Matthieu 16 - La Sainte Bible en Langue YipunuBewivuli yilimba ( Marc 8.11-13 ; Luc 12.54-56 ) 1 BaJuif ne baPharisie ne baSadducee bamawenda ombu Jesus uyemutsundisa. Mumuweliga bamamuwivula ubalasa yilimba ujaba yeri Nsambi aji nandi. 2 Jesus amabagabusila rie: Jenu beni duivosi rie: Kedi jiuba jiboti mu mbari tsisiga julu jivu jibenga riri. 3 Mbana kedi duivosi rie: Mfula jiunoga mu mbari julu jivu fubiri. Pa duirunguli ugengila julu nojaba adiuba kabogu dibandu yi dugorungulila ujaba adivu netu temu ejiji? 4 Ka muna dibi di di vu na batu batemu ejiji! Duikeli yilimba tumba dugolaba yilimba yisusu yika ayi Jonas. Mbana amabaganina na amayenawenda. Dufunusu dubaJuif ne baPharisie ne baSadducee ( Marc 8.14-21 ) 5 Ava badukitsi bamavioyila o disimu dimosi diyiliba bamalibana ubega mapa. 6 Jesus amabalubusa rie: Kebananu mu diambu didufunusu dubaJuif ne baPharisie ne baSadducee. 7 Badukitsi bamatsundanga joʼ benina joʼ beni rie: Dibandu yi evosili nana? Mu mbari tugaa na mapa? 8 Jesus amajaba adi bevosi kabogu amabawivula rie: Dibandu yi duitasili diambu dimapa? Ka yitu ugeyi yi yivu nenu! 9 Dugegulu? Dugerangimini ava nyimabukulila mapa maranu ama tosini yiranu tsibabaala bamaji? Durtiabola ponsi kwe tsibibuku abimasialulu? 10 Ava nyimabukulila yisambuali yimapa ulisila tosini jina tsibabaala dumabola ponsi kwe tsibibuku abimasialulu? 11 Dibandu yi dugaagulu yiri ngaavosa diambu dimapa? Kebananu mu diambu didufunusu dubaJuif ne baPharisie ne baSadducee. 12 Mbana badukitsi bamatsiyisa yiri asamabalubusa mu diambu didufunusu dumapa tumba amabalubusa mu diambu dimalongi mabaPharisie na baSadducee. Pierre utubula etubuli yiri Jesus aji Christ ( Marc 8.27-30 ; Luc 9.18-21 ) 13 Jesus amawenda na badukitsi bandi o dimbu diCesaree jiPhilippe. Amawivula badukitsi bandi rie: Yi batu bevosi mu diambu diMuana Mutu? 14 Jogu bamamugabusila rie: Bamosi bevosi yiri guji Jean Baptiste. Basusu yiri guji Elie, bamosi bevosi yiri guji Jeremie vo mubiyitsi ususu. 15 Jandi amabawivula rie: Tumba jenu yi duitasi? 16 Simon Pierre amamugabusila rie: Guji Christ, Muana Nsambi ajivu monyu. 17 Jesus amamuwaka rie: Simon muana Jean, ka muna nsangu ji jivu nagu! Gusamalonsu na mutu uvosa dionyi tumba Taji ami ajivu o julu amagulonsa. 18 Kabogu nyigutsinguli rie: Pierre guji nderi dimanyi na va julu dionyi nyurunga dibundu diami. Ne dufu dugorungula uviolila dibundu diami. 19 Nyuguvega tsafi tsijulu: adi gugandisa vava tsi diugandusu o julu wandi; adi guisigi vava tsi diusingu o julu wandi. 20 Mbana Jesus amalubusa badukitsi bandi rie: Duyatsingula batu rie: Nyiji Christ. Jesus ulonsa ebalonsi nana obokulu na nana orambuyila ( Marc 8.31—9.1 ; Luc 9.22-27 ) 21 Ubongila va temu eni Jesus amabanda ulonsa badukitsi bandi rie: Vengu nyuwenda o Jerusalem, aguna bivunda na bavagulitsi bapagu na milonsi mimigaga bondasa maguga. Va julu vana nyuboku na nyurambuga o dufu mu yilumbu yimurieru. 22 Mbana Pierre amamubega o fundu na amamunyangila rie: Fumu, Nsambi agogaru! Digorungula uba. 23 Mbana Jesus amageluga na amavosa na Pierre rie: Ndundi Satan! Matasa magu mavu mabatu tsiri maNsambi. 24 Mbana Jesus amavosa na badukitsi bandi rie: Pa mutu erondi unduka vengu obusa mandi motsu nonangula kurusu andi nonduka. 25 Mu mbari oyirondi ukegobula otsiemuga tumba oyikevega mu diambu diami ogobulu. 26 Ne pa mutu odila bulongu buotsu tumba otsiemuga vo obungana, ubueji uka? Va yisalu ayiurungula ugabusa monyu? 27 Mu mbari Muana Mutu yika uruga eruyi na bundumba buTaji andi na bubiansa mbana ofuta botsu nana bamasalila. 28 Jabanu rie: Bamosi abavu vava bagolefu te na Durumu duMuana Mutu dujabunu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon