Matthieu 14 - La Sainte Bible en Langue Yipunu

Dufu duJean Baptiste

¹ Mu temu eni Herode murumitsi uGalilee amagulu diduma diJesus.

² Amavosa na basalitsi bandi rie: Aguna Jean Baptiste! Kabogu amarambuga! La dibandu mangolu mavu nandi.

³ Diwendi rie: Herode amagaangisa Jean na amamukotisa o tsugu. Amadivaga mu diambu diHerodiade mugatsi Philippe aji muana taji andi.

⁴ Jean Baptiste amasiembanga Herode rie: Gugaa na musuga ubonga mugetu eni.

⁵ Herode amaronda umuboka tumba amalaba baJuif goma mu mbari bamakelisanga Jean nderi mubiyitsi.

⁶ Ava feta jiduburu duHerode, muana mugetu uHerodiade amayina va gusu batu botsu.

⁷ Dionyi dimalasa Herode ubueji kabogu amavangana nandi na amajiwarisa na pesi rie: Nyuguvega yiotsu ayi guikwivuli.

⁸ Anorumu na nguji andi amavosa rie: Peyi muru Jean Baptiste mu yipela.

⁹ Adina dimatsirisa murima kaga tumba asamarungula umuebusa mu diambu dipesi aji amalevila va gusu batu.

¹⁰ Kabogu amasindiga mutu o tsugu uyetabula Jean muru.

¹¹ Muru andi umabegu mu yipela na umavegu ombu numba omagubega ombu nguji andi.

¹² Badukitsi baJean bamaruga uyebonga mfumbi andi na bamajitsiga mbana bamawenda uyetsingula Jesus.

Jesus ulisila elisili tosini yiranu tsibabaala

¹³ Jesus anogulu musamu eni amagusuga vana na amanangama o bota uwenda o mbura jibupinsa. Batu banodigulu bamasogama va mimbu mogu uyenamuduka.

¹⁴ Jesus anopala amarasuna yinombu yineni. Amagaangu na yingeba na amabelusa bibedu biotsu.

¹⁵ Ava tsisiga badukitsi baJesus bamavosa nandi rie: Wisi umawenda na tuji vala. Baganini, bayenawenda o mimbu uyenasumba biguji.

¹⁶ Jesus amabagabusila rie: Tsiri nana, jenu beni dukabavega biguji.

¹⁷ Bamamuwaka rie: Tuna yika mapa maranu na nyama beji.

¹⁸ Jandi amavosa rie: Ka bibeyianu!

¹⁹ Mbana amaruma yinombu rie: Tsananu. Amabonga mapa meni maranu na nyama beji, amanangula misu o julu na amagabusila Nsambi diboti.

²⁰ Botsu bamaji na bamagukuru mbana badukitsi bamabola yigumi na ponsi beji tsibibuku abimasialulu.

²¹ Jogu abamaji bamaba tosini yiranu tsibabaala tsiri utala bagetu na baana.

Jesus ulinga elingi va julu mamba

²² Yika bemani uji Jesus amasindiga badukitsi unangama o bota nowenda o disimu dimosi diyiliba. Jaʼ beni amaganina yinombu.

²³ Mbana amamata o julu mukongu uyesambila. Pisama jinosunda bota jimaba o gari yiliba na Jesus aki va disimu.

²⁴ Bota jimandengamanga na mingiba na punga jimagumbanga.

²⁵ Ava mavuvungi Jesus amalinga va julu mamba; mbe aronda ubamoyisa.

²⁶ Banomulaba elingi va julu mamba bamagaangu na goma. Bamagamuga rie: Lanu ditengu!

²⁷ Vana vana Jesus amavosa nogu rie: Warisanu mirima! Agu menua! Duyalaba goma!

²⁸ Pierre amamugabusila rie: Fumu, pa ndeʼ nsingisi uruga ombu gagu va julu mamba.

²⁹ Jesus amawaka rie: Ka ruga! Pierre amasunduga mu bota na amatsiarila mamba urasuna Jesus.

³⁰ Tumba anolaba mungudi amagaangu na goma na amabanda udiama. Amagamuga rie: Fumu kobuli!

³¹ Vana vana Jesus amamusamba gogu amamugaanga. Amavosa rie: Ka yitu ugeyi yi! Dibandu yi gutsitumunina paga?

³² Bamanangama o bota na punga jimavola.

³³ Badukitsi abamaba o bota bamakutama va gusu Jesus novosa rie: Ndeju guji tindi Muana Nsambi.

Jesus ubelusa ebelusi bibedu biGenesareth

³⁴ Banosabuga yiliba bamawenda o bulongu buGenesareth.

³⁵ Bisi mbura eni banojaba yiri Jesus amamueruga bamadijabisa yiari na yiari na bamamubeyila bibedu biotsu.

³⁶ Bamalenda Jesus rie: Kokolu, singisa bibedu ubemba yika difubu diyikutu yiagu. Botsu abamadibemba bamabeluga.