Matthieu 11 - La Sainte Bible en Langue Yipunu

Bilumbi biJean Baptiste

¹ Jesus anomana ulonsa digumi na badukitsi bandi babeji malongi meni amagusuga vana uyenalinganga nolonsanga o misiengi misusu.

² Ava Jean Baptiste amabila o tsugu amagulu bedodisi bisalu biChrist kabogu amasindiga badukitsi bandi ombu gandi.

³ Bamamuwivula rie: Je ndeʼ la jandi agu Jean evosi uruga eruyi vo tuviva ususu?

⁴ Jesus amabagabusila rie: Wendanu notsingula Jean adi dutsilaba na adi dutsigulu, diwendi rie:

⁵ bidunga bikalaba, bitsondu bigemuetsonduga, bibedu binyambi bikabelusu, madiba makagulu, bamfumbi bakarambuga na Musamu Uboti ukasamunu ombu bijaga.

⁶ Ka muna ubueji gu jandi olaba agugetumuni mambu mami paga!

⁷ Badukitsi baJean banowenda Jesus amabanda uwivula batu bivu mu diambu diJean rie: Yi dutsiyelaba o kumu? Dugobu adutsipupusu na punga?

⁸ Yika tsie dutsiyelabila? Mutu aduara biduaru biboti? Abeduari biduaru biboti na abetsani na maboti bavu o mandagu mabukaga.

⁹ Anyi dutsiyelaba? Mubiyitsi? Nyiina, nyidutsinguli rie: Eviolili ne mubiyitsi.

¹⁰ Jean amavosulu mu Bisonu rie: Nsambi evosi rie: Laba nyisindiyi yilumbi yiami va gusu agu, ugutsonsiyila nsila.

¹¹ Jabanu rie: Vasakaburu mutu aguiviolili Jean Baptiste buneni. Ne nana aguviolila ugeyi mu Durumu duNsambi emuviolili buneni.

¹² Ubanda mu temu aji Jean Baptiste amasamuninanga Musamu Uboti te na namunyi batu babi berondi ututsa Durumu duNsambi na mangolu mogu.

¹³ Ubongila va temu jibabiyitsi nesi va temu jimigaga miMoise nesi va temu jiJean, botsu bamabiga dimosi, diwendi rie: Durumu duNsambi.

¹⁴ Pa durungula udisinga, Jean la Elie aji babiyitsi bamabiga.

¹⁵ Jandi oyigulu, alubuy.

¹⁶ Na nyi nyubagusunu batu bebaba? Jogu bebagunu na bangebi abesani o dikasa. Dibuli dimosi bevosi na dibuli disusu rie:

¹⁷ Tutsidusiyila dimbika tumba dugaayina! Tutsiduwimbilila nyimbu tsimanyonyi tumba dugaalila.

¹⁸ Ava Jean amaruyila amabusa uji na asamanuanganga malamu na dumavosa rie: Ana yinyunyi yibi!

¹⁹ Ava Muana Mutu amaruyila amajanganga na amanuanganga na dumavosa rie: Ka muna mubi gu! Aji mulitsi na munuitsi, aji mbatsi babongitsi balepu na bango bikumbu. Tumba diela diNsambi dilabini na bisalu biandi.

Misiengi amimabusa ugulu

²⁰ Mbana Jesus amanyangila bisi misiengi abamalaba bimaga biandi rie: Dibandu yi dugekaluli diela?

²¹ Ka muna maguga ma ombu jenu bisi Chorazin! Ka muna maguga ma ombu jenu bisi Bethsaida! Mbe bimaga abimavagu ombu genu bimavagu ombu bisi Tyr na bisi Sidon, jogu mbe bamakalula diela nesi uduara siela na ugolana dibufu.

²² La dibandu mu yilumbu yimufundu jenu dukilusu uviolila bisi Tyr na bisi Sidon.

²³ Jenu bisi Capernaum, ka muna dunangu du! Jenu dusundusu nesi te no bulungi bumuji. Mbe bimaga abimavagu ombu genu bimavagu ombu bisi Sodome, mbe ukimuelabana ta na namunyi.

²⁴ Jabanu rie: Mu yilumbu yimufundu jenu dulasu maguga uviolila bisi Sodome.

Ruganu ombu gami, nyudumuna kata

²⁵ Diweru dieni Jesus amavosa rie: Nyiguyitsi Tata, Fumu julu na butamba! Nyigugabusili diboti mu mbari gumalasa mambu memama ombu bifufu na gumamasuega bango diela.

²⁶ Nyiina Tata, motsu mana mamavagu nana gumarondila.

²⁷ Tata ami amapega musuga uotsu. Ne mutu mosi agejabi nana Muana avu yika Taji, na mutu agejabi nana Taji avu yika Muana na jenu aba jaʼ beni omujabisa.

²⁸ Ruganu ombu gami, jenu botsu adumatogulu mifuna, nyudumuna kata.

²⁹ Bonganu yilala yiami na kwijianu mbana duba na yivumu mu mbari nyiji divolambombu na nyina murima usunda.

³⁰ Va julu vana yilala yiami yigaa yivura na mufuna agu nyuduvega uvu ulengalana.