Matthieu 12 - La Sainte Bible en Langue Yipunu

Bivu mu diambu diyilumbu yitsona

¹ Yilumbu yitsona Jesus na badukitsi bandi bamavioga mu nungi tsiputu. Badukitsi bandi bamaba na nsala kabogu bamadokula putu; bamatsigubula na bamaji.

² BaJuif abamaba baPharisie banodilaba bamavosa nandi rie: Laba badukitsi bagu besumuni migaga mietu novaga adigaa diwelimina na yilumbu yitsona.

³ Jesus amabawivula rie: Mbe dusakaranga adi David amavaga ava amagululu nsala, jogu na bambatsi bandi?

⁴ Amakota o Ndagu Nsambi na amabonga mapa amamavagulu ombu Nsambi diuleba asamaba na musuga, amamaji na amamavega ombu bambatsi bandi. Tsie jetu tugaa na mugaga aguivosi yika bavagulitsi bapagu bana musuga umaji?

⁵ Dusakaranga migaga miMoise ujaba yiri tsona tsiotsu bivunda bibavagulitsi bapagu abesali o Ndagu Nsambi besumuni migaga, ne nana bagaa na mbela?

⁶ Nyidutsinguli rie: Va mbura ejiji vavu aguviolila Ndagu Nsambi buneni.

⁷ Pa duijabi divindugulu diBisonu abisonugu rie: Ngerondi yiri dupagulila bibulu tumba banu na yingeba mbana dugomuevega mbela ombu basusu abagaa na diambu.

⁸ Mu mbari Muana Mutu ana musuga uvaga adivu diwelimina mu yilumbu yitsona.

Dibaala na gogu ugasa

⁹ Jesus anogusuga vana amakota o Ndagu Yibenguna.

¹⁰ Amuna mumaba dibaala adimaba na gogu ugasa. Batu bamosi bamaromba diela ufuengilila Jesus. Kabogu bamawivula Jesus rie: Diambu yi divu diwelimina na migaga mietu mu diambu diyilumbu yitsona?

¹¹ Jandi amabagabusila rie: Va gari enu pa mutu ana yindombu yimosi buandi na yionyi yiubonduga mu dubila yilumbi yitsona, agoyipalisa?

¹² Tsia mutu eviolili yindombu? Kabogu migaga mietu mituveyi musuga uvaga mutu maboti yilumbu yitsona.

¹³ Mbana amavosa na dibaala rie: Simbula gogu agu. Jandi amagusimbula, umabeluga buranga na miotsu mibeji mimaba dedi.

¹⁴ BaJuif abamaba baPharisie bamapala na vana vana bamatunga fundu nana bobokila Jesus.

Musalitsi agumasolu na Nsambi

¹⁵ Jesus anodigulu amagusuga na batu bapuela bamamuduka. Amabelusa bibedu biotsu.

¹⁶ Tumba amabagandisa rie: Duyanjabisa.

¹⁷ Amadivaga udugusu adimasonu na Esaie mubiyitsi rie:

¹⁸ Nsambi amavosa rie: Labanu musalitsi ami agu nyimasola, aguami udurondu, agu nyirondi na murima ami uotsu. Nyumugabilanga Yinyunyi yiami, jandi onyavisa dusungugu te na malongu motsu.

¹⁹ Jandi agoba na mitsundu na agogamuga na agoyenawansanga miansu.

²⁰ Jandi agotabula yilelenga ayimadekama; agotsimisa yijalala ayipudimi te na dusungugu dulabana.

²¹ Batu botsu bomuvayila yitu.

Jesus uwagula ewaguli abemufuengilili

²² Mbana batu bamabega mutu ombu Jesus agumaba na yinyunyi yibi ayimamurombisa uba yidunga na dibaba. Jesus amamubelusa; amatiemuna na amavosa wandi.

²³ Batu bamakambulu na bamawivuia rie: Tsia muana David?

²⁴ BaJuif abamaba baPharisie banodigulu bamavosa rie: Epalisi binyunyi bibi yika mu mbari Beelzebul yivunda yibinyunyi bibi emuveyi mangolu.

²⁵ Jesus anojaba matasa mogu amabawivula rie: Dilongu diotsu adi batu betoyingi joʼ beni na joʼ beni digotsiemuga? Mukuta uotsu aguvu na burandu ugotsiemuga?

²⁶ Kabogu pa Satan eketoyisa na durumu duandi duvu na dupasu dugotsiemuga?

²⁷ Duivosi yiri nyipalisi binyunyi bibi mu mbari Beelzebul epeyi mangolu. Badukitsi benu, agunyi bedilili mangolu mogu? Labatianu jogu beduveyi mbela!

²⁸ Dingensa Yinyunyi yiNsambi epeyi mangolu upalisa binyunyi bibi, adina dilasi kengili yiri Durumu duNsambi dumakejabununu.

²⁹ Mutu agorungula upatula dibaala adivu na mangolu biandi te na olemutunga mbana oyenakindanga biandi biotsu.

³⁰ Jandi ogaa nami ana kueru nami na jandi ogesali va mosi nami ebivisi bisalu.

³¹ La dibandu nyidutsingulili rie: Batu abevayi masumu maminongu na minongu botandu monyi tumba abevosili Yinyunyi yiNsambi kulini bagotandu.

³² Abevosili Muana Mutu kulini botandu mu dionyi tumba abevosili Yinyunyi yiNsambi kulini bagotandu, via!

Muiri na milunda

³³ Pa duirondi milunda miboti vengu duleba na muiri mubusi mu mbari pa duna muiri yinguma dugodokula milunda. Muiri uotsu uijabunu na milunda.

³⁴ Jenu bijaku! Tsie durungulila uvosa mambu maboti na penda tsienu? Ama murima etasi amana dulimi duipalisi.

³⁵ Bungunu bumutu muboti buvu buboti na bungunu bumutu mubi buvu bubi.

³⁶ Jabanu rie: Mu yilumbu yimufundu vengu batu bodendula mambu motsu makulini ama bamavosanga na kala.

³⁷ Diwendi rie: gutabululu bunsonsi na mambu magu yeri guna mbela vo ndunga.

Bewivuli yilimba

³⁸ Mbana milonsi mimigaga na baJuif abamaba baPharisie bamavosa na Jesus rie: Mulonsi tulasi yilimba.

³⁹ Jandi amabagabusila rie: Ka muna dibi di divu na batu batemu ejiji! Dugolaba yilimba yisusu, diwendi rie: kala Jonas mubiyitsi amaduvegu nderi yilimba; duyamueviva yisusu.

⁴⁰ Nana Jonas amatsanina bilumbu birieru o gari moji nyama mamba munongu mosi Muana Mutu otsana bilumbu birieru o tsi butamba.

⁴¹ Mu yilumbu yimufundu bisi Ninive bodufuengilila mu mbari ava bamagululu malongi maJonas bamakalula diela; na avava va gari enu vavu oyiviolili ne Jonas.

⁴² Mu yilumbu yimufundu kaga jimugetu ajimaruyila o tandu oba na musuga ufuengilila batu batemu ejiji. Jandi amaketsoyisa na mulingu uneni tsiri mu disusu yika ugulu malongi madiela diSalomon; na avava va gari enu vavu oyiviolili ne Salomon buneni.

Dugabugu duyinyunyi yibi

⁴³ Ava yinyunyi yibi yipalili mutu yilingingi o yiari ayigaa na mamba uyenarombanga mbura utsanina. Pa jandi agejidili

⁴⁴ evosi rie: Nyilegabuga o ndagu aji nyimapalila. Kabogu egabuyi o ndagu ajigaa mutu ajivu jigombulu na jiminsu.

⁴⁵ Mbana egungi yisambuali yibinyunyi bisusu abibiva uviolila jandi uyetsana va mosi nandi. Nsanunu jiusita jimutu eni jimaviolila ajitega ubiva. Diuba munongu mosi na batu batemu ejiji.

Nguji na baana banguji baJesus

⁴⁶ Jesus yika uvosa evosi na batu ava nguji andi na baana banguji bandi bamaruyila; mbe baronda umoga nandi kabogu bamamukela va gusu kana.

⁴⁷ Mutu amamutsingula rie: Nguji agu na baana banguji bagu baji va gusu kana na berondi umoga nagu.

⁴⁸ Jesus amamuwagula rie: Anyi avu nguji ami? Banyi bavu baana banguji bami?

⁴⁹ Mbana amasamba dikaka ombu badukitsi bandi na amavosa rie: Ababa bavu nguji ami na baana banguji bami.

⁵⁰ Uotsu oyivayingi adi Taji ami ajivu o julu erondi aji muana nguji ami vo nguji ami.