Matthieu 10 - La Sainte Bible en Langue Yipunu

Digumi na bilumbi bibeji

¹ Jesus amanengila digumi na bilumbi bibeji na amabavega musuga upalisa binyunyi bibi nobelusa maali mamunongu na munongu.

² Miina mogu amama: Agutega Simon (agumanengulungu Pierre), na muana nguji andi Andre; na Jacques na Jean (baana baZebedee),

³ na Philippe na Barthelemy na Thomas na Matthieu mubongitsi lepu; Jacques muana nguji Alphee na Thaddee;

⁴ na Simon muisi Cana na Judas Iscariote, la jandi omafunda Jesus ombu bavinitsi bandi.

Bisalu bidigumi na bilumbi bibeji

⁵ Jesus anosola digumi na batu babeji amabalonsa rie: Duyawenda ombu jogu abagaa baJuif na duyakota o misiengi miSamarie.

⁶ Tumba wendanu viri ombu baIsrael abavu nderi bindombu abimatsiemuga.

⁷ Wendanu na lonsanu rie: Durumu duNsambi duka bebeli!

⁸ Belusanu bibedu, rambusanu bamfumbi, belusanu bibedu binyambi na palisanu binyunyi bibi. Dusamafuta adivu nenu kabogu gabilanu basusu munongu mosi.

⁹ Duyalinga na lora ne mbongu

¹⁰ ne komi ne bikutu bibeji ne bapondu ne duvengu mu mbari musalitsi abungulu.

¹¹ Ava dukotila nesi o musiengi nesi o dimbu tsananu na mutu agududila na nsangu; tsananu nandi te na duwenda.

¹² Ava dukotila ndagu yika la ndagu, dukagabila bisi ndagu eni miula.

¹³ Pa bisi ndagu eni bedudili na nsangu miula miusiala nogu tumba pa bagedudili dukabagandila rie: Tugomueruga gunu.

¹⁴ Pa bisi ndagu vo bisi dimbu bagodudila na nsangu nesi ugulu mambu menu kabogu basilianu na warisanu mugandu enu rie: Tugomueruga gunu, via!

¹⁵ Jabanu rie: mu yilumbu yimufundu bisi musiengi eni bokilusu uviolila nesi bisi Sodome na Gomorrhe.

¹⁶ Jabanu rie: nyidusindiyi, duba nderi bindombu va gari baminsi. Kabogu jabanu usoga diela nana banyoga noba sui nana mabembi.

¹⁷ Lubuganu mu mbari voba batu abodugaanga nodubega o mifundu, bodudimba mambata o Mandagu maYibenguna.

¹⁸ Mu diambu diami bodubega va gusu bivunda bimalongu nesi va gusu bakaga, avana dudila temu umana miunu mienu va gusu ogu na va gusu abagaa baJuif.

¹⁹ Ava bodufundisila duyalaba goma na duyaletasa adi duwagula na nana duwagulila; muna diweru dieni dudila adivu diwelimina uvosa.

²⁰ Mambu meni magoba amenu tumba moba ama Yinyunyi yiNsambi oduvega uvosa.

²¹ Muana nguji owakisa nesi muana nguji andi ombu bango dikasi yiri oboku; taji ovaga munongu mosi na baana bandi; baana bovina bataji na banguji bogu na bobawakisa ombu bango dikasi yiri boboku.

²² Botsu boduvina mu diambu diami. Tumba oyiwarili motsu odila monyu.

²³ Pa bodukuana va musiengi mosi ka rinanu o musiengi ususu. Nyidutsinguli rie: Mbe dusakamana ulingula misiengi miotsu miIsrael Muana Mutu okeruyila.

²⁴ Muwijitsi ageviolili mulonsi na musalitsi ageviolili fumu andi.

²⁵ Kabogu muwijitsi asali uba nana mulonsi andi na musalitsi asali uba nana fumu andi. Pa Taji amanengulungu Beelzebul, bagonengila baana na miina amamaviolila ubiva?

Aguvu uwelimina udumu

²⁶ Duyaduma batu. Vagaa diambu adimasuegu adigojabunu na vagaa fundu ajigovosu va misu mabatu.

²⁷ La dibandu motsu ama nyivosi nenu mukolu mavosulilianu va nyangu na ama dumagulu o tsi fundu mawansilianu muansu.

²⁸ Duyaduma jogu abeboki dunyuru, bagorungula uboka yinyunyi. Tumba dumanu Nsambi mu mbari pa ebokisi ana musuga ubunga yinyunyi na dunyuru o bulungi bumuji.

²⁹ Dugorungula usumba nsuengi beji na doli dumosi? Tumba ne nana pa jimosi jifu Tata edijabi.

³⁰ Lesa bansuengi tambusa na jenu; nesi nanga tsienu tsitalu.

³¹ Kabogu duyalaba goma; jenu batu dugeviolili bansuengi?

Utubula masumu na ugala Jesus Christ

³² La dibandu uotsu aguvosa va misu mabatu yiri amafubana murima nami, menu nyumusingisila va gusu Taji ami rie: Tuji murima mosi.

³³ Tumba uotsu agukala va misu mabatu, nyumugala va gusu Taji ami ajivu o julu rie: Ngemujabi.

Tsiri duvotsu yika dijenga

³⁴ Duyatasa yiri nyimaruga uyivotsa manguba; dingensa nyisamaruga na duvotsu tumba nyimaruga na dijenga.

³⁵ Va julu vana nyimaruga na dugabu: diwendi rie: baana bovina bataji na banguji; baboji na baboji bovinasana;

³⁶ tindi muvinitsi opalila mu yifumba yienu.

³⁷ Jandi oyirondi taji na nguji andi uviolila menu agaa uwelimina uba uami na jandi oyirondi muana andi dibaala vo mugetu uviolila menu agaa uwelimina uba uami.

³⁸ Jandi ogenanguli kurusu unduka agaa uwelimina uba uami.

³⁹ Jandi oyirondi ukegobula otsiemuga tumba oyikevega mu diambu diami ogobulu.

Bisaku

⁴⁰ Jandi oyidudili endili na jandi oyindili edili jandi omansindiga.

⁴¹ Jandi oyidili mubiyitsi Nsambi mu mbari avu mubiyitsi Nsambi osaku dedi nandi; jandi oyidili mutu aguvu usungama na Nsambi mu mbari avu asungama na Nsambi osaku dedi nandi.

⁴² Jabanu rie: oyiveyi mamba monu ombu mua mudukitsi ami osaku.