Matthieu 17 - La Sainte Bible en Langue Yipunu

Dunyuru duJesus duikaluyi

¹ Tsona mosi jinosuka Jesus amabonga Pierre na Jacques na muana nguji andi Jean na bamawenda va mosi o julu mukongu.

² Ava bamamugengilila jaʼ uotsu amakaluga: yinsi yiandi yimalula nana wisi na biduaru biandi bimavedama nana muetsa.

³ Mbana bamalaba Moise na Elie umoga bemoyi na Jesus.

⁴ Pierre amavosa na Jesus rie: Fumu, diboti yiri tubianu vava. Pa guirondi nyurunga mirorombi mirieru: umosi aguagu na umosi agu Moise na ususu agu Elie.

⁵ Ava jandi amavosila nana dimungi dimasunda na dimabagumba na yijalala yineni. O gari dimungi umagulunu diufi adimavosa rie: Agugu la Muana ami udurondu agu nyimaronda na murima ami uotsu. Mugululuanu!

⁶ Badukitsi banogulu dionyi bamagaangu na goma te na bamakebuaga va tsi.

⁷ Jesus anobambana nogu amabasimbula novosa rie: Relamanu, duyalaba goma!

⁸ Bamabuaga misu na bamalaba yika Jesus.

⁹ Ava bamavindimina mukongu, Jesus amabagandisa rie: Duyatsingula mutu adi dumalaba te na Muana Mutu orambuyila o dufu.

¹⁰ Mbana badukitsi bamamuwivula rie: Dibandu yi milonsi mimigaga belonsili rie: Elie oreyila uruga?

¹¹ Amabawaka rie: Dingensa Elie oruga nokunsa motsu.

¹² Jabanii rie: Elie amaruga kala na basamamujaba tumba bamamulensa tindi ulensa. Munongu mosi Muana Mutu okuanu nogu.

¹³ Kabogu badukitsi bamajaba yiri evosi mu diambu diJean Baptiste.

Jesus ubelusa ebelusi muana dibaala aguvu na yinyunyi yibi

¹⁴ Ava bamagabuyila yinombu yimabengusana Jesus. Va gari ogu vamaba dibaala adimakutama va gusu Jesus

¹⁵ novosa rie: Mulonsi, kokolu tsiagu, lasa muana ami dibaala yingeba! Ana sira sira na o tsi nyambu ekebuayingi o muji nesi o mamba.

¹⁶ Nsimubega ombu badukitsi bagu na bagaarungula umubelusa.

Dunyuru duJesus duikaluyi

¹⁷ Jesus amagamuga rie: Ka muna paga ji! Duna mirima migala. Nyisakatsinga nenu? Je nyurungula uwarila kulini tsienu? Bega muana.

¹⁸ Jesus amagamuyila yinyunyi yibi rie: Pala! Vana vana muana amabeluga.

¹⁹ Badukitsi bamawenda fundu na Jesus na bamamuwivula rie: Dibandu yi tugaarungulila upalisa yinyunyi yibi?

²⁰ Jesus amabawaka rie: Mu mbari dugaa na yitu yiwelimina. Gengilatianu tsangu jimutarada: jigeyi jivu tumba ne nana jibendisi muiri. Jabanu rie: Mbe duna yitu ayibagunu na tsangu eni mbe durungula uvosa na mukongu egugu rie: Gusuga vana na uonyi ugusuga. Motsu morungulu ombu genu. [

²¹ Munongu eni uipalusu yika na dusambu nobusa uji.]

Jesus ebuesi uvosa diambu didufu na durambugu duandi

²² Ava Jesus na badukitsi bandi bamalingilanga o Galilee, Jesus amabaiubusanga rie: Muana Mutu olasu maguga na batu

²³ bomuboka tumba mu yilumbu yimurieru orambuga. Badukitsi banodigulu bamagaangu na munyongu.

Dumandu duNdagu Nsambi

²⁴ Ava Jesus na badukitsi bandi bamatolila o Capernaum babongitsi badumandu duNdagu Nsambi bamatsunda na Pierre rie: Mulonsi enu agefuti dumandu duNdagu Nsambi mbe?

²⁵ Jandi amavosa rie: Efuti! Ava bamakotila o ndagu Jesus amawivula Pierre rie: Simon yi guitasi? Banyi befutili bakaga lepu na dumandu? Bisi bulongu vo benyi?

²⁶ Jandi amamugabusila rie: Benyi. Mbana Jesus amavosa rie: Kabogu bisi bulongu bagefuti.

²⁷ Ne nana tuyaba na musosi nogu. Wenda o uloba. Dibula munu nyama ajitega aji gugaanga; muna gulaba mbongu. Tsionyi tsivu tsiwelimina ufutila dumandu dujetu nagu.