diagu digutsimbusu ditabuli nodibuaga; tsiri diambu diviolila uvura ukota o julu na dikaka dimosi vo dikulu dimosi, tumba divu diambu ukota o bulungi bumuji ne pa guna bilema biotsu.

⁹ Pa disu diagu digutsimbusu didonduli; tsiri diambu diviolila uvura ukota o julu na yitosu, tumba divu diambu ukota o bulungi bumuji ne pa guna misu motsu mabeji.

Nongu jiyindombu ayimaletsiemuga tumba yimalabana

¹⁰ Duyavina baana bageyi mu mhari biansa biogu bivu va gusu Tata ami yilumbu na yilumbu. [

¹¹ Mu mbari Muana Mutu amaruga uyiromba abatsiemuga.]

¹² Yi duitasi? Pa mutu ana kama bindombu na yimosi yimatsiemuga, agosila magumidufu na yifu o julu mukongu uyenaromba ayimatsiemuga?

¹³ Pa yiulabana, jandi elabi ubueji na yionyi uviolila ne magumidufu na yifu abigaa bitsiemuga.

¹⁴ Munongu mosi Taji enu ajivu o julu agerondi yiri ne muana umosi obungana.

Muana taji oyiguvayili dibi

¹⁵ Pa muana taji agii eguvayili dibi, wenda uyemoga jenu nandi babeji nomulubusa rie: Disawelimina. Pa egulu adi guimutsinguli gumawarisa dinonga dienu.

¹⁶ Pa agogaru, wenda ombu gandi na mutu mosi nesi babeji nana Bisonu bisonugulu rie: Ava mutu egufuengilili batu babeji ne barieru balemana miunu miogu.

¹⁷ Pa agogaru ugulu ne jogu, ditubuli ombu bisi dibundu. Pa agogaru ugulu ne bisi dibundu, mugengili nderi avu muenyi vo mubongitsi lepu.

Adiugandusu na adiusingu

¹⁸ Jabanu rie: Adi duigandisi vava tsi diugandusu o julu wandi na adi duisingi vava tsi diusingu o julu wandi.

¹⁹ Jabanu wandi rie: Pa jenu babeji dusambila na murima umosi Taji ami ajivu o julu odugulu.

²⁰ Ava babeji vo barieru bobengunina mu diambu diami, nyuba nogu.

Nongu jimusalitsi agumabusa utanda basusu

²¹ Mbana Pierre amawenda ombu Jesus na amamuwivula rie: Fumu kumbu kwe nyutanda muana taji ami ava jandi opayila dibi? Yisambuali yikumbu divu diwelimina?

²² Jesus amamuwaka rie: Nesi, tsiri yika te na yisambuali yikumbu tumba te na magumidusambuali na kumbu yisambuali.

²³ Durumu duNsambi duibagunu na kaga ajimaronda utsuna bisalu bibasalitsi bandi notala mbongu tsiogu.

²⁴ Ava amabandila utala, bamamubeyila mutu agumaba na muganu agugorungula utalu.

²⁵ Mu mbari dibaala dieni asamarungula ufuta muganu andi fumu amaruma yiri basumbusu na mugatsi andi na baana na biotsu abimaba nandi ufuta muganu.

²⁶ Musalitsi amakutama va gusu fumu novosa rie: Ndasi yingeba, ngensa nyugufutila tsiotsu.

²⁷ Fumu anogaangu na yingeba amamusindilila muganu.

²⁸ Musalitsi eni anopala amabenguna na mbatsi agumamusomba mua badoli. Amamugaanga na amamubatiga va mingunga; amavosa rie; Futa ayi ndeʼ guinsombi.

²⁹ Mbatsi eni amakutama va gusu andi na amamulenda rie: Ndasi yingeba, nyugufutila tsiotsu.

³⁰ Tumba asamagaru, amamukotisa o tsugu yiri amufutili tsiotsu.

³¹ Ava basalitsi basusu bamalabila adimavagu, bamagaangu na munyongu kabogu bamawenda ombu fumu umutsingula motsu.

³² Mbana fumu amanengila musalitsi eni. Amamusiemba rie: Ka muna yimbabu yi! Nyimagusindilila muganu agu mu mbari gumandembiyila.

³³ Ndeʼ wagu gugorungula ulasa mbatsi agu yingeba nana nyimagulasila?

³⁴ Fumu amanyoga, amamukotisa o tsugu yiri amufutili tsiotsu.

³⁵ Jesus amabuela rie: Anana Taji ami ajivu o julu oduvayila pa dugotanda baana bataji benu na mirima misunda.