Marc 9 - La Sainte Bible en Langue Yipunu

¹ Jesus amamuebatsingula rie: Dingensa nyidutsinguli rie: Bamosi abavu vava bagolefu te na mangolu ma Durumu duNsambi molabana.

Dunyuru duJesus duikaluyi

² Tsona mosi jinosuka Jesus amanengila Pierre na Jacques na Jean; jogu botsu bamawenda va mosi o julu mukongu. Ava bamamugengilila jaʼ uotsu amakaluga,

³ nesi biduaru biandi bimakaluga munongu uvedama na uvema agu mutu agorungula uvemisa.

⁴ Mbana badukitsi beni barieru bamalaba Elie na Moise umoga bemoyi na Jesus.

⁵ Pierre amavosa na Jesus rie: Mulonsi, diboti yiri tubianu vava. Turungianu mirorombi mirieru, umosi aguagu na umosi aguMoise na ususu aguEli.

⁶ Diwendi rie: asamajaba adi evosi mu mbari jogu botsu bamaregama na goma.

⁷ Dimungi dimalabana na dimabagumba; diufi dimagulunu rie: Agugu la Muana ami udurondu, mugululuanu!

⁸ Vana vana badukitsi banogengila yiari na yiari basamamuelaba batu basusu; yika Jesus amasiala nogu.

⁹ Ava bamasunduyila mukongu Jesus amabagandisa rie: Duyatsingula mutu adi dumalaba te na vana Muana Mutu orambuyila odufu.

¹⁰ Bamadisinga tumba bamawivusana rie: Durambugu o dufu la yi?

¹¹ Mbana badukitsi bamamuwivula rie: Dibandu yi milonsi mimigaga belonsi yiri Elie oreyila uruga?

¹² Amabagabusila rie: Dingensa Eli oreyila uruga ukunsa mambu motsu. Dibandu yi bimasonunu yiri Muana Mutu olaba maguga na olensu?

¹³ Nyidutsinguli yiri Elie amaruga kala na bamamulensa nana bamarondila, kabogu Bisonu bimadugusu.

Jesus ubelusa ebelusi muana udibaala aguvu na yinyunyi yibi

¹⁴ Ava bamagabuyila bamarasuna badukitsi bamosi na yinombu yineni. Milonsi mimigaga bamatsundanga nogu.

¹⁵ Batu banolabilila Jesus bamasutu mbana bamawenda mambangu uyemubumba.

¹⁶ Jesus amawivula badukitsi bandi rie: Dibandu yi duitsundili nogu?

¹⁷ Mutu mosi amamuwaka rie: Mulonsi, laba nsibega muana ami. Aka na yinyunyi yibi ayimurombisi bubaba.

¹⁸ Diweru adi yinyunyi yibi yimugaangi yimubuayi va tsi; muana epalisi mafuitsa na evayi diweriti na jaʼ uotsu akayimbanga. Nsiwivula badukitsi bagu umupalisila yinyunyi tumba bagaarungula.

¹⁹ Jesus amawaka rie: Ka muna paga ji! Duna mirima migala. Nyisakatsinga nenu? Nyurungula uwarila kulini tsienu? Bega muana.

²⁰ Bamamubega ombu gandi. Yiotsu ayi yinyunyi yibi yilabili Jesus yimagaanga muana, muana amaberuga na amayenabungalananga; mafuitsa mamapala o munu andi.

²¹ Jesus amawivula taji andi rie: Temu yi amabandila ubela nana? Taji amagabusila rie: Ubongila va bungebi buandi.

²² Temu tsipuela yinyunyi yieni yimubuayi o muji nesi o mamba, yirondi umuboka. Pa gurungula, tulasi yingeba, tuwamusi!

²³ Jesus amamugabusila rie: Guivosi rie: Pa gurungula! Motsu morungulu ombu jandi ona yitu.

²⁴ Vana vana taji muana amagamuga rie: Nyina yitu! Kwamusiati mu mbari yitu yiami yivu yigeyi!

²⁵ Jesus anolaba batu uruga beruyi mambangu amanyangila yinyunyi yibi noyiruma rie: Ndeʼ yinyunyi yibubaba na madiba pala, guyamuemukotila.

²⁶ Na mugamu uneni yinyunyi yibi yimagaanga muana nomututusa na mangolu maneni mbana yimapala. La dibandu bamavosila rie: Amatabuga.

²⁷ Tumba Jesus amamugaanga mu gogu na amamusimbula mbana muana amatsana.

²⁸ Ava Jesus amakotila o ndagu, badukitsi bandi bamamubega o fundu umuwivula rie: Dibandu yi tugaarungulila upalisa yinyunyi yibi yieni?

²⁹ Jesus amabawaka rie: Munongu eni uipalusu yika na dusambu.

Jesus ubuesa uvosa diambu didufu na durambugu duandi

³⁰ Bamagusuga vana na bamavioga o Galilee. Jesus asamaronda yiri bojaba agu avu

³¹ mu mbari amaronda ulonsa yika badukitsi bandi. Amabalonsa rie: Muana Mutu olasu maguga na batu; bomuboka tumba mu yilumbu ayimurieru orambuga o dufu.

³² Badukitsi basamamugulu tumba bamalaba goma umuwivula bivu.

Anyi avu muneni?

³³ Bamatola o Capernaum. Ava bamatolila o ndagu Jesus amawivula badukitsi bandi rie: Dibandu yi dutsitsundilanga mu nsila?

³⁴ Tumba basamawagula mu mbari ava bamabila mu nsila bamagalana buneni.

³⁵ Jesus anotsana amanengila digumi na babeji na amavosa rie: Pa mutu erondi uba muneni akesunsa na abi musalitsi botsu.

³⁶ Mbana amabonga muana ugeyi na amamureliga va gari ogu. Anomukobiga gogu amavosa rie:

³⁷ Uotsu edili muana nana gugu ugeyi mu diina diami endili wandi na uotsu endili, edili jandi omansidiga.

Agugaa na kueru netu aji mutu etu

³⁸ Jean amavosa na Jesus rie: Mulonsi, jetu tutsilaba mutu aguipalisi binyunyi bibi na mangolu madiina diagu; tutsimugandisa mu mbari agaa netu.

³⁹ Jesus amamugabusila rie: Duyamuemugandisa mu mbari mutu agorungula uvaga bimaga mu diina diami nomueposila mambu mabi.

⁴⁰ Jandi ogaa na kueru netu aji mutu etu.

⁴¹ Na uotsu oduvega yilasi yimamba mu mbari duji baana baChrist, nyidutsinguli rie: Ngensa osaku yisaku yiandi.

Masumu na mbangulu

⁴² Meʼrianua: Pa mutu otsimbusu muana umosi va gari baana bebaba yiri otsiemusa yitu, diviolila ubueji yiri bomutunga dimanyi dineni va kingu nomubuaga o mubu.

⁴³ Pa dikaka diagu digutsimbusu; ditabuli, tsiri diambu diviolila uvura ukota o julu na dikaka dimosi buandi tumba divu diambu ukota o bulungi bumuji ne pa guna makaka motsu mabeji. [

⁴⁴ Aguna bayinyi bagefu na muji ugetsimi.]

⁴⁵ Pa dikulu diagu digutsimbusu ditabuli, tsiri diambu diviolila uvura ukota o julu yitsondu tumba divu diambu ukota o bulungi bumuji ne pa guna makulu motsu mabeji. [

⁴⁶ Aguna bayinyi bagefu na muji ugetsimi.]

⁴⁷ Pa disu diagu digutsimbusu didonduli, tsiri diambu diviolila uvura ukota o tsi Durumu duNsambi na yitosu tumba divu diambu ukota o bulungi bumuji ne pa guna misu motsu mabeji.

⁴⁸ Aguna bayinyi bagefu na muji ugetsimi.

⁴⁹ Nana mutu ekukili musayi munongu mosi mutu okuku muji.

⁵⁰ Musayi la yima yiboti tumba pa musayi umasambuga, yima yi umuegabusulu dueyi? Banu nderi musayi, tsananu na duvotsu jenu beni na jenu beni.