Marc 8 - La Sainte Bible en Langue Yipunu

Jesus ulisila elisili tosini jina tsibatu

¹ Mua temu jinovioga yinombu yisusu yineni yimagukama. Jesus anolaba yiri bagaa na biguji amanengila badukitsi na amabatsingula rie:

² Nyilabi batu bebaba yingeba mu mbari baka bilumbu birieru nami na bagaa na biguji.

³ Pa nyubagabusila na nsala mangolu mobasuka mu nsila mu mbari bamosi bamarambuyila vala.

⁴ Badukitsi bandi bamamuwivula rie: Turungula ubadilila biguji o kumu?

⁵ Jesus amabawivula rie: Mapa kwe mavu nenu? Bamamugabusila rie: Yisambuali.

⁶ Mbana amatsanisa yinombu. Amabonga yisambuali yieni yimapa na anogabusila Nsambi diboti amamabukula na amamavega badukitsi na jogu bamagabila yinombu.

⁷ Bamadila mua nyama tsimamba wandi.

⁸ Jogu botsu bamaji na bamagukuru mbana badukitsi bamabola yisambuali yiponsi tsibibuku abimasialulu;

⁹ abamaji bamaba bebeli na tosini jina. Mbana Jesus amabaganina;

¹⁰ jogu botsu na badukitsi bamanangama o bota na bamawenda o yiari yiDalmanoutha.

BaJuif abamaba baPharisie uwivula bewivuli yilimba

¹¹ BaJuif abamaba baPharisie bamawenda ombu Jesus na bamamutsundisa. Mumuweliga bamamuwivula yilimba ujaba yeri Nsambi aji nandi.

¹² Mbana Jesus amamuangisa muru na amavosa rie: Dibandu yi batu batemu ejiji bekwivuli yilimba? Nyidutsinguli rie: Batu bebaba bagolaba yilimba, via!

¹³ Mbana amabaganina na amamuenangama o bota ugabuga o disimu dina.

Dufunusu dubaJuif abamaba baPharisie na duHerode

¹⁴ Badukitsi bandi mbe bamalibana ubega biguji, diwendi rie: bamabega yika dipa dimosi buandi.

¹⁵ Jesus amabalubusa rie: Duyadunsu mu diambu didufunusu dubaJuif abamaba baPharisie na duHerode.

¹⁶ Badukitsi bamatsundanga joʼ beni na joʼ beni rie: Dibandu yi evosili nana? Mu mbari tugaa na mapa?

¹⁷ Jesus amajaba adi bevosi kabogu amabawivula rie: Dibandu yi duitasili diambu dimapa? Dugaa na diela, dugegulu? Mirima mienu mimagalusu?

¹⁸ Duna misu! Dugelabi? Duna matuji! Dugegulu? Dugerangimini

¹⁹ ava nyimabukulila mapa maranu, tosini yiranu tsibabaala bamaji, mbeyianu? Dumabola ponsi kwe tsibibuku abimasialulu? Jogu bamamugabusila rie: Digumi na ponsi beji.

²⁰ Ava nyimabukulila yisambuali yimapa ulisila tosini jina tsibabaala dumabola ponsi kwe tsibibuku abimasialulu? Bamamugabusila rie: Yisambuali.

²¹ Mbana Jesus amabawivula rie: Te na vana dusakagulu?

Jesus ubelusa ebelusi yidunga o Bethsaida

²² Banotola o Bethsaida batu bamabega yidunga ombu Jesus na bamamuwivula umubemba.

²³ Amagaanga yidunga mu gogu na amamubega te no tsomu dimbu. Anomusinga mateji mu misu amamukubiga yinsi na makaka na amamuwivula rie: Guilabi yima?

²⁴ Amagengila novosa rie: Nyilabi batu nderi miri tumba nyilabi ulinga milingi.

²⁵ Jesus amamuemukubiga yinsi na makaka. Mbana yidunga amagengila tumuu! Amalaba biotsu na buranga.

²⁶ Mbana Jesus amamusindiga o ndagu andi na amamugandisa rie: Guyananga dimbu.

Pierre utubula etubuli yiri Jesus aji Christ

²⁷ Jesus amawenda na badukitsi bandi o dimbu diCesaree jiPhilippe. Ava bamabila mu nsila Jesus amabawivula rie: Yi batu bevosi mu diambu diami?

²⁸ Bamamugabusila rie: Bamosi bevosi yiri guji Elie na basusu bevosi yiri guji mubiyitsi.

²⁹ Amabawivula rie: Tumba jenu yi duitasi? Pierre amamugabusila rie: Guji Christ.

³⁰ Kabogu Jesus amabalubusa rie: Duyaditsingula batu.

Jesus ulonsa ebalonsi nana ofuila na nana orambuyila o dufu

³¹ Mbana Jesus amabanda ulonsa badukitsi bandi rie: Muana Mutu olaba maguga maneni; bivunda na bavagulitsi bapagu na milonsi mimigaga bomubusa. Va julu vana oboku na orambuga o dufu mu yilumbu yimurieru.

³² Asamabasueyila diambu. Kabogu Pierre amamubega o fundu na amamunyangila.

³³ Tumba Jesus amageluga na anogengila badukitsi amanyangila Pierre rie: Ndundi Satan! Matasa magu mavu mabatu tsiri maNsambi.

³⁴ Mbana Jesus anonengila yinombu na badukitsi bandi amabatsingula rie: Pa mutu erondi ulinga nami vengu obusa mandi motsu nonangula kurusu andi nonduka.

³⁵ Mu mbari oyirondi ukegobula otsiemuga tumba oyikevega mu diambu diami na diMusamu Uboti ogobulu.

³⁶ Ne pa mutu odila bulongu buotsu tumba otsiemuga vo ubungana, ubueji uka? Ugatsi!

³⁷ Vagaa yisalu ayiurungula ugabusa monyu.

³⁸ Pa mutu olaba yisonyi mu diambu diami na mu diambu dimalongi mami mu temu ejiji kabogu Muana Mutu wandi omulasa yisonyi ava oruyila ulasa bundumba buandi na buTaji na bubiansa.